欖菜香芹肉絲手摷米粉 Hand Stirred Rice Stick With Preserved Mustard Leaf And Olive, Chinese Celery And Pork St

肥哉手摷米粉又黎喇！

今次用左兩個「江門排粉」（一包三個），加埋配料，可以整到一巨碟。

配料有：



1）欖菜適量（兩湯匙)
2）中芹三棵切幼條
3)  脢頭瘦肉絲
4）紅蘿蔔絲適量

做法就係用肥哉版手摷法，唔駛炒架。



將米粉用凍水浸軟至白色，撈起瀝乾水備用。



起鑊爆炒已醃好既肉絲，炒到咁上下落埋紅蘿蔔絲再炒。



之後就熄火，待材料攤凍一陣，加入米粉同欖菜，再落適量油、鹽、糖、雞粉、魚露等等味料。此時就洗乾淨雙手，用陰力摷呀摷呀，卒呀卒呀，將材料同味料摷入米粉度，卒均。做好之後就由佢靜置一陣入味。

之後就原鑊開慢火，加蓋，適量贊水，將米粉慢慢加熱。熄火，攤凍一陣，再將米粉翻轉摷鬆，重複一次。



待米粉軟熟後，最後加入中芹，摷入米粉中。



又用慢火加蓋同上處理，直至中芹轉軟身香氣四溢即可收火上碟。



睇落好似好多功夫，其實只有一招，就係用十隻手指去摷，完全唔駛炒，可以用少好多油。

牛肉絲摷米

今日唔食飯，整個手摷米粉：牛肉絲摷米。

材料：芽菜一斤。韭菜一扎。牛肉絲適量。米粉一包。

做法：

1 將米粉浸入凍水中至米粉軟身，即撈起。

2 再將米粉放入滾水中用筷子摷散，即撈起用筲箕瀝乾水備用。

3 牛肉絲用生油、老抽、鹽、糖、紹酒醃勻至入味備用。

4 芽菜、韭菜洗淨備用。

5 分別炒牛肉絲、芽菜、韭菜，三樣料炒好後都要完全瀝乾水。

6 摷米開始：用個大不鏽鋼盆，放入已乾身既米粉，再放入已瀝乾汁液既牛肉絲、芽菜、韭菜，再放入兩湯匙熟油，加鹽、雞粉適量，然後用手將所有材料來個翻天覆地，摷勻。

7 食時用易潔鑊將米粉煎熱即可。

 

菜遠牛肉絲手摷鮑魚麵

料：壽仔鮑魚麵四個。菜心10條(12元斤寧夏菜心)。牛肉一舊20元。指天椒兩隻。 街市賣牛肉哥哥幫我片薄左舊牛肉，方便切絲。

做：

1 牛肉切絲，加入糖、鼓油、胡椒粉、孖蒸酒、欖油醃一小時後入鑊炒熟。

2 菜遠十條炒熟。

3 鮑魚麵四個用滾水灼1-2分鐘搞散過冷河，用筲箕瀝乾水備用。

手摷麵：

用個大盆，將麵、牛肉絲、一包鮑魚麵調料、蠔油、指天椒粒全部放入去。洗乾淨雙手，用十隻手指將所有材料摷勻，至完全均勻入味為止。

準備易潔鑊一隻，將摷好既麵放入去慢火煎至部分麵身微脆。

準備大碟一隻，排上菜遠伴碟，再放上煎好既麵，加少許葱絲椒絲，即成一碟美味既菜遠牛肉絲手摷鮑魚麵！