無殻茶葉蛋 Chinese Tea Soup Eggs Without Shell

茶葉蛋多數連殻整，我今次就剝咗殻先整，製成品似鹵水蛋，食時唔駛剝殻，啖啖肉！

煮蛋浸蛋嘅材料可以自由配搭，分量我冇定準，呢次用咗：大紅袍茶葉、八角、糖、鹽、鮮露、雞粉。

我嘅做法係先將蛋用水烚熟，再剝殻，然後先用汁料反復煮浸幾次，再放涼後放入雪櫃浸一日。可凍食，可翻熱食。

我試過用街市平價蛋同超市泰國蛋整，效果都一般，平價蛋冇質感，易散。泰國蛋冇香味。呢次用嘅係星加坡蛋，效果較好，口感實淨彈牙，味道較香。


  ***Please leave your feedback, thanks!***

肥哉廚房2013年之前六百幾個貼文載於「隨意窩」網站，觀迎光臨指教：http://blog.xuite.net/fatjoykitchen/hkblog 

油鹽水浸黃腳鱲 Braised Yellowfin Seabream In Salty And Oily Water

 

浸魚比蒸魚的肉質更滑，今日就買左三條黃腳鱲仔，25元，一於用油鹽水浸之。

 

黃腳鱲清洗乾淨去清細鱗，在肚肉放片薑，再全身抹上粗鹽薑粒，醃一陣。

 
燒滾一鑊水，放入薑片葱段，加油、鹽、胡椒粉。再將魚放入，此時轉為細火慢慢浸魚。

整個過程水都唔可以滾，只用慢火保持較高熱度，魚在平靜的熱水中慢慢浸熟，約需時15分鐘。

上碟，灑上薑絲、葱粒、芫茜碎，贊熱油，落蒸魚豉油即可開飯！

 

 

 

睇下先，魚肉細滑，十分可口！大家不妨一試！

 

 



***Please leave your feedback, thanks!***

肥哉廚房2013年之前六百幾個貼文載於「隨意窩」網站，觀迎光臨指教：http://blog.xuite.net/fatjoykitchen/hkblog
 

梅酒(四百二十五天) Plum Wine(425 Days)

老豆！父親節快樂呀！



開支梅酒乾番杯先！浸左一年零兩個月喇，四百二十五日喇。

酒味香，有梅子果味，又唔係太甜，都唔錯。

雖然全屋都唔係酒徒，今日都試少少啦！



晏畫仲炒左個肥哉小炒同滾左湯，唔得閒貼上黎住喇，要出街同老豆過節喇。


Happy Father's Day! 飲杯！

綠野仙蹤(金華火腿湯浸翡翠豆苗) Poached Bean Sprouts In Jin Hua Ham Soup

呢個菜，簡單易做，幫佢起個靚名，就更加有趣味啦！食都食得開心D！

綠野：翡翠豆苗



仙蹤：金華火腿

翡翠豆苗洗乾淨，瀝乾水。

金華火腿一塊，先用滾水放湯，做個金華火腿湯底。

將火腿撈起，切成碎粒備用。

在湯底中加入薑片、糖、雞粉、適量油。大火煮滾，加入豆苗。

較大火將豆苗同湯液煮至再滾，然後轉慢火，保持溫度以不滾為準，將豆苗浸熟。

在碟底灑上火腿碎。

倒入豆苗同湯液，再放入火腿碎在上面。



綠野仙蹤，大功告成！

白鹵水豬手 Clear Marinade Sauce Pork Trotter

呢個凍食豬手爽而不膩，味道清香，可以當小食，送飯當然都可以。


我買左新鮮豬手一隻，49元，請師傅燒毛除毛斬開一塊塊。又買左包白鹵水料，另備鹽、冰糖、雞粉。


開雙爐頭，一邊煲白鹵水汁，用約六碗水加鹽、冰糖、雞粉同煲鹵水料。



另一邊將已洗淨豬手出水，再沖凍水，除去碎骨。再用滾水加幾滴白米醋烚30分鐘。


烚好後過冷河再放入冰水中再瀝乾水。將煲好既白鹵水過濾倒入豬手中。


放涼浸五六個鐘或浸過夜至豬手入味即可食用。

浸梅酒 (270天) Plum Wine (270Days)

又過左三個月，樽梅酒已經幾香，有陣果香同有種杏仁味。

今日試左少少，甜度適中，酒味都可以用香醇形容。

屋企人平時唔飲酒，最快都要農曆年過節先飲！

羅漢茶葉蛋 Poached Eggs In Chinese Tea And Dried Grosvener Momordica Fruit Soup

買左盒韓國啡蛋，十隻。用陳年普洱茶葉同細半個羅漢果，一於浸個茶葉蛋。



仲要落兩粒八角、一茶匙丁香粉、家樂鮮露、一湯匙冰糖、兩湯匙鹽、一角陳皮。

雞蛋洗淨，材料沖乾淨，全部放入凍水慢火半煲半浸加熱。

慢火浸煲至蛋熟，略搞碎蛋殼，再浸煲。

煲下、浸下、又煲下，又浸下。煲至水位減半，熄火浸蛋，浸佢一兩日先食更入味。不過忍唔住已經食左幾隻。



落左羅漢果，鹹香中帶甜味，係出面街檔買唔到架。

浸梅酒(一百八十天) Plum Wine (180 Days)

眨下眼呢樽梅酒已經浸左半年，色水越來越深。

今日再加一百克冰糖，加完已經滿到上頂，一共落左三百克冰糖，唔會再加冰糖了。

再浸佢一年先飲都未遲。

浸梅酒(九十天) Plum Wine (90 Days)

樽梅酒唔經唔覺已經浸左三個月，上次落既一百克冰糖早已經溶晒，酒既色水都幾靚。



今日又落多一百克冰糖，而家總共落左二百克。酒液已經上到樽頸，睇怕唔可以再落糖喇。

羅漢雞翼 Poached Chicken Middle Wings In Dried Grosvener Momordica Fruit Soup

呢個唔係豉油雞中翼呀，一滴豉油都冇落架！



雞翼係最平凡既食材，羅漢果都係煲湯常用材料，有冇試過將呢兩樣合埋一齊呢？

平凡加平凡就等於不平凡啦，呢款「羅漢雞翼」超好食喎！



去「樓上」行左一轉，真係大開眼界，可以近距離睇清楚各種藥材同中草本食材，呢個店鋪設計真抵讚，一早應該咁啦！

果D乜乜堂物物堂如果仲唔思改進，市場俾人搶走絕唔出奇。

樓上D野其實幾貴，因為包裝較大，花費就較多，不過勝在包裝企理討好。買左六個羅漢果，都幾靚。今次用黎整羅漢雞翼，搞搞新意思！



材料：

1) 羅漢果一個  2) 雞中翼八隻  3) 陳皮一角  4) 八角一粒  5) 薑片兩片  6) 冰糖三小粒

做法：



1) 雞中翼解凍後，落鹽、紹酒醃過夜。
2) 羅漢果破開沖洗乾淨，捏成小塊。
3) 陳皮浸洗乾淨



4) 用鑊燒滾水，放入羅漢果、陳皮、八角、薑片，再煲滾，轉中慢火煲至湯液轉深啡色，羅漢果出味。
5) 將雞中翼放入羅漢果湯液中，熄火加蓋浸十分鐘。
6) 十分鐘後，撈起雞翼，加入冰糖，再煲滾湯液，又放入雞中翼，熄火加蓋又浸十分鐘。



7) 重複以上5)6)直至將雞翼浸熟。
8) 上碟，放涼即可進食。

好味！雞翼充滿羅漢果獨特既「回甘」甜味，同豉油雞翼完全唔同架！

鹽水荔枝 Lichee In Brine

喂喂喂，唔係湯丸呀，係荔枝呀。

網友「加油加油」話佢媽媽教落用鹽可以令荔枝冇咁燥火，於是我就浸左呢兜鹽水荔枝喇。

一浸就浸左18粒，放入雪櫃雪凍，今朝食下一粒，食下又一粒，結果食鬼晒。

而家個喉嚨都冇事喎，一D都唔覺燥火喎，真係得喎，

唔該晒阿加油媽媽！

浸梅酒(四十五天) Plum Wine (45 days)

唔經唔覺浸海酒已經浸左個半月，而家樽酒係咁樣。

忍唔住加入一百克冰糖。



按照比例，兩磅青梅要配兩磅冰糖，兩磅冰磅成九百克。個樽裝唔晒添！唯有見步行步，落住一百克睇下先。