糖醋烤鯪魚 Roasted Dace In Sweet And Sour Sauce

想食燻魚又唔想開油鑊炸魚，今日試左呢個懶人簡易法，整出黎既效果都有幾分似燻魚架！

買罐鮮炸鯪魚，加一包糖醋骨醬就可以做到類似燻魚效果。

罐頭鯪魚有三條，取出瀝去油，打開，在上面抹上糖醋骨醬，靜置一小時以上俾佢入味。

醃好後放入烤箱，我用150度每邊烤10分鐘，烤幾耐視乎個人喜好，耐D就乾D。烤至汁料收乾就可以。

出爐上碟，攤凍就食得。味道幾正，真係似食燻魚架！大家如有興趣，不妨試下！

***Please leave your feedback, thanks!***

麵包機整亞麻子法包 Mechine Made Flax Seed French Bread

想用埋屋企既麵粉，於是整左呢個法式包，落左一匙羹亞麻子，用麵包機整，要整五個鐘。

夜晚開機，真係整到天光！

質地真係同法包差唔多，外皮硬，咬到牙骹都軟。底部仲清晰可見麵包機底隻攪葉既印㾗。

切開一片片，今日唔煮飯，淨係煮送，食自家製法包當飯。

焗香草雞扒 Baked Chicken Steak

買左cheap cheap雞髀扒一大包有四塊，今日用左兩塊黎焗，落左三色椒同洋葱做配料。

醃料落左：胡椒粉、鹽、糖、喼汁、雞粉、梳打粉、茴香粉、乾露絲瑪莉葉。放入雪櫃醃過夜。先用白鑊(易潔鑊)慢火煎兩邊至微金黃色。

再將切好既三色椒同洋葱用橄欖油細火微炒一炒，放入焗盤用黎墊底，再放上雞扒。

放入焗爐用200度焗8分鐘，再返轉雞扒再焗8分鐘。

然後取出在雞扒面塗上蜜糖水，再放入焗爐焗約5分鐘，再取出塗另一面，又焗約5分鐘。

     

 

出爐就係咁樣。雞扒夠入味，雖然係cheap野，都可以接受啦。
 

 

 

焗香蕉蕃薯餅 Baked Banana Sweet Potato Cake

 

雅虎blog今日正式執笠，真係好唔捨得，佢個設計好好用，好過呢度無拿拿搞出三四個頁面，轉來轉去，轉到頭暈。雅虎真係簡單直接好多，版面功能又好，谷哥唔該學下啦。

 

今日行街市見到雞蛋黃蕃薯大平，十元三磅，買左五個。返到屋企見到有隻冇人吼既梅花點香蕉，就諗住整呢個香蕉蕃薯餅食下。

 

蕃薯先蒸熟，再同香蕉一齊猜成蓉，用黎做餅餡。我仲響裏面落左少少丁香粉同荳蔻粉。

 

跟住本應要做個曲奇餅皮，不過我唔想食牛油同太多糖，於是用左一半香蕉蕃薯蓉加蜜糖同橄欖油，再拌入低筋麵粉，猜成餅皮。放入雪櫃雪一陣。

 



 

之後用餅皮包餡，搓成橢圓形放入餅模打出，做左十二個餅仔。

 



 

 

在面上抹少少蛋黃汁，放入焗爐用180度火焗20分鐘。

 



 

攤凍後可以上碟做小食，得閒玩下整餅仔都幾得意啦！

 

 

個餅皮微脆但帶韌，因為我唔想食牛油，完全冇落。如果唔怕脂肪太高，可以做曲奇皮，會好食香口好多。個餡料就唔錯，有香蕉、蕃薯同香料味，都幾特別架！

 

 

 

 

 

 

鹽焗雞 Baked Salted Chicken

我好怕整有頭有眼既食材，例如雞、魚，所以好少整，蝦係例外。又唔識斬雞，所以完全未整過全雞。

見惠康有斬好左冇頭既江豐雞，半隻一包，就買左一包。用半包鹽焗雞粉，想試整鹽焗雞。

我知道一開始就已經唔岩，因為隻雞已經斬左，雞皮焗完肯定會收縮，味道亦會流失，不過好過冇得整啦。

做法：將雞索乾水，落大約半包鹽焗雞粉，紹酒，海鹽，少少糖搽勻雞件，砌番好，醃佢兩小時。

用錫紙包好，放入焗爐用200度焗30分鐘，即可上碟。

個樣同味道都可以啦，不過雪雞點都冇得同新鮮雞比架喇。

牛油軟包兩食 Soft Butter Bread In 2 Styles

 

用麵包機整左舊牛油軟包粉糰，做左兩款麵包：

合桃牛油軟包三個

午餐肉薑粒蛋牛油捲兩個

今次跟足牛油軟包配方，落足牛油，有成湯殼(三份一杯)咁多。真係整過先知，麵包越香越軟滑越肥。

合桃牛油軟包用新鮮合桃肉，係原粒拍散取肉，用粉糰搓勻就得。

午餐肉用梅林歐盟午餐肉，煎香裁長片。再煎個薑粒蛋皮裁長片，用粉糰捲起就得。

我鍾意個合桃牛油軟包多D，好好食。不過唔敢多食。

不過一諗起粉糰入面成大殼牛油，就怕怕。

全麥淨包 Whole Wheat Bread

用麵包機搓揉麵糰，再自己整包，整左好多次，效果都係差唔多。

個包包好有份量，密度較高，包身較硬，同出面包鋪既鬆軟、密度低、包身輕既包包，差好遠。

主要原因我估係我未掌握好發酵時間同技巧。

不過自己整既又真係真材實料，冇添加古靈精怪既化學成分，又有咬勁，都可以接受啦。

芝士香腸麥包 Cheese Sausage in Wheat Bread

 

切開好似個月餅咁添！

之前買左兩包外國香腸，屋企食極都食唔完。

今日仍食剩兩條芝士腸，見幾耐冇開個個焗爐，於是就整左呢四個香腸麥包。

呢隻芝士香腸味道濃郁，油量高，幾肥下一個包用半條已夠。



食完一個包已經唔駛食飯啦。

 

焗葡汁雞飯 Baked Chicken Rice In Portuguese Style Sauce

新版yahoo第一個問題就係，中文字體大小一係就太細，一係就太大，冇左舊版大小岩岩好既字體。唔該執執佢啦！！

屋企又食剩成兩碗飯，整咩好呢？今日諗既就係整焗葡國(汁)雞飯。
查下資料，整葡汁都幾多功夫，又要買幾多材料，於是就偷懶，去超市買樽「葡汁」，都係13個幾，都算平。

再去菜檔買紅蘿蔔一條，薯仔一個，洋蔥一個，磨菇一包，去雪肉檔買左塊雞扒。
做法：
1) 雞扒醃好後切件，煎香煎至兩面金黃色兜起。

2) 原鑊爆香乾蔥頭，炒個蛋炒飯底，用焗碟盛起。
3) 爆香磨菇、洋蔥，炒至四成熟兜起。
4) 爆香適量葡汁，落紅蘿蔔、薯仔，加水煮至腍身。
5) 將雞扒、洋蔥、磨菇回鑊，同紅蘿蔔、薯仔一齊炆煮。

6) 調較葡汁至適量份量和濃度。

7) 將汁，料淋在飯面，放入已預熱200度焗爐內焗至表面焦香即成。

呢隻葡汁好夠味，材料調味時記得唔好太重手。