肥哉簡易版牛雜粥 Beef Offal Congee (Fat Joy's Simplify Version)

 

一般住家很難自製牛雜粥，但係想食牛雜粥都唔使專登過澳門嘅。我肥哉今日就試整個簡易版牛雜粥滿足一下好奇心同食欲。

材料好簡單，去港式或潮式粉麵店買一碗牛雜麵，吃掉牛雜湯麵，將牛雜留起用來煮粥。我幫襯嘅一間平民麵店一碗牛雜麵30元，牛雜都唔少，共有四款：牛肚、牛腸、牛肺、牛膀，足夠煮一大碗牛雜粥。

牛雜已有，現在只需煲一個粥底就可以「熟滾牛雜粥」！我用陳皮同一小塊當歸煲粥，取其香味同中藥香氣。

將陳皮當歸粥底煲到綿，就可以放入已剪成小塊嘅牛雜再「熟滾」約五分鐘。

滾至牛雜出味，再按個人喜好調味，加少少胡椒粉或薑絲，就可以上碗，灑上葱粒，香氣四溢肥哉簡易版牛雜粥就煮好喇！

上圖係一隻細湯碗，唔係飯碗。一碗牛雜麵嘅牛雜分量足以煲一細湯碗約兩飯碗牛雜粥，睇下幾多料：

好味，和味！好滿足！大家有興趣可以一試！

蛋蛋魚片粥 Double Eggs Sliced Fish Fillet Congee

蛋蛋者，鹹蛋+皮蛋之謂也。今日唔食飯，用一隻鹹蛋一隻皮蛋煲魚片粥，加生菜底。

我嘅做法係：先煲好個粥底，有好多選擇，例如陳皮白果粥底，瑤柱粥底，雞湯粥底等等。然後將烚熟鹹蛋一隻，皮蛋一隻剪碎，放入粥底中再煲至兩種蛋粒都開始融化。

跟住就係生滾魚片粥，將滾粥倒入已鋪了生菜絲嘅碗內，趁熱拌勻，即成呢碗「蛋蛋魚片粥」喇！

節瓜海味四大天王湯 Hairy Melon Dried Seafood Soup

呢個湯用節瓜用乾海味煲，冇落肉，冇落雞腳之類。真係海味湯。

海味包括：鱆魚、螺頭、淡菜、瑤柱，共「四大天王」。另配以：漳洲雪耳、冬菇、花生、南北杏、蜜棗、陳皮。

用本地節瓜，我用咗個半，留返半個可用嚟整味節瓜炒蛋。

出動埋個紫砂煲！添加入廚樂趣！

***Please leave your feedback, thanks!***

北芪金雞粥 Radix Astragali (Beiqi), Jinhua Ham And Chicken Congee

呢個粥個名夠晒正！我要攞注冊商標。金雞粥者，金華火腿鹹雞粥之省稱也。個名起得好，煲同食都開心D！

材料：北芪幾片，陳皮一塊，金華火腿一塊，醃過夜去骨鹹雞約半隻。



先洗淨金華火腿，出出水，再用火腿、北芪、陳皮先煲好一個粥底。食前加入鹹雞肉，煲滾轉中小火「煨」一陣至雞肉出味，即可裝碗享用。

食時可在碗底鋪上生菜絲，倒入滾粥，再灑少少葱粒，幾條薑絲。金華火腿鹹香加埋雞香，呢個肥哉版金雞粥都幾滋味㗎！

***Please leave your feedback, thanks!***

清補涼糖水 Ching Po Leung Sweet Soup

清補涼湯飲得多，清補涼糖水係第一次煲。買左包清補涼，包裝後面提及可以煲糖水，一於試下。

呢包野係中國特產蝴蝶牌，但係響香港包裝，響藥材鋪見到，十五元一包。

包裝內既桂圓肉同薏米都係用膠袋獨立包裝。浸洗三十分鐘之後就可以煲得。我先煲薏米以外既材料，煲至蓮子開始腍身先落薏米，再煲至薏米剛腍就差唔多。

調味用黃冰糖，多少隨意。

煲好熱飲又可以凍飲，但攤凍之後個糖水變得較杰身。如果想放入雪櫃雪凍飲，煲時要加多一倍水。

***Please leave your feedback, thanks!***

淡菜節瓜瘦肉湯 Dried Mussels Hairy Melon Lean Pork Soup

早前買左一大包淡菜，用咗一次，放入雪櫃就唔記得咗，今日拎番出黎，煲咗個淡菜節瓜瘦肉湯。

仲加埋好多配料，有薏米、花生、沙蔘、南北杏、陳皮同百合。一齊洗乾淨，浸半個鐘。

瘦肉少少就夠，呢度二十元瘦肉用咗半舊，切厚片。另外兩個節瓜，我擦左D毛，連皮煲。用左個半節瓜，留番半個可以用黎炒蛋或者煮粉絲蝦米都唔錯。

煲滾水，將材料放晒入去，大火煲滾再轉中細火，煲兩個鐘已經夠晒火候，調味就飲得！

今次節瓜連皮煲，所以個湯帶微綠色，淡菜帶少少鹹甘味，節瓜腍軟，全部湯渣都食得唔好嘥！

***Please leave your feedback, thanks!***

碭山梨雞骨草南北杏排骨湯 Pear Pork Rib Soup

各位大家好嗎？呢個幾月佔中佔到社會撕裂，整左野都冇心機貼上黎，成個十月都冇貼文喇！

呢排好多種梨可以在街市買到，其中有一種其貌不揚，外皮粗鞋既叫碭山梨，12元買左3個，加埋少少乾雞骨草、南北杏同排骨，煲左呢個湯。

三個梨其中一個大到好似沙田柚咁，大過隻食飯碗。三個梨批左層粗皮，內面其實係爽甜既梨肉，真係梨不可以貌相。

將梨、南北杏、雞骨草、排骨全部掉晒入煲內，煲到夠火候就掂。

個湯甜到不得了，落鹽平衡下味道，非常正。煲完湯既梨肉出奇地軟滑清甜，夠晒滋潤。每人飲一碗就好，飲太多可能吸收太多糖份。

***Please leave your feedback, thanks!***

  

百合綠豆沙(樽裝夏枯草湯底) Dried Lily Green Bean Sweet Soup (Spica Prunellae Drink Base)

上次買既綠豆未食完，今日煲埋佢。試下用百合陳皮煲。另外用兩樽夏枯草水做湯底。

呢個綠豆沙夠晒清熱，大熱天時岩晒。不過寒底既人就唔好飲太多喇。

綠豆先用清水煲散，臨煲好前先加入夏枯草水再煲至成沙。

我落左兩樽，煲好試味，唔駛再落糖，已經夠甜。味道有特色，相當唔錯！

北芪眉豆柴魚花生豬骨粥 Dried Milk Vetch Root, White Bean, Bonito Stick, Peanut and Pork Rib Congee

柴魚花生豬骨粥煲得多，今次落多兩樣料：北芪同眉豆。煲出黎碗粥又綿香，風味獨特。

豬骨我用左排骨頭，用鹽醃過夜，出水去除碎骨。眉豆、花生洗淨。柴魚、北芪浸軟，撕開剪段。

預先已煲緊粥底，將所有材料加一片陳皮放入，煲至粥綿，調味即成。

好味道，成大煲粥唔駛三兩下手勢就清晒！



淮山桂圓綠豆沙 Dried Yam Slices, Longan and Green Bean Sweet Soup

呢盅綠豆沙加左淮山片同桂圓肉同煲，可以中和綠豆既寒涼！

材料：綠豆(性寒)、淮山(性平)、桂圓肉(性溫)、陳皮各適量。

綠豆可以先浸透，可以更快煲成沙。將所有材料加入煲內，大火煲滾再轉中火煲至淮山綠豆化開。

淮山同桂圓肉可以剪碎，再混和煲至濃度適中，加糖調味即可享用！

 

淮山桂圓綠豆沙 Dried Yam Slices, Longan and Green Bean Sweet Soup

 

綠豆性寒，用性溫既桂圓平衡下，加埋性平既淮山，令呢盅綠豆沙更加平和、深厚。

 

做法細節請各位光臨肥哉廚房「隨意窩」啦！

http://blog.xuite.net/fatjoykitchen/hkblog/232620065

 

肥哉廚房2013年之前六百幾個貼文載於「隨意窩」網站，觀迎光臨指教：http://blog.xuite.net/fatjoykitchen/hkblog

 

 



黃瓜節瓜扁豆排骨湯 Old Cucumber, Hairy Melon, Hyacinth And Aduki Bean Pork Rib Soup

老黃瓜同節瓜都係煲湯既上佳材料，今次試下雙瓜合璧，加埋雙豆：扁豆同赤小豆，用黎煲排骨頭。

老黃瓜連皮，節瓜去毛也連皮煲。排骨頭出水。扁豆赤小豆洗乾淨。加埋紅棗同陳皮，所有材料放入大煲內，加水煲三個鐘。

三個鐘後就煲成咁↓，雙瓜差唔多溶晒。

湯渣好食，扁豆夠腍，一定要飲湯食渣。