栗子可先煮，另薑片起鑊爆香雞件，落咗少少五香粉，芝麻醬，冰糖，老抽炆。
***Please leave your feedback, thanks!***
肥哉廚房2013年之前六百幾個貼文載於「隨意窩」網站，觀迎光臨指教：http://blog.xuite.net/fatjoykitchen/hkblog
2020年5月15日 星期五
栗子炆去骨雞 Braised Boned Chicken With Chestnut
晚飯家常菜，用咗半隻三黃雞，十幾粒栗子。家中長者已不能食骨頭，雞件都要去骨。
栗子可先煮，另薑片起鑊爆香雞件，落咗少少五香粉，芝麻醬，冰糖，老抽炆。
栗子可先煮，另薑片起鑊爆香雞件，落咗少少五香粉，芝麻醬，冰糖，老抽炆。
2015年10月27日 星期二
茄汁毛豆蝦仁 Braised Soybean And Shrimps In Tomato Paste
本來想整雪菜毛豆蝦仁，但係用番茄會健康D，所以改為茄汁毛豆蝦仁。
材料好簡單，毛豆一包，番茄三個，蝦仔半斤，金華火腿幾片。
毛豆先用水煮一煮，再逐粒剝出備用。蝦仔剝好去腸洗乾淨，醃好再索乾水。番茄切粒。毛豆用金華火腿水煨熟兜起。
燒熱鑊，落油，將蝦仁炒至八成熟兜起。原鑊放入番茄炆煮至變成茄醬，調味。此時放入毛豆同蝦仁。
將所有材料炒勻，略為收汁即可上碟。
上碟後灑上少少炒香金華火腿碎，更加惹味！
***Please leave your feedback, thanks!***
2015年10月17日 星期六
白豆角番茄牛肉 Braised White Long Bean And Tomato With Sliced Beef
呢味白豆角炆番茄炒牛肉，又係「雙蔬+肉」配搭，綜合炆+炒兩法。效果唔錯，可以一試！
白豆角摘好，番茄切好。白豆角先用油鹽水灼一灼去左草青味備用。
牛肉切片醃好，先炒至八成熟兜起。原鑊落番茄炆炒至腍身，加入白豆角再炆煮至個人喜好的腍度。
最後牛肉回鑊快炒，埋獻略收汁即可上碟。
白豆角炆番茄後再炒入牛肉，就完成呢碟雙蔬+肉配搭。色水、味道、口感都唔錯！開飯喇喂！！
***Please leave your feedback, thanks!***
2015年5月16日 星期六
廚餘(冬菇蝦米肉碎)炆豆腐 Braised Bean Curd With Leftover (Mushroom Dry Shrimp And Minced Pork)
惜食減廢係美德，一餐食唔晒既食物變左廚餘，飽肚之時會想過掉左佢算數，費事保存，但係咁樣浪費食物係唔岩既，所以就整左呢砵廚餘炆豆腐。
呢餐廚餘係咩？就係行政總廚整既「冬菇蝦米剁豬肉」，佢整左一大碟，一餐食唔完，本來把心一橫想掉左佢，但係冇咁做，雪左人雪櫃。今日買舊豆腐炆番佢就係一道菜啦。
先將廚餘爆番熱，加入適量水，放入豆腐炆至香氣四溢，調味埋獻，留多少少汁，灑上葱粒就搞掂。
一舊豆腐而家賣四個半，可以炆出一大砵。如果琴日倒左碟剩送就冇今日呢味喇！
2014年9月14日 星期日
荷蘭雞翼 (可樂雞翼) Soda Water Chicken Wings
可樂係汽水，汽水又叫荷蘭水，加埋如假包換既荷蘭豆，呢碟炆雞翼就名正言順叫做「荷蘭雞翼」啦！
呢味菜式好便宜，我買左一磅四隻雞全翼，只需14元。再加適量荷蘭豆同一碗荷蘭水(可樂)，就係主要材料。
雞翼先出水洗淨，切開雞搥部分，就有八件。先燒熱鑊落油，用較多薑片爆香起鑊，落雞翼爆炒一下，再加水、可樂、冰糖、老抽、鹽、紹酒，煮滾後轉中細火慢慢炆。
荷蘭豆另行炒熟，待雞翼炆約20分鐘熟透至汁液濃稠後，加入荷蘭豆兜勻即可上碟。
荷蘭雞翼做好喇！雞翼軟腍，蘭豆爽脆，非常美味！呢味菜式關鍵係要落足夠薑，薑味要出。油不要太多，因為雞翼本身會出油。要落冰糖，增加光澤。要用中細火炆煮雞翼先唔破皮，能保持外觀完整，大家都試下啦！
***Please leave your feedback, thanks!***
2014年9月13日 星期六
四喜烤麩 (肥哉版) Four Happiness Bran Dough (Fat Joy's Version)
早排去左九龍城一轉，買左舊烤麩，學下人整四喜烤麩，結果整左呢個肥哉版。
我用既「四喜」料係：金針、冬菇、雲耳同栗子。我諗比較少用既係栗子，因為多數會用花生或者筍片。今日響街市見到去衣栗子幾靚，於是就用黎配料。
烤麩用手搣成一塊塊，浸水揸水多次，浸至水清，再煮佢五六分鐘，再過冷河揸乾水就可以用。傳統做法似乎要炸，但係我唔想太肥膩，只係略煎一下就用。
配料栗子先煮至八成腍，金針洗淨出出水再打結爆香，冬菇雲耳浸軟煮腍。四樣野再一齊落味料(老抽、冰糖、紹酒、雞粉、蠔油)炒香。落埋烤麩加水炆煮。
煮至入味軟腍，落麻油，埋獻收汁即可上碟。
呢個菜式聽講係冷盤，不過我當普通送菜送飯食，煮埋一大兜一餐食唔晒，剩番既就自然變左冷盤啦，見上圖。呢個肥哉版油量較少，味道偏甜帶鹹，最好味入味既除左烤麩，竟然係金針！總之成碟既味道無論熱食定冷食我都好滿意！
***Please leave your feedback, thanks!***
2014年8月9日 星期六
節瓜炆帶子 Braised Scallop With Hairy Melon
上次包帆立貝一包有十三隻，煎左六隻，仲有七隻，今日將中間粒瑤柱片薄，共得十四粒帶子。
本來想整節瓜釀帶子，但係太麻煩，於是就咁用黎炆節瓜算數，加入少少甘筍點綴下顏色。
節瓜同帶子味道好夾，呢碟結果食到汁到撈埋！
2014年7月27日 星期日
番薯苦瓜甘筍炆肉排 Braised Pork Belly With Sweet Potato, Bitter Melon and Carrot
各位老友記，好耐冇見喇！
我咁耐冇貼文，其實冇乜原因，只係停左一陣就接唔番。今日卒之下定決心，要貼番文。其實一直都有整菜，只係冇貼上來。
今日先貼一個「番薯苦瓜甘筍炆肉排」，夠特別掛！
番薯甜甜地，苦瓜苦苦地，正好平衡一下，效果唔錯架！番薯當南瓜咁整就得啦。番薯抗癌一流，好過南瓜架！
苦瓜炆肉排就唔多講喇，番薯我既做法係先蒸至七成熟，再切粒備用。
待苦瓜甘筍炆肉排炆到咁上下，就落埋番薯粒，炆至番薯剛全熟腍身就可以。
我冇埋獻，番薯炆腍後就汁已經夠濃稠。
我冇埋獻，番薯炆腍後就汁已經夠濃稠。
上碟賣相都唔錯，味道都好好，得閒搞搞新意思，食飯都開胃D！
2014年7月21日 星期一
雲耳豆腐炆魚腩 Braised Black Fungi, Bean Curd And Fish Belly
呢味炆魚腩用左豆腐、雲耳同中芹做配料，三種配料都好有益架。
鯇魚腩清洗乾淨，用鹽醃至入味，再索乾水煎至兩面金黃。豆腐切細件煎香。
雲耳用油鹽酒撈一撈，同魚腩一齊炆，炆至腍身，加入豆腐，贊水再炆。
最後加埋中芹，炆至汁液適中，埋獻上碟。
呢碟家常小菜，送飯一流！
2014年4月27日 星期日
冰豆腐炆鯇魚腩 Braised Fish Belly With Iced Bean Curd
見人整冰豆腐咁好玩，又試下整，不過琴日我買左舊滑豆腐，唔係硬豆腐。
放入冰格冰左一日，攞出黎浸水解凍，再榨乾水， 榨完塊豆腐都差唔多散晒。
再切小塊，準備用黎炆魚。
鯇魚腩已醃左一日，抹乾水煎至兩面金黃，再加水炆煮，再放入冰豆腐，炆至夠時間，埋獻收汁上碟。
口感較滑豆腐有少少韌，都幾得意！
2014年3月9日 星期日
豆卜雲耳炆豬肉 Braised Deep Fried Bean Curd With Black Fungus And Pork
訂閱：
文章 (Atom)