端午節糭多到食唔晒，雪櫃仲有大半包「黃皮」，本來想整糯米包，但係嫌麻煩，於是諗到用糭做餡，用埋啲黃皮整個一口「糭包」。早前買啲黃皮好多都已經黐埋晒一搣就爛，只能用較完好嘅來包，其餘都要掉。
肥哉版「一口糭包」香甜軟糯，又有花生芝麻增加口感，一啖一個，好好味。
2020年6月28日 星期日
甜食紅綠豆鹹肉糭一口包 Sweet Taste Sticky Rice Red And Green Beans Dumpling Mini Bun
端午節糭多到食唔晒，雪櫃仲有大半包「黃皮」，本來想整糯米包，但係嫌麻煩，於是諗到用糭做餡，用埋啲黃皮整個一口「糭包」。早前買啲黃皮好多都已經黐埋晒一搣就爛，只能用較完好嘅來包，其餘都要掉。
肥哉版「一口糭包」香甜軟糯，又有花生芝麻增加口感，一啖一個，好好味。
2020年6月13日 星期六
乾蒸牛肉燒賣 Dry-steamed Beef Siu Mai
買咗成大疊燒賣皮，包完豬肉燒賣，點少得包埋牛肉燒賣吖，今日包咗八隻，仲有一大疊燒賣皮用唔完！
牛肉燒賣唔係純正牛肉，要加入肥豬肉先好食，我仲加入少少鯪魚膠，落埋陳皮，芫茜，葱。
免治牛肉先調味，我落咗：蒸魚豉油、鹽、糖、粟粉、梳打粉、雞粉。混入陳皮、芫茜、葱粒。加油、酒、清水，將所有材料攪勻，再撻佢三十下，放入雪櫃雪十幾分鐘。
今次唔整咁多，包八隻算數，啲料用唔晒留返蒸牛肉餅。大火計蒸五六分鐘就搞掂。
加咗梳打粉同撻過嘅牛肉，就係酒樓風味，比較滑、彈。一出籠唔使三分鐘就冇晒啦！
***敬請留言 Comments welcome***
2020年6月11日 星期四
四式燒賣 Four Style Siu Mai
買到燒賣皮，試做肥哉版四式燒賣。上網見人整街邊檔魚蓉燒賣要用攪拌機打魚漿，再溝粉，我嫌麻煩，又冇攪拌機，於是改變主意，整個肥哉「四式燒賣」。我今次用咗三種植材料做燒賣餡：
鯪魚膠10元，蝦膠20元，半肥瘦豬肉攪碎30元。鯪魚膠同蝦膠，魚檔已經攪好，用佢地嘅配方溝好味同粉，豬肉自已醃好。於是乎……我混合出四種餡料，混合材料時唔好撈得太勻，太勻冇食趣。四種餡料即：1魚膠+蝦膠，2魚膠+豬肉，3蝦膠+豬肉，4魚膠+蝦膠+豬肉。咁就包都包得好玩啲開之啲啦（睇怕谷歌翻譯唔到我呢啲廣東㗎嘞)！「四式燒賣」登場！
你地分唔分到邊種餡打邊種餡呀？應該分到掛。左前係魚加蝦，左後係魚加蝦加豬，右前係魚加豬，右後係蝦加豬。如果你鍾意整嘢食，第一次包燒賣，都應該同我一樣咁開心興奮。包燒賣點包架，咪就咁包囉，冇乜技巧，唔使講到咁複雜，你有少少common sense就得，肥哉就係咁包↓，第一次肉手出鏡：
總之包到咁上下樣就得，呢啲平民大眾粗食，唔使追求咁完美（同買萬幾蚊個電飯煲煲飯一樣，都係過分多餘）。
包呀包呀，包咗四籠16隻，餡料用唔晒。已放滿個大蒸籠↓，睇下分唔分到邊種打邊種？？
跟住攞去蒸，水滾計大約蒸十分八分鐘，干蒸四式燒賣就可以出籠。嘩，蒸完出嚟變咗「混合四式」，我自己都幾乎分唔出邊式打邊式！
有啲真係要食落肚先知。下圖上半係魚加豬，下半係蝦加豬。
再嚟一張「四式燒賣拼盤」，睇真啲：由左至右：1蝦魚、2蝦豬、3魚豬、4蝦魚豬。
喂，埋嚟試下肥哉首版四式燒賣喇喂！你一粒我一粒，食下食下食清光！
2020年5月24日 星期日
豉椒蒸肉排矮瓜底 Steamed Pork Rib With Preserved Black Bean And Red Chili Pepper On Peeled Eggplant
豉椒蒸肉排常吃，有沒有試過用去皮矮瓜墊底？這樣蒸出來的矮瓜，非常軟滑，入口即化。家中有長者最啱食。材料非常簡單：
肉排一條二十元，矮瓜一條，蒜頭、豆豉、紅辣椒、葱適量。先用豆豉、糖、粟粉、少少紅辣椒粒、少少鬆肉粉醃肉排。之後將矮瓜完全去皮再切幼條，排在碟底。在上面鋪上已醃透入味的肉排。
燒滾水，大火蒸十二分鐘，取出，此時已可上枱開餐。我今次將蒸出來的汁液再加適量生粉水，以蒜頭、紅辣椒粒、糖、蠔油推一個獻汁，灑上葱粒，淋在肉排和矮瓜之上，令碟蒸餸有少少炆嘅效果，又冇炆咁肥膩。
呢味餸可以送飯，如用來炆米粉，即變成豉椒肉排茄子炆米，我今日就用咗半份來炆米粉，惹味過送飯！
2020年5月23日 星期六
雙魚蒸水蛋 Steamed Eggs With Two Fishes
蒸水蛋食得多，試過用兩種急凍魚肉蒸未？
今次用個缽頭整味雙魚蒸水蛋，蒸出嚟嘅蛋油潤嫩滑。材料包括：急凍三文魚同鱈魚，取其油香。湖北蛋三隻，貪佢個黃偏橙紅色，蒸出嚟色水較黃淨較靚。再加適量青豆用來點綴賣相顏色。
我嘅做法係先將魚解凍，抹乾水，直接蒸熟，拆肉，蒸三隻蛋只需用少量魚肉已夠。兩種魚油分都較多，保留適量蒸魚嘅汁液同魚油溝落蛋液中。
如果唔先將魚蒸熟，生的魚肉會出水，容易令蛋液同水嘅比例有變化影響效果。
用少少蒸魚汁炒青豆，贊少少酒將之炒至七八成熟待用。
先蒸蛋，蛋同水嘅比例大約係1:1.5。蛋液中落少少鹽、糖調味。如果想蒸出來的蛋更有彈性，可以在合比例之下落少少生粉水。如果怕魚有腥味，也可落薑汁蒸。
先大火後中火，一面蒸一面睇火，待蛋液慢慢凝固時逐少逐少落魚肉。蒸至九成幾熟時落埋所有魚肉鋪面，再落埋青豆，蒸至剛剛全熟。
最後淋少少蒸魚豉油，上枱開飯喇！
這味蒸蛋口感油潤嫩滑，有魚香蛋香，風味獨特，大家不妨試下。
今次用個缽頭整味雙魚蒸水蛋，蒸出嚟嘅蛋油潤嫩滑。材料包括：急凍三文魚同鱈魚，取其油香。湖北蛋三隻，貪佢個黃偏橙紅色，蒸出嚟色水較黃淨較靚。再加適量青豆用來點綴賣相顏色。
我嘅做法係先將魚解凍，抹乾水，直接蒸熟，拆肉，蒸三隻蛋只需用少量魚肉已夠。兩種魚油分都較多，保留適量蒸魚嘅汁液同魚油溝落蛋液中。
如果唔先將魚蒸熟，生的魚肉會出水，容易令蛋液同水嘅比例有變化影響效果。
用少少蒸魚汁炒青豆，贊少少酒將之炒至七八成熟待用。
先蒸蛋，蛋同水嘅比例大約係1:1.5。蛋液中落少少鹽、糖調味。如果想蒸出來的蛋更有彈性，可以在合比例之下落少少生粉水。如果怕魚有腥味，也可落薑汁蒸。
先大火後中火，一面蒸一面睇火，待蛋液慢慢凝固時逐少逐少落魚肉。蒸至九成幾熟時落埋所有魚肉鋪面，再落埋青豆，蒸至剛剛全熟。
最後淋少少蒸魚豉油，上枱開飯喇！
這味蒸蛋口感油潤嫩滑，有魚香蛋香，風味獨特，大家不妨試下。
2016年4月3日 星期日
鱆魚乾蒸鯇魚腩 Steamed Dried Octopus And Fish Belly
各位好呀！冇見一排祝大家身體健康！事事順利！
今日煲蓮藕鱆魚湯，留起半截鱆魚鬚，用來整左呢味「鱆魚乾蒸鯇魚腩」，搞搞新意思！鱆魚浸軟剪好鋪在處理好、醃好嘅鯇魚腩上，放上薑絲就可以蒸。
蒸十零分鐘至魚熟，取出。倒出魚汁，剪碎鱆魚鬚，另切好葱花，校好蒸魚豉油備用。
魚汁係精華所在唔好浪費，將汁同鱆魚粒落鑊煮滾，煮至略收汁，灑上葱粒，加埋蒸魚豉 油，淋在魚腩上。
一味特色鱆魚蒸鯇魚就完成，非常惹味鮮美，撈少少汁送飯一流！
***Please leave your feedback, thanks!***
肥哉廚房2013年之前六百幾個貼文載於「隨意窩」網站，觀迎光臨指教：http://blog.xuite.net/fatjoykitchen/hkblog
2015年11月8日 星期日
蒸鹽水雞翼 Steamed Salty Water Chicken Wings
雪櫃仲有半包雞中翼共八隻，琴日開始用鹽水浸定，今日用電飯煲清蒸。鹽水裏面有八角、糖、紹酒、薑片。
雞翼浸在鹽水，在雪櫃過夜。蒸前放入砵內，置於電飯煲蒸板上。煲內放一量杯水，按掣蒸至跳掣再保溫十分鐘。
蒸好取出，倒去水份，用冷水清洗並浸透雞翼。
加入炒香既黑白芝麻、熟油、試味調味或加些豉油魚露，撈勻即可享用。雞翼滑到冇朋友，層皮真係滑不溜口，不過唔好食咁多皮喎。
***Please leave your feedback, thanks!***
2015年11月2日 星期一
芋泥生根蒸肉餅 Steamed Minced Pork With Taro Paste and Sliced Bean Curd Balls
芋泥蒸豬肉餅入口粉香綿糯，我今次特別加入素生根，令口感添少少韌性，更加香口。
呢度既材料已可以整出一大個肉球，足夠分兩碟蒸。素生根洗淨去油壓扁浸軟再揸乾水，加少少豉油、糖醃一醃再剪成細塊。芋豆蒸熟壓成泥，加入少少鹽調味。免治豬肉調好味，醃夠時間。
三樣材料準備好後，先將豬肉撻到起膠，再逐少逐少搓入芋泥同生根，搓勻，再撻一陣。此時加入少少生粉同水，再搓勻撻勻。
將材料放入碟中，置滾水上蒸15分鐘。
加入葱粒、紅椒圈、淋上豉油熟油，即可上枱。
***Please leave your feedback, thanks!***
訂閱：
文章 (Atom)