陳皮蒸泥鯭

游水泥鯭四條33元。陳皮適量。泥鯭生猛，全身既骨黐埋一片，基本上啖啖肉，蒸陳皮係絕配。

泥鯭洗淨。陳皮浸軟切絲。豆豉、蒜頭、芫茜適量。

陳皮絲鋪在魚面，倒入豆豉、蒜片鋪勻，落少少油。入水滾鑊蒸12分鐘。

蒸好後倒去碟內汁水，落蒸魚豉油、老油，贊熱油，落芫茜。

泥鯭肉質同風味都好獨特，好正！

麵豉醬唐生菜JerJer煲

唐生菜一斤4元。麵豉醬一包2元。杞子適量。生菜洗淨琼乾水至少一個鐘。杞子浸洗備用。

一邊燒熱個瓦煲，一邊起鑊爆香薑蒜麵醬。

落生菜lur鑊，加蠔油、杞子兜下。然後快手鏟落個煲度jer之。

加蓋俾生菜jer jer煲內熟。趁熱食。

煎荷包蛋

雞蛋一隻。

鑊要燒熱，不能黐底。

倒蛋入鑊要稍為拉長一邊蛋白，做荷包掩。

鏟塊掩到對邊，用鑊鏟壓住，用熱油封邊固定一陣。

反轉隻蛋等荷包成形。

上碟落老抽。

切開睇下，溏心程度可按個人喜好調校火力。

唔。。。咬左一啖，簡單就係好味！

型格潮州粿

我覺得潮州粿好有特色，好有型格。去九龍城潮X買左幾個：

右起紅桃粿(鹹的：綠豆蓉花生餡，糯米花生碎餡)，鼠殼粿(甜的：芝麻花生餡)，番薯粿(甜的：番薯蓉餡)

鼠殼粿最好食。

番薯粿都OK，不過個皮好硬。紅桃粿用黎祭神，或者不以滿足人既口腹之慾為宗旨，睇好過食。四款粿都好厚皮，第日自己試下整，一定會整薄皮版，哈哈。

 

 

揚州炒飯(肥哉版)

廚房網誌點可以冇揚州炒飯丫，一於整番碟先。呢個係肥哉版！

為左炒呢個飯，要買好多料：雪蝦一斤24元。西式火腿一包19元。肥叉燒一條18元。豌豆2元(呢個好緊要架，我鍾意)。生菜一斤4元。仲要買左盒蛋15元。

冷飯大約三碗，先整散佢備用。

蝦適量剝乾淨，用鹽醃一陣備用。叉燒、火腿、蔥適量切粒。生菜三片切絲。

先炒個蛋炒飯底：

薑起鑊，落冷飯，少少鹽炒散佢。打一隻蛋，整散，炒入飯內，炒勻上碟備用。

再炒料：

先落酒炒蝦，半熟後落叉燒、火腿粒炒勻。

最後飯料一齊炒：

倒入飯、生菜絲、豌豆、蔥粒。大火快炒，落少少鹽調味，炒至聞到揚州炒飯香味，飯乾身即可上碟。

好鬼好食呀，自己都要讚自己呀。。。。。。

豉椒鳳爪

炸鳳爪一磅13元。生菜一斤4元。

鳳爪出水去雪味異味，過冷河，剪去指甲備用。生菜洗淨備用。

薑絲蒜頭起鑊，爆鳳爪，贊兩碗水，落糖、老抽、鹽、加蓋煮至鳳爪夠腍。

另爆香豆豉、辣椒，鳳爪回鑊，埋獻(生粉、蠔油、糖)，煮至獻汁變濃。

另灼生菜，伴碟，鋪上炆好之鳳爪即成。

芥菜鹹蛋魚肉湯

用剩左D芥菜頭同菜葉，用黎滾個芥菜鹹蛋湯，幾乎係廚房指定動作啦！

我加左四兩絞碎鯪魚肉，整左個芥菜鹹蛋魚蛋湯。

魚肉加少少鹽同蔥粒，再絞到起膠，Jit成魚蛋12粒。

落油鑊煎到成型，表面微脆備用。

水滾先落薑片同兩個鹹蛋黃，滾至熟。再落芥菜滾到出味。最後再落埋魚蛋，再滾到湯水成型。熄火，倒入鹹蛋白，局一陣。

倒入湯碗，即成美味芥菜湯！

瑤柱蝦米木耳燴芥菜

今日行街市見到菜檔D芥菜幾靚，就買左一斤，4元乍。

屋企有瑤柱、蝦米、白背黑木耳。就整左呢碟菜。

芥菜洗淨，淨係要中下段。(菜頭同菜葉可以用黎滾番個芥菜鹹蛋湯，唔會晒。)

瑤柱、蝦米、木耳浸水。木耳浸後剪絲備用。

起鑊，用薑爆香木耳同瑤柱，贊水，落少少鹽、糖。加蓋炆煮至瑤柱散開夠軟身。

加入蝦米，再炆。直至收乾晒水上碟備用。

用蒜蓉起鑊，炒芥菜。贊水加蓋煮一陣。

放入炆好之瑤柱、蝦米、木耳，加蓋，同芥菜燴一燴。

燴至菜熟收汁，即可上碟。

呢個菜都好夾味，大家不妨試下！

金銀菜陳腎燒骨豬肉湯

白菜一斤5元。陳腎三隻12元。燒骨一份10元。豬爭24元。

菜乾、陳皮、羅漢果、南北杏適量。燒骨用少少就夠，只要佢既風味，唔中意可以唔落。

燒骨、豬肉出水備用。菜乾浸軟去沙去頭。白菜、陳皮、羅漢果、南北杏洗淨。

水滾全部放入煲，煲三個鐘即成。

落左燒骨，個湯有D大牌檔Feel。