熟鐵鑊煎滾馬頭魚番茄湯 Boiled Fried Horse Head Fish With Tomato

熟鐵鑊幾十元就有一隻，方便易用，開好鑊就唔會黐鑊，佢含炭量少，唔會抹出黑色，比生鐵鑊乾淨。

今日就要試下用隻熟鐵鑊煎魚再滾湯，睇下效果係點。

買左一兜三條25元馬頭魚，加四個番茄。

先洗乾淨魚，用紹酒同鹽醃魚，放入雪櫃醃夠時間。

煎魚：燒熱鑊落兩片薑，再放入抹乾身既魚，煎香一邊，再煎另一邊。

隻鑊非常好用，完全唔會黐底，三條魚都係自動離底！

睇下煎得幾通透，而且唔會有黑色，煎完既鑊底油都冇黑色架。

跟住洗鑊再燒乾，放入清水或雞湯八碗，煮滾。放入馬頭魚，加蓋大火煮之。

約十分鐘開蓋，湯色已經轉奶白。此時放入切好既番茄四個，再加蓋滾十分鐘。

試味調味，完成！湯色微橙黃，唔會轉黑。幾十元隻熟鐵鑊，物超所值啦！

紫菜冬瓜自製肉丸湯 Purple Laver Winter Melon Home Made Meat Ball Soup

紫菜湯貼過一次 （http://blog.yahoo.com/_GTVKXK26JCKSEBAIIJPTGF4PU4/articles/1001628 ），今次再整，做法唔同。


材料：紫菜兩餅，白冬瓜一斤，(鯪魚滑10元，絞碎半肥瘦豬肉20元，呢兩樣只須用三分一份量)。



做法：
1) 紫菜洗淨瀝乾水，留起半碗後用。
2) 冬瓜去核省乾淨皮面白霜，切片。





3) 鯪魚滑同半肥瘦豬肉撈勻，落調味(鹽、糖、豉油、胡椒粉、酒)加一隻蛋，搞至起膠，再撻生魚咁撻十幾下。整好之後睇唔出混入左魚肉架。



4) 煲滾水，先落冬瓜紫菜，滾三十分鐘至一個鐘，令紫菜味全出，冬瓜全腍。
5) 將紫菜冬瓜湯過濾，變成清湯。



6) 另外，煲滾水，用手將魚肉豬肉膠(jit)成肉丸，逐粒放入滾水中，滾至浮面，將肉丸放入凍水中過冷河。



7) 將紫菜冬瓜清湯煲滾，加入肉丸，再煮滾，調味。
8) 最後加入先前留起既紫菜，即可上枱！



呢個做法紫菜味特濃。



肉丸口感唔錯，後下既紫菜又有咬感，冬瓜又清潤，正！

鹹肉絲瓜豆腐魚尾湯 Salted Pork Dice Silk Melon Bean Curd Fish Tail Soup

呢個湯有鹹肉味，又有魚鮮味，又有絲瓜既清甜，好好味，大家有時間可以試下。



材料包括：
1）大魚尾一條14元
2）豆腐一塊3.5元
3）絲瓜半個
4）金華火腿三片
5）薑片適量

半肥瘦鹹肉半舊，切大丁。絲瓜半個批皮切條。大魚尾洗淨抹乾水，放落用薑片起鑊既熱油鑊，慢慢煎至兩面微焦香。



將煎魚尾既油全部「秘」出，放入金華火腿，倒入滾水淹過魚尾面，加蓋先滾約二十分鐘。



再加入豆腐同鹹肉丁，再加蓋滾約二十至三十分鐘。



最後加埋絲瓜條，加蓋滾五分鐘。調味即成。



湯渣都唔好嘥，魚尾仍然鮮美，點靚豉油好好食。

紫菜魚蛋湯 Purple Laver Fish Ball Soup

早排本地遊貪得意賣左包紫菜，浸少少已經發出好大碗，食極食唔晒。



今日浸一個，已發起裝滿成湯碗。最簡單做法就係滾個紫菜魚蛋湯。



而家街市檔既魚蛋一D都唔平，10粒要21元，而且都係麻麻地。

紫菜都幾靚，一D沙都冇。用個雞湯底黎滾，落少少芫茜蔥就滾出一大鍋。



湯味清鮮，魚蛋彈牙，紫菜夠味煙韌有咬勁，都幾特別。

白瓜黑木耳肉絲清湯 White Melon Black Fungus And Shredded Pork Soup

再滾個湯：白瓜黑木耳肉絲湯

材料：白瓜一個，白背黑木耳兩朵，脢頭肉絲適量。

做法：

脢頭豬肉選腍軟較瘦部分切成絲，醃好至入味，先用大滾水出水清去渣滓，撈起沖乾淨水。咁樣出過水，一陣滾個湯就會好清，唔會濁。

白背黑木耳浸軟，也在滾水中拖拖水，洗淨去硬頭，然後切幾絲。

白瓜切薄片。

一切預備好後，煲滾一煲水，落兩片薑，先放入黑木耳同肉絲滾十五分鐘，再放入白瓜片，再滾十五分鐘，調味即成。

呢個湯清甜好飲，木耳爽脆，仲好有益添！

 

豆腐生菜魚球湯 Bean Curd Lettuce Fish Ball Soup

再整個湯。滑豆腐一塊三元切碎，放入一鑊大滾水中，加油鹽薑片滾一陣。

鯪魚膠用匙羹逐羹逐羹筆入湯中，做成魚球。再滾起滾十五分鐘。

調味。如果想好味D，可以用雞湯底滾呢個湯。

碗中放生菜絲，將滾湯用料倒入碗中，將生菜絲灼熟即成。

 

 

 

蛋湯 Egg Soup

呢個蛋湯又係童年回憶。做法簡單到無可再簡單，但係個湯蛋香濃郁，非常好味。

以前阿媽要返工，我地仲細，放工之後阿媽仍然要煮飯炒菜，要做出快、靚、正既菜式，真係唔容易。呢款蛋湯就係佢拿手好戲之一。

簡簡單單，回味無窮。

材料：雞蛋三隻，薑粒多量。

做法：打勻三隻蛋，落較多鹽調味並作為湯底既味道，加入薑粒，再打勻。燒熱鑊，落少少油，倒入蛋液煎炒至兩面金黃，用鑊鏟將蛋切碎。

此時倒入熱水，熱水入鑊混合蛋片即煮滾，加蓋滾至湯液成淡黃色。

調味，趁熱飲。

 

金銀魚球魚尾豆腐湯 Double Fish Balls Fish Tail Bean Curd Soup

鯇魚尾一條13元，洗淨抹乾用薑片起鑊煎香備用。

鯪魚肉10元，揑成魚球，一半煎香至金黃色備用。

布包豆腐一塊切長粒備用。

用瓦煲落兩片薑煲滾水，放入已煎香之魚尾滾半小時以上。

半小時後，放入金銀鯪魚球，再用中火滾半小時以上。

半小時後，放入豆腐粒，又用中火滾十五分鐘。

調味，灑上葱粒趁熱飲。魚尾可以起點豉油食。

備註：如果想濃味D，可以用淡豆漿做湯底，或者先落一塊豆腐煲個湯底。

 

絲瓜蜆肉湯 Silk Melon Clam Meat Soup

蜆一斤。絲瓜一個。


將蜆浸洗乾淨，然後放深碟上先蒸熟取肉，保留碟內的蜆汁。


將蜆汁過濾入煲，加水，落兩片薑，煮滾。
絲瓜刨皮，切滾度，放入已煲滾既蜆水內，落少少油。


絲瓜滾後，落蜆肉，再滾起，調味即成。

苦瓜魚片湯

苦瓜兩個12元。鯇魚肉一條10元。蜜棗兩個。杞子適量。

做法：

苦瓜一個切片，另一個用攪拌機加水攪碎，過濾後得苦瓜汁兩杯。

魚肉切片，落少少油、鹽醃勻。然後放落滾水內拖一拖撈起瀝乾水備用。

先滾個湯底：可以落雞湯，或者清水四杯(加鹽、雞粉調味)，蜜棗兩個，薑片適量，魚片一半，滾15分鐘。

再滾苦瓜湯：此時倒入兩杯苦瓜汁，加入苦瓜片，再滾15分鐘。

最後落杞子(已浸軟洗淨)，滾一分鐘，調味。

湯碗內置魚片，傾入滾湯趁熱飲。

此湯苦中帶微甜，味道幾特別架。