呢隻唔係鹹肉粽，我落左冬菇、蝦米、瑤柱、花生四樣做餡，就叫四寶粽啦。
我唔落五花腩，又唔落油。
第一隻係用番檔口隻粽四塊葉同條百幾吋既水草葉黎包扎。
學番佢咁包。
唔包開其實唔容易控制，只可以整成咁。
另外包多四隻，用左一扎粽葉，剩番兩塊。
同個鋼煲烚佢三個半鐘。
三個半鐘之後，攤凍秤一秤，輕過檔口隻粽一安士。
首先梗係開番第一隻檔口葉包個隻啦：
都算可以掛？
隻粽好「綿」，「綿」過檔口個隻。冬菇、蝦米、瑤柱、花生又香又腍。如果有舊肥美五香五花腩，其實仲好，加埋漏油鹹蛋黃，更好。不過為左健康，都係唔落喇。
補番個材料同做法：
1糯米隔晚浸，瀝乾水，落少少鹽同雞粉撈勻。
2綠豆仁洗淨浸二小時，瀝乾水。
3冬菇(要冬菇，唔要花菇)浸軟，剪開一半，渣乾水，落少少紹酒、糖、生抽醃一醃。
4蝦米洗淨浸軟。
5瑶柱浸軟摘去硬塊撕開。
6花生洗淨。
用竹葉四塊包一隻四角粽，先用大火烚再改中火烚三個鐘以上。
