檸檬豆醬蒸烏頭

烏頭一條15元。檸檬一個2元。普寧豆醬屋企買落。陳皮、蔥適量。

烏頭清洗肚內污物，清洗乾淨。內外搽鹽，肚內放一兩片檸檬，抹乾放入雪櫃醃30分鐘。

檸檬切半，再切半圓片，另檸檬皮少許切粒備用。陳皮浸洗剪絲備用。蔥切絲備用。

在魚碟底搽上油，放上烏頭，圍邊排上檸檬片，淋上普寧豆醬，放入大滾水鑊中蒸12分鐘。

如蒸魚水太多，倒去一些，淋上老抽+蒸魚豉油，再鋪上薑絲檸檬皮粒，贊熟油，再加蓋一陣。

開蓋，上得檯喇，味道好夾呀！！！

薑汁芥蘭炒牛肉

薑汁芥蘭正到痺，加埋牛肉仲好味。

芥蘭一斤12元。牛肉20元。薑汁、薑絲適量。

做法：

1 芥蘭洗淨剪度備用。

2 牛肉用油、老抽、生抽、糖、鹽、酒、生粉醃勻。

3 薑整汁同絲備用。

4 起鑊，落油燒至大熱先炒熟牛肉兜起。

5 用薑絲起鑊，大火快炒芥蘭，落薑汁、糖、紹酒再炒。

6 炒至菜剛熟，放入牛肉，埋獻(蠔油、生粉)，收汁即可上碟。

 

韭菜粿[肥哉版]

餡料：免治豬肉。竹筍。韭菜。

皮料：糯米粉5份[500ml]。粘米粉1份[100ml]。韭菜汁一碗。糖、油少許。

做餡料：

免治豬肉用老抽、鹽、糖、酒醃好備用。竹筍切粒備用。韭菜切粒備用。

燒紅鑊，落免治豬肉炒熟，落筍粒再炒勻，最後落韭菜一兜即起鑊。

做皮料：

皮料放入大盆內，逐少逐少沖入滾水，搓勻成粉糰。

做粿：

預備餅模，取粉糰包餡，壓入模內打出。

蒸：

中火蒸10分鐘即成。

可以就咁趁熱食，又可以煎黎食。

補相三張俾網友參考下：

 

 

瑤柱木耳菜膽燉花菇

呢個燉花菇清香有益，一定要試下。

大白菜一斤只要菜膽。花菇十幾隻。瑤柱六七粒。白背黑木耳一朵。

做法：

白菜膽洗淨，中間切開備用。花菇浸軟剪蒂備用。瑤柱浸軟備用。白背黑木耳浸軟剪開備用。

燒一大鑊滾水，放落燉盅，將所有料放入盅入，再注滿滾水，加蓋燉之。

中火燉四個鐘之後，就係咁樣。

 

花生麵筋炆豬皮

呢個炆豬皮係參考陳榮師傅《入廚三十年》第七冊「花生炆豬皮」整既。我加多左一舊麵筋。

料：花生四兩3元。豬皮兩塊15元。麵筋一舊7元。南乳、陳皮、蒜頭、薑適量。

準備：

1 花生洗淨備用。

2 豬皮剪成長方小塊過水洗淨備用。

3 麵筋切片每片再剪開一半。

做法：

1 用大瓦煲爆香薑片、蒜頭、南乳。

2 落花生、麵筋，加兩碗水先炆一陣。

3 落埋豬皮，落蠔油、酒、糖、老抽、鹽，加水再炆至豬皮花生腍身。

4 埋獻，稍為收汁，轉落乾淨瓦煲仔上桌。

 

 

 

菜乾地魚臘鴨粥

今次用磨米法煲粥。米半碗用水浸過夜，放入攪拌機磨成米漿。

菜乾、地魚乾浸洗乾淨，菜乾剪度，地魚乾撕碎備用

臘鴨髀一隻先蒸熟，起肉，帶骨部分斬件備用。

做法：

1 米漿逐少逐少倒入滾水中，煲滾，放入菜乾、地魚乾再煲至綿軟。

2 放入臘鴨件[帶骨部分]再煲至出味。

3 臘鴨肉撕開後下，待粥再滾起即可享用。

水麵筋芹菜竹筍炆火腩

呢個送參考左陳榮《入廚三十年》第五冊介紹既「水麵筋冬菇炆火腩」。陳師傅好似漏左講火腩點樣處理。我唯有自己執生啦。

水麵筋兩舊7元 [用一舊已夠晒]

清水竹筍一罐9元 [用一片竹筍已夠]

燒腩一片16元

芹菜兩棵2元

冬菇兩隻

準備：

水麵筋切厚片然後撕成條狀備用。燒腩切較細較薄片備用。芹菜切度備用。冬菇浸軟一開四備用。竹筍切條備用。

做法：

1 燒熱油鑊，落薑片爆香芹菜，兜起。

2 爆燒腩兜起。

3 原鑊爆炒竹筍、水麵筋、冬菇。

4 放回燒腩，落水炆之。

5 炆至夠腍，贊酒，埋獻[生粉、糖、生抽、蠔油、鹽]，落芹菜收汁即成。

東江煎釀豆腐煲

東江豆腐煲係個客家菜，此煲係個「燙煲」，我覺得比雜菜煲更吸引。
材料：



1 煎釀豆腐兩塊6元。
2 鯪魚膠10元。
3 半肥瘦豬肉絞碎20元(只需用一半)。
4 生菜一棵(6元斤，可以落多一兩棵)
5 蝦米、冬菇、中芹適量。
做法：
1 蝦米浸軟剪碎備用。
2 魚膠、豬肉分量一比一，落鹽、糖、老抽、生抽、酒、魚露、蔥同碎蝦米撈勻，用力攪成混合肉膠備用。

3 豆腐一開四，共切出八塊長方塊，每塊挖一長方槽，在槽內拍上生粉，釀入混合肉膠。

4 大瓦煲準備湯底：清水六碗、冬菇四隻、豆腐碎(挖出來的豆腐)、中芹、鹽、雞粉適量。放埋用剩既肉膠做既肉丸同煲。

5 煎豆腐：大火燒熱油鑊，將豆腐釀肉一面朝下放入煎，轉中慢火，煎至表面微焦香。

6 豆腐放入煲滾之湯底中，轉中慢火再煲。

7 煲到出味後，轉大火放入生菜，一滾即可熄火。東江豆腐煲完成！