大地魚乾(方魚)

大地魚，又稱方魚。呢條係響街市檔口買既大地魚乾，5元。

甜梅菜肉碎蒸茄子

梅菜、豬肉、茄子呢三樣野好夾架，用黎清蒸相當唔錯。

料：矮瓜(茄子)一個2元。半肥瘦豬肉(我要多D瘦)絞碎20元(用一半已足夠)。惠州甜梅菜適量。葱、薑片、蒜片適量。如果食得辣，加一隻指天椒仲正。

準備：

1 甜梅菜徹底洗乾淨去沙，用清水啤水幾次，再落一茶匙鹽浸一陣備用。

2 豬肉調味，落糖、豉油、醃一小時備用。

3 茄子切度浸鹽水備用。

4 甜梅菜切粒、薑片切絲、蒜頭切片、葱切粒，加多一隻指天椒切絲備用。

做法：

1 豬肉落鑊贊酒炒熟。

2 平底鑊一隻燒熱欖油，將茄子皮向下放入半煎炸至半熟。

3 茄子沖水洗去多餘油份，瀝乾水，放入碟內，加入薑絲、蒜片，再鋪上肉碎同甜梅菜，隔水大火蒸8分鐘(水滾計)。

4 蒸好上檯，加入適量豉油、落葱粒、椒絲即可享用。

 

大豆芽菜炒豬腸

整番味經典懷舊菜壓下場先。。。

料：大豆芽菜斤半9元。鹵水豬大腸兩條24元。韭菜、紅椒適量。

做法：

1 用鹵水豬大腸係懶人做法，如果有時間唔怕麻煩，可以用番新鮮豬大腸，不過有排搞。

2 用清水徹底沖乾淨豬大腸，剪段，用水加兩茶匙白米醋浸一陣備用。

3 白鑊加薑片烘炒大豆芽至乾身。

4 大火爆炒豬大腸至表皮金黃色，加入韭菜粒、椒絲，贊小小玫瑰露酒，再將大豆芽回鑊，調味埋獻至收汁即可上碟。

好好味架！不過大豆芽同豬大腸都幾難消化，要慢慢食，慢慢咀嚼，嗒真d味道。

蝦子貓麵

筍片豆腐大魚尾湯

料：大魚尾兩條20元。罐頭筍9.5元。豆腐兩塊6元。

做法：

1 筍切片/條，浸鹽水備用。

2 先用一塊豆腐，切細粒備用。

3 筍片用白鑊烘乾，連同豆腐粒放入煲內滾出湯底。

4 薑片起鑊煎魚尾，只須略煎，放入湯底內同煲至湯奶白色(可加入胡椒粉)。

5 將湯隔渣後倒入另一煲內，放回筍片及另一塊豆腐(切片)，再滾10分鐘。

6 調味，上湯盅，加入芫茜、葱趁熱享用。

D湯渣撈出黎點豉油食都唔錯架。

補記：都幾好味啦。如果落幾片鹹火腿做湯底，加D鹹鮮元素，可能會更正，下次試下先。

粉彩綠地洋蓮豆芽英子蝙蝠長壽提樑壺

全壺綠紅搭配，色澤濃麗，別饒風味。以日用粗瓷而論，壺體之造圖可稱精細。

上湯瑤柱蝦子蝦蓉麵

上環安X麵，款式甚多，麵餅造得好幼細四正。買左一款「上湯瑤柱蝦子蝦蓉麵」，59元一斤，大約有十二個。店員仲幫我即場做埋密封包裝，正！

外賣揚州炒飯

南XX外賣揚州炒飯一碟，35元。師傅炒得幾好手勢，飯粒入味，夠乾身，又唔油膩。岩我胃口！

懷舊食品包裝之：衛生麪

紅磡有間張X記粉麪廠，呢款「衛生麪」，無論個名同包裝，都好懷舊。呢種包裝唔知仲可以維持幾耐呢？食法都幾多架，冷食落菓汁，都幾新潮喎。

衛生麪個麪字係錯字黎。不過可能仲值錢呀。

蝦膏椒絲炒通菜

真係普通過普通，不過就係普通，先至經典啦。

大澳買既蝦膏兩片。通菜一斤8元。紅椒兩隻。蒜頭、薑適量。

鑊：要用不鏽鋼鑊，如用鐵鑊，通菜更易變瘀色，連汁都會變黑架。

炒：

1 燒熱油鑊，放入蝦膏、薑絲，壓散蝦膏爆香，落蒜頭兜勻。

2 落菜用大火快炒，落椒絲炒勻上碟(睇下D菜幾綠，仲未變瘀架)。

上碟後。。。通菜始終都瘀左少少，要扣分。

生鐵煲啫啫雞

料：雪雞扒一塊8元。紅、青燈籠椒，洋蔥共10元。

煲：生鐵煲一個。

做法：

1 切好燈籠椒、洋蔥。薑絲、豆豉適量。雞扒切件用糖、鹽、楜椒粉、酒醃一小時以上。

2 燒熱生鐵煲，落少少油，爆香薑、豆豉、碎洋蔥，再落雞。加蓋用大火燒至雞件開始熟。

3 加入燈籠椒、洋蔥，撈勻再加蓋大火燒到啫啫聲。

4 開蓋，贊酒、埋獻兜勻，再大火燒至獻汁收至適度即成。

 

粉彩紅地洋蓮豆芽英子蝙蝠長壽瓷蓋杯

傳統石榴紅粉彩瓷蓋杯，色澤濃麗而不失典雅。蝙蝠寓意「有福」，杯身杯蓋暗嵌呈長形的「壽」字圖案四枚，含蓄有致。雖屬日常粗瓷，亦足堪玩味。