美心雙黃蓮蓉月餅

美心今年既月餅盒設計值得一讚，呢款雙黃蓮蓉月餅個盒係深桃紅色，我覺得仲有氣氛、仲靚過雙黃白蓮蓉個盒。於是今年就要食黃蓮蓉喇！

鹹魚魷頭炒白瓜

行街市見到有白瓜賣，買左兩個七元。屋企岩岩買左條梅香馬友，用少少黎炒。仲落少少魷頭，好夾味。

白瓜去囊切條浸鹽水。魷頭浸水剪去硬物(眼)。鹹魚只需一少片，剪粒。中意食辣可以加多一隻指天椒仔。

先用薑鹽爆炒白瓜至六成熟，上碟備用。

再爆香鹹魚粒，落魷頭炒熟，再將白瓜回鑊。

最後埋獻加指天椒收汁上碟。

白瓜清爽，鹹魚魷頭濃香，呢個配搭唔錯架。

 

金腿伍仁月餅

阿爸話中意五仁火腿月餅，佢話好食過雙黃蓮蓉。今年見到心心出左幾款六個裝既特別版月餅，個餅盒設計幾靚，色彩鮮明，仲中英對照，可能係要做外國人生意掛。
買左盒金腿五仁月，口感既煙韌又爽脆，味道鹹中帶甘，甘中有甜，都算唔錯啦。

梅香馬友鹹魚

行左去西環海味店買左條梅香馬友鹹魚，23吋長，152元。

 

 

街坊餅鋪傳統六黃蓮蓉月

中環有間燒臘店既六黃蓮蓉月餅，夠晒份量，傳統舊裝，好經典！仲有款九黃蓮蓉，成個生日餅咁大，可惜冇影到。

 

葛菜排骨生魚湯

葛菜水湯料一包以前買落，唔記得幾多錢。排骨頭24元，生魚一條15元。另加羅漢果一個8元。

拆開個湯包，見個羅漢果仔咁細，都估到個湯唔夠羅漢果味。

排骨頭出水洗淨，生魚洗淨煎香，湯料浸水洗淨。

全部放入煲先大米後文火煲三個鐘。

將湯隔渣，落鹽調味。試味真係唔夠羅漢果味，於是再另加大約八分一個羅漢果慢火煲至出味。

加多左羅漢果，個湯甘甜好多。可以保留排骨點豉油食。

 

羅漢果

街市普通羅漢果，8元個。

色澤溫雅，果味幽深；餘韻留香，令人神遠。

中秋豬籠餅

中秋餅食下欄野之豬籠餅，又名豬仔餅。

左起：蓮蓮、奇奇、榮榮

 

 

清蒸蘇鼠斑

吳松街金金出品，條魚唔講得上超級鮮甜，不過都算OK啦。

小乳炒通菜

吳松街金金出品，色水幾靚，炒得靚過庸庸。

銀山砵酒桶蠔

吳松街金金既銀山砵酒局桶蠔。用張錫紙包住黎局，打開之後似唔似「銀山」？幾好味。

招牌雲英雞

吳松街金金既招牌雲英雞，呢個例牌好袖珍。右邊有幾舊海蜇伴碟。

粉彩白底瓜蝶日用瓷之：瓷碟

粉彩白底瓜蝶日用瓷之：瓷碟

直徑十吋半。

黎個中央近鏡

煲底豬皮

好食過晒D雞手鴨腳，皆因入晒味！

雞手鴨腳煲(豬皮底)

整呢個煲都幾大工程，要分三部分進行架。

料：雞全翼4隻11元。鴨腳10隻13元。豬皮一塊15元。潮州鹵水汁三分一樽。陳皮、八角、薑片、蒜頭適量。

準備：

1 雞全翼解凍後，落糖、豉油、酒(可落多D)、薑蓉醃起碼一小時。

2 鴨腳洗淨出水，剪除指甲備用。

3 豬皮啤水啤乾淨，再出水，剪成長方塊備用。

做法：

1 燒大滾水，放入雞全翼滾8分鐘，然後熄火浸8分鐘(水要全部蓋過雞翼)，過冷河沖淨潺渣上碟。

2 用瓦煲煲滾大半煲水，倒入鹵水汁，加兩粒八角、一片陳皮、兩片薑片，放入鴨腳轉文火炆起碼四小時至腍上碟。

3 豬皮楂乾水，起油鑊，落薑、蒜頭、鹽爆香，再落豬皮爆炒上碟。

下圖：雞翼已浸至九成熟。鴨腳已炆四小時以上至腍身。豬皮已爆炒。

4 用乾淨瓦煲底薄掃一層油，鋪上豬皮打底，然後整齊排入雞翼、鴨腳。加入兩碗清水，蓋蓋用文火炆到水滾。

5 準備蠔油獻：蠔油三湯匙、糖兩茶匙、生粉兩湯匙(生粉不能太少)、老抽適量，用兩湯匙水開勻。

6 瓦煲水滾，開蓋倒入蠔油獻，輕輕搞勻，再蓋蓋文火炆至收汁即成。

按：(1) 雞翼同鴨腳用唔同方法整熟，可以增加色水對比，如果同用鹵水汁煮，色水一樣，個煲既賣相就會單調。 (2) 鴨腳一定要炆到腍，唔係唔好食，但係雞翼最忌炆得太耐，皮爆肉鞋。所以最好浸至八九成熟最後先入煲炆。

豉油王乾煎大蝦碌

簡單無技，只要蝦靚就得。用活海蝦當然更好。除左靚豉油，完全唔駛落任何調味料。

料：冰鮮大海蝦四隻。頭抽。薑片。

做法：

1 大蝦洗淨。修剪一下。去腸。抹乾水。

2 燒熱油鑊，落薑片捽勻d油。

3 落蝦。要不時調整火力。將蝦乾煎至攣身。贊油落頭抽。

4 煎至蝦殼微焦香脆，即可上碟。