小紅腸鯪魚膠煎釀脆豆卜 Pan Fried Stuffed Beancurd Puffs With Small Red Sausage And Minced Dace Paste

今日買了鯪魚膠，本來想整肥哉版魚蓉燒賣，點知買唔到燒賣皮，結果買了豆卜。鯪魚膠釀豆卜整過好多次，今次一於搞搞新意思，加埋兒時回憶小紅腸，實行雙料釀脆豆卜。

十元豆卜有十六粒，一開二共有三十二件。十元鯪魚膠足夠釀有多，今次加埋小紅腸，鯪魚膠用量更少，可以留起一部分整另一個餸。

我用兩條小紅腸，剪成三十二個小圓片，先同青豆落鑊贊少少酒爆炒一陣，去除青豆草青味，上碟備用。另外，鯪魚膠加一隻蛋，少少胡椒粉，落適量粟粉攪勻，攪至再度起膠為止，放入雪櫃備用。加蛋可將魚膠濃度稀釋，令魚膠更軟更香滑。

之後在開邊豆卜釀入一片小紅腸，再封上魚膠。一共做咗三十二件。

今次試用海鮮醬做汁，加入少少蠔油。

將豆卜先魚膠朝下煎至微焦黃，慢慢贊水將魚膠煎熟，收水。再反轉將豆卜皮慢慢煎香煎脆。我今次唔用炆法，目的係要整個豆卜外脆內軟。煎至脆度焦度啱心水後，上碟。

用海鮮醬同蠔油加入青豆紅椒粒埋個甜中帶咸香又微辣嘅濃獻，可用碗裝起另上，也可淋在碟邊。

豆卜脆皮香口，釀餡有鯪魚有小紅腸，點微辣海鮮醬汁來吃，口感同味道都豐富有層次。好味！有新鮮感！真係食到唔停口呀！我肥哉推介，大家一定要試下。

檸汁花椒煎黃魚 Fried Yellow Croaker With Sichuan Pepper And Lemon Juice

黃花魚肉厚嫩滑，骨少，無論煎、炸、蒸、炆都好好味。今次我用檸檬汁、鹽加少少花椒粒做主要醃料，整咗呢碟檸汁花椒煎黃魚。

煎好上枱開飯，斬下眼成條魚食剩棚骨！

材料好簡單：買咗條一呎長黃花魚，27蚊。一個檸檬、少量花椒、鹽、糖。

黃花魚必須處理好，將肚內黑膜完全清除，通常街市魚販都唔會清乾淨，買返屋企一定要清走晒所有黑膜同殘留的內臟同紅啡色嘅血塊。清除乾淨後如上圖所示。

此時加入較多的海鹽同鮮檸檬汁將魚搽勻，再將檸檬碎放入魚肚內。（我冇落紹油同薑，唔想味道太複雜。）

灑上適量開邊花椒粒，再落少少糖平衡下鹹酸味。將魚用保鮮紙包好，放入雪櫃最少醃半日，最好醃過夜。

醃至入晒味後，用廚紙徹底將魚內外索乾就可以煎。我用既廚具係區利昌生鐵鑊，燒熱加較多油。油熱後放入黃花魚，轉中小火慢慢煎。要煎至魚身變硬定型先可以轉動條魚。

將魚反轉再煎，煎至兩面金黃色，聞到香氣四溢！

煎幾耐、煎幾燶無定準，隨個人喜好。煎至合心水焦度，瀝乾油就可以上碟喇！

嘩香噴噴，趁熱開飯喇喂！

***Please leave your feedback, thanks!***

干燒明蝦 Pan-Fried Tomato Garlic Prawn

2016新年快樂呀！飲和食德身體健康呀！今日一月一日等我整番碟嘻哈大笑「干燒明蝦」賀一賀佢！



時間關係，一於用懶人造法，買包「干燒明蝦醬」代勞。加埋八隻冰鮮藍海蝦，就係咁簡單。

海蝦洗淨，修剪觸鬚、頭上尖刺同蝦腳，索乾水，邊煎邊贊酒，燒至八九成熟。

此時加入「干燒明蝦醬」，快炒收汁至蝦殼有乾脆感即可上碟開餐。

新年伊始，再次恭祝各位豐衣足食，日日開懷大嚼！

***Please leave your feedback, thanks!***



鱆魚豬肉釀豆卜 Stuffed Beancurd Puffs With Minced Octopus And Pork

魚肉釀豆卜食得多，今日自已剁鱆魚豬肉釀豆卜變變口味。豆卜買左四两，要九元。鱆魚係取自用來煲湯既鱆魚乾，剪左五份一隻就夠。

微肥瘦豬肉(二十元用左半舊)剁碎，加入鱆魚粒再剁。加調味，撻至起膠，醃一小時以上，之後撈入粟粉，再釀入開邊豆卜內。只須釀入少量豬肉即可。有剩可以另行蒸肉餅。

先將釀好既豆卜蒸幾分鐘至豬肉八成熟豆卜軟身。再將豆卜放入鑊煎香，煎至微焦黃。再逐少逐少贊水加蓋半煎煮，好似煎鍋貼咁。

煎至收水，豬肉全熟豆卜腍身，再加少少紅蘿蔔片同白芝麻（冇落麻油咁搶味)，再埋個老抽獻至豆卜完全吸收汁液，即可上碟。

豆卜每粒飽含肉汁，好味道！ 如果鍾意多汁，可以自行調校。

***Please leave your feedback, thanks!***

清煎韓國鯖魚(馬鮫) Pan Fried Mackerel

響屋仔買左包韓國半邊低鹽醃鯖魚(馬鮫)，用黎清煎試下。所謂清煎即係乜都唔添加，因為條魚本身已係low salted。

用平底鐵鑊煎至兩面香黃即可上碟。



我覺得非常正，鹹味岩岩好，真係完全唔駛加任何調味料，清煎已經好好食！

感覺有少少似煎日本鯖魚，煎至甘香骨軟可食，佢冇日本鯖魚咁多魚油，冇咁「漏」，味道則各有特色。 

  



煎帆立貝 Pan Fried Scallops

今日響「屋仔」買左一包冰鮮日本帆立貝，一包有十幾粒，用左六粒，用黎做個簡單清煎。



帆立貝包裝前已經處理過，保留群邊，有人連群邊都唔要，只要中間粒肉柱。我今次自然解凍後，只做了少少清洗，摘去污物，仍保留群邊，徹底索乾水，再落少少海鹽同黑胡椒粉稍為醃一醃。

準備好後，用隻Lodge鐵鑊，燒熱油，放入帆立貝乾煎，煎至兩面金黃即可上碟。



碟上用少少檸檬、甘筍條、火龍果粒做襯托。再在碟邊加上少少薄汁(魚露、糖、檸檬汁、橄欖油)，灑上少少檸檬皮就完成喇！

我知有人煎帆立貝唔會煎至全熟，我呢D係冰鮮較平價貨色，唔想帶生食，所以煎至全熟，群邊較硬「鞋」，粒大瑤柱就幾好味，唔錯。 

煎老少平安豆腐 Fried Tofu Cake

 

街市豆腐又加左價喇，而家要四元塊。買左兩塊，再買十元鯪魚膠。加埋蝦米、少少陳皮同葱，又整老少平安。見材料好多，於是分成兩半，一半用黎蒸，一半就做左呢碟煎老少平安豆腐。唯一唔同就係煎呢碟落左粟粉。

 

 

陳皮蝦米浸好剪碎，加少少薑粒、胡椒粉，同埋魚膠搓入豆腐中，調味，放入雪櫃雪一個鐘。

 

 

燒熱鑊，放少少油，將豆腐一份份放入壓成餅狀，用中火煎至兩面金黃色即可。

最後埋個喼汁獻，稍煮一煮至收汁，上碟！

 

 

煎老少平安豆腐餅，外面香而有咬勁，裏面軟滑。有益、美味又便宜，久唔久轉下口味同做法，都唔錯架！

 

 

 

 

 

香草煎狹鱈魚柳 Fried Pollock Fillet

去超市見到有急凍狹鱈魚柳，一包四塊，買左一包試下。

只用簡單香煎法，魚柳解凍後，落少少奧勒岡葉碎，鹽、紹酒、醃透。

用平底易潔鑊中慢火煎香，再炒少少西芹埋個獻汁淋上面，就可以上碟。

呢款狹鱈魚肉質較硬，冇銀鱈魚咁軟滑，油脂也較少。

其實整時我已經諗起「柴魚」，質地有少少似，味道冇乜驚喜，尚算可以啦。

 

 

 

 

紫番薯蓉鯖魚餅 Purple Sweet Potato Paste Mackerel Cake

買左四個紫心番薯，本來諗住就咁蒸黎食，點知蒸完要出街唔得閒，放左入雪櫃。心念一轉，不如搞搞新意思，整個番薯餅啦。

將四個番薯搓爛，加入葱花、俄勒岡葉撈勻。

再煎香條鯖魚，拆肉。將魚肉撈入薯蓉，加入亞麻子碎，胡椒粉，檻欖油，鹽調味。

用慢火煎香，上碟，灑上葱粒紫洋葱粒，搞掂。



鯖魚本身有豐富魚油，呢個番薯餅唔駛落太多油煎，否則吸油會太肥膩。