白灼蘭度肉片 Boiled Chinese Broccoli And Sliced Pork

廚房成日煎煎炒炒，油煙好多，有時改下整法，可以減少油煙，洗抽氣扇都慳番。

記得以前讀書有個老師話佢家中煮食只用水煮，烚熟就食，好健康。又聽過朋友講起個外傭做菜成日都係煮煮淥淥，唔駛抹抽油煙機。

兩個理由加埋，都真係幾有說服力架。所以我呢次就唔開油鑊，一於用白灼法。

買左斤好靚無渣芥蘭，再加少少脢頭肉片，就整左呢個白灼蘭度肉片，無油煙操作，一樣好好味喎。

芥蘭摘去大葉(唔係掉，仍然可以灼食)，只留中間部分。脢頭肉切片醃好(今次我落左梳打粉)，我平時炒肉前唔會用粟粉醃肉，今次灼肉就要落埋粟粉，仲要落多D。

白灼芥蘭水要大滾油要多，落薑片、少少鹽同糖，仲可以落少少食用梳打粉，將蘭度灼好排好在碟上。

白灼肉片就要用慢火，水要微滾，落肉片，唔好即刻搞散，由佢pet pet下慢慢灼熟先會滑。

將肉片放在蘭度上，淋上熟油+蠔油+老抽，搞點啦！蘭度卜卜脆，肉片軟軟滑，令人胃口大開！

灼油菜(菜心) Fast Boiled Oily Vegetable

食左兩舊罐頭紅燒排骨，覺得都幾「漏」喉，想食番D青菜平衡下。

黎個灼油菜啦。菜心摘好只要菜薳部分。

用少少水，唔駛好多水，落較多油，落少少鹽、多少少糖，仲可以落少少梳打粉約細半茶匙，令菜即使灼較長時間灼腍D都可以保持青綠，唔鍾意就唔好落。

逐條排好上碟，可以就咁食，又可以落蠔油。如果嫌油多，梳打同蠔油又係化學野，鹽、糖味多，可以就咁清烚，會健康好多。

 

白灼蝦 Fast Boiled Shrimps

游水蝦仔一斤36元。蝦仔細細隻，肉更嫩滑。

蝦洗乾淨，煲大滾水，落少少油鹽，放蝦入水白灼之至僅熟即成。

用指天椒豉油點食，鮮美可口。