無殻茶葉蛋 Chinese Tea Soup Eggs Without Shell

茶葉蛋多數連殻整，我今次就剝咗殻先整，製成品似鹵水蛋，食時唔駛剝殻，啖啖肉！

煮蛋浸蛋嘅材料可以自由配搭，分量我冇定準，呢次用咗：大紅袍茶葉、八角、糖、鹽、鮮露、雞粉。

我嘅做法係先將蛋用水烚熟，再剝殻，然後先用汁料反復煮浸幾次，再放涼後放入雪櫃浸一日。可凍食，可翻熱食。

我試過用街市平價蛋同超市泰國蛋整，效果都一般，平價蛋冇質感，易散。泰國蛋冇香味。呢次用嘅係星加坡蛋，效果較好，口感實淨彈牙，味道較香。


  ***Please leave your feedback, thanks!***

肥哉廚房2013年之前六百幾個貼文載於「隨意窩」網站，觀迎光臨指教：http://blog.xuite.net/fatjoykitchen/hkblog 

節瓜煮沙白 Braised Hairy Melon And Clams

節瓜煮沙白，清鮮美味。煮出適量湯液，加落飯食有湯飯效果，相當開胃。



材料：沙白一斤20元。節瓜一個6元。少少冬菜（一包三元用去四分一包)。沙白先洗刷乾淨再浸水幾小時。節瓜切條。冬菜清洗乾淨除去雜質，用滾浸淡，瀝乾水分，加入熟油同糖撈勻。

先用薑片起鑊爆炒節瓜，贊水煮至三成熟。再加入適量水煮熱，落沙白加蓋煮至沙白爆口。

再煮一陣至沙白全熟，此時加入適量冬菜，略煮一陣即可裝大碗，灑少少葱粒，上枱趁熱開飯。

加入適量冬菜，更惹味。個人認為沙白不及沙蜆鮮美，口感也略遜。各位如試做此菜，可以沙蜆取代沙白。

***Please leave your feedback, thanks!***

粉絲津菜煲 Green Bean Thread And Vegetable In Clay Pot

天氣轉冷，今日整左個熱辣辣煲仔菜。材料非常簡單，買左斤「袖珍黃芽白」同一包粉絲，用金華火腿炆煮。

菜洗淨，粉絲浸軟。金華火腿切幼條，略為浸洗，連同薑絲爆香，爆至金華火腿出油。

先放入津菜仔煮至入味兜起。再放入粉絲加水炆煮。

粉絲煮至略腍身，此時可以校色調味，令粉絲索足味。

將調左味既粉絲放入陶煲內，再在四邊放入津菜。開個獻淋在上面，成煲置於大火上加蓋燒至姐姐聲至收汁，開蓋將粉絲同汁液撈勻即可上枱開飯。 

***Please leave your feedback, thanks!***

雪菜肉絲湯米 Rice Noodle With Preserved Vegetable And Shredded Pork In Soup

雪菜肉絲湯米(茶餐廳版)係平民食製。湯底係味精湯，只係用雞粉同鹽開。雪菜肉絲係預製，食時淋上面。如果有潮洲辣油，加少少仲正。

茶餐廳食而家連杯餐茶大約要25元，自己整可以整到一大煲。雪菜浸水減咸味，切粒，略為烘乾。肉絲醃好炒香，加入雪菜，紅辣椒，加水半炆炒。調味埋個多汁獻。

整左一大碗，可以當送送飯，送粥都得。

今日整湯米，煮個米粉底，加上適量雪菜肉絲連汁就搞掂。

呢一大碗足夠兩個人食，就係差左D辣油！

***Please leave your feedback, thanks!***

三洋傳統電飯煲＋煮飯巾 Sanyo Traditional Electric Rice Cooker + Rice Napkin

 

而家煮飯高科技日新月異，電飯煲動輒幾千蚊甚至萬幾蚊一個，唔知仲有冇人會珍惜呢種傳統鋁膽電飯煲呢？佢雖然舊，但係仲好用得架。

呢個三洋電飯煲係同條電線分體既，煲邊有個電線插位。呢個設計好過而家電線同個煲連體既好多。

 

呢種鋁膽煲煲飯會黐底，所以而家多數人轉用易潔膽。但係以前冇易潔膽，用煮飯巾就可以解決問題。不過我買唔到煮飯巾，只買到煲魚袋。今次拆開個大煲魚袋當煮飯巾試下。各位知唔知邊度可以買到煮飯巾呀？請指點下。

 

今次煮一杯米試下，先浸洗乾淨煲魚袋，墊在鋁膽內，再放入洗好既米，加水，照常㩒掣煮飯。

 

煮好飯保溫15分鐘，將煲魚袋連飯抽出。抽起成袋飯時，布袋有部分黐底，要用一隻手㩒住個煲先可以將成袋飯抽出。

 

將米飯用另一個兜裝起摷鬆，即可開飯。鋁膽冇飯粒黐住，易洗好多。



 

塊布就有不少米飯黐住，不過較易剝離，清洗容易好多。如果買到真正既煮飯巾，呢個煲就唔駛退役喇！

 

 

 

 

 

大同電鍋煲絲苗 Tatung Multifuntional Cooker

 

大家好！今日終於下定決心要寫返個Blog喇！2015年第一篇要用個新煲上場同大家見面。

 

 

幾個月前已留意到附近電器店有賣台灣的大同電鍋，一直都冇諗住要買。直至最近上網瀏覽文章，始知呢隻電鍋係台灣人家居廚房神器。

 

見佢個設計簡樸無華，而且色水大紅大綠，夠晒傳統，於是買左呢個我相信係「入門版」既黎試下。

 

呢個香港電壓220V版條電線係連住煲底，唔係台灣版本可以響煲邊拔出。條電線連住個煲，清洗同搬動或收藏都唔方便，唔知點解要咁設計呢？



 

大同電鍋應配蓬萊米，不過我食開絲苗，一於試煲下。用附件量杯量左兩杯米，按說明加水至內鍋刻度2，再響外鍋加一量杯水。

開始㩒制煲飯喇！呢個煲煲飯都幾「熱鬧」下，過程中外鍋水滾，會聽到內外鍋之間pet pet水聲，同內鍋被滾水衝擊至在外鍋內震動同移動既聲音。用開日式電飯煲第一次轉用呢隻電鍋，真係都幾「震撼」。煮到就水乾時仲會啪啪聲，但係仍未跳至保溫掣，當時真係啪到我有D驚，好彩最後佢都自動跳至保溫。相信係我未習慣，少見多怪而已。

 

保溫15分鐘後，摷鬆D飯，就係咁樣。飯煲得夠軟，效果都唔錯。我鍾意硬身少少，下次會落少一D水。

 

 

 



蝦米肉絲冬菇白菜煮旱藕粉絲 Braised Noodle Casserole With Dried Shrimp, Musroon, Pork Slice and Vegetable

早前裕華有個廣西農產品展覽，買左包「旱藕粉絲」放響廚櫃頂，一直冇理佢，今日睇睇原來八月已到最佳食用期限。於是當佢普通粉絲咁煮左呢碟。

我用左蝦米、肉絲、冬菇仔同少少切開既學斗白菜仔一齊煮。

包裝袋後有一大段介紹同做法說明，佢係芭蕉芋粉造既粉絲，同蓮藕其實冇關係。

質地比普通粉絲韌，有彈性，而且較耐煮。先用溫水浸軟，再爆香冬菇蝦米，加埋肉絲炒熟，再落粉絲加水加味料炆煮一陣，最後落埋白菜仔，收汁即成。

我呢碟煮得比較耐，粉絲比較腍身，如果想爽身有咬勁一點，可以早點上碟。鍾意多汁可以埋獻，我呢次想乾身點，冇埋獻。

雪菜肉絲冬菇蝦米新竹炊粉 Taiwanese Rice Noodle In Pork Mushroom Soup

響阿信屋買左一大包「新竹炊粉」，有十四個，今日用左三個，整左一大鍋湯米粉。

參考包裝說明，用左雪菜、肉絲、冬菇、蝦米做料。

個米粉幾有分量，質地好幼細。跟佢個做法，先爆炒材料，再落水煮成濃湯，再放入已浸開既米粉。

呢隻炊粉唔錯，口感軟中帶咬勁，轉轉口味，係唔錯既選擇。

臘味煲仔飯 Clay Pot Rice With Air-Dried Duck, Pork and Sausages



 

響就黎絕種既缸瓦鋪買左個瓦煲仔，想整番煲煲仔飯。

材料：臘腸兩條，臘肉兩塊，臘鴨一塊。絲苗米一碗。

工具：鐵線瓦煲仔一個，散熱板一塊。

做法：先洗米，浸米。沖洗乾淨臘味。瓦煲仔內櫳掃少少油，放入浸透既絲苗米，再加入一碗水。煲仔放在散熱板上，先用中大火煲滾，再改中細火煮飯。

煮到仲見到米水，但開始收水時放入臘味，加蓋。

再煮到聞到微微飯焦香時，熄火。

 

取出臘味，切好再鋪回飯面，加蓋局約十分鐘。

局完將飯同臘味撈勻就可以裝飯喇！呢煲飯其實唔駛再落豉油，臘味本身已夠味，且已滲入飯中，咁先至係原汁原味既臘味煲仔飯。

白汁龍脷柳 Braised Sole Fillets In White Sauce

   

整番煲白汁龍脷柳，可以獨立做送，又可以用黎做碟頭飯。

而家去平民超市買唔到龍脷柳，有既都係鯰魚柳，比較鞋。龍脷柳較滑，響街市檔口有賣，不過唔知係咪真係龍脷。

買左一包兩條，用鹽、胡椒粉醃過夜。另再買紅蘿蔔、洋葱、磨菇做配菜。

我既做法係咁：

紅蘿蔔切滾度，放入熱水煮至滾起，過冷河。

洋葱、磨菇切好，燒熱鑊落油，爆香。

龍脷柳切塊，撈少少生粉，泡嫩油。

跟住燒熱鑊爆炒紅蘿蔔，落埋魚柳塊，跟住再落洋葱、磨菇。

最後埋個白汁獻(麵粉、奶粉、水、鹽、糖）慢慢將所有材料同白汁撈勻，汁要比較多，煮至滾起即熄火，完成！