魚露蝦子柚皮

今日終於整左個沙田柚皮黎食喇！

柚皮兩日前已削青、浸水、過水，琴日用魚露水浸左一日。

另外要準備個炆柚皮既湯底：我用白蘿蔔同大地魚乾。

做法：

1 起油鑊至夠熱，落大地魚乾四片，炸至金黃色香脆，撈起攤凍，再中碎成粉。

2 燒鑊，落油薑爆一爆柚皮，炆煮一陣。

3 湯底：用瓦煲燒滾水，落蘿蔔同大地魚粉，煲至出味。

4 正式炆柚皮喇：將柚皮落鑊，然後將湯過濾入鑊，浸過柚皮，用中慢火炆煮柚皮至湯汁減至只餘約三分一，落少少靚老抽。

5 炆至開始收汁，落蝦子煮一陣，再落少少中芹粒上碟。

6 在鑊內推一個濃獻(生粉、蠔油)，淋落柚皮面即成。

呢個柚皮功夫雖多，不過真係好好味呀，淨係食佢都送到好多碗飯！！

黑萬花蓋杯

「黑萬花」係從前景德鎮日用瓷多種花樣其中之一。黑底彩花，對比鮮明，十分奪目。

咁靚既杯，連個杯耳都有花架。而家因為驗出釉彩含鉛，已經差唔多被淘汰了。真係可惜。。。

睇下個蓋，以前D師傅繪圖好有心機，而家呢行已經後繼無人了。

再黎張特寫。

豉椒炒蟶子

紐西蘭蟶子一斤28元。

配料：豆豉、指天椒、蒜頭、薑、蔥、芫茜。

蟶子處理好，洗淨備用。

豆豉略壓碎，指天椒剪粒，蒜頭拍碎切粒、薑切絲，蔥、芫西切粒備用。

蟶子用大滾水拖一拖，去殼，將肉沖洗乾淨備用。

燒熱鑊，落油，爆香豆豉、蒜頭、薑絲，落蟶子大火炒之。贊油，再落指天椒爆炒，埋獻炒至熟。

落蔥、芫茜略收汁即可上碟。

今次要黎送明火白粥，好正架！

 

韭菜鮮蝦粉果

又學人整下粉果先，以下呢碟三隻係第一籠，皮較厚，蒸左七分鐘。

以下呢碟三隻係第三籠，皮較薄，蒸左九分鐘左右。

第一次試整，麻麻地，不過都幾好味架。

餡料：

1 雪蝦一斤32元。(用四分一已夠)。

2 竹筍適量。(要買成罐)

3 沙葛適量。(都要買一個7元)

4 韭菜一扎2元。

5 芫茜一扎2元。

皮料：

1 澄麵7份。

2 生粉1份。

3 粟粉1份。

做法：

炒餡料

1 蝦剝淨去腸，用鹽、生粉醃一陣，然後清洗乾淨，吸乾水再切粒備用。

2 竹筍、沙葛、韭菜、芫茜全部切粒備用。

3 落少少油同少少肥豬肉起鑊，爆炒竹筍、沙葛，炒至乾身。

4 落蝦粒，打獻(鹽、糖、生粉、雞粉)，將材料略炒勻。

5 落韭菜粒，熄火，炒勻兜起。

6 攤凍後，包之前，撈入芫茜粒。完成餡料。

做皮

1 澄麵350克，生粉50克，粟粉50克放入大盆內。

2 燒開450克水(水同粉比例係1比1)，趁水大滾分幾次沖入粉中，一邊沖一邊攪。

3 趁熱用手將粉搓勻成粉糰，再逐次取出，搓成長條，切成一粒粒。

包餡

1 將粉粒掐成圓片，放入餡料，收邊。

蒸

1 蒸片搽油，放入粉果，再在粉果上搽少許油。

2 加蓋蒸7分鐘即成。

上圖係第一籠，皮唔夠透明，不過餡剛熟，韭菜同芫茜都翠綠，蝦都爽口。

我第二籠蒸左十幾分鐘，皮透明好多，不過D餡已過熟，韭菜同芫茜已變黃，蝦又鞋口。第三籠我整薄D個皮，蒸左九分鐘左右，賣相似乎好D。

以下呢籠係第三籠，皮較薄，蒸左九分鐘左右，較透明，韭菜芫茜雖仍能保持青綠，但蝦已略老。結論係：皮要薄，蒸七分鐘即可。

以上餡料、皮料份量，可以做好多隻粉果，我只係用左三分一左右，已經整左18隻，如果全部整晒，應可以整四十隻以上。

瓜蝶綿綿多子圖

白底瓜蝶斗碗 + 石榴兩個

白底瓜蝶圖案寓意「瓜瓞綿綿」，比喻子孫繁盛、傳世久遠。石榴乃「多子」之徵。

 

香港仔山X魚蛋

久聞其名，不過食落不外如是。同普通茶餐廳唔係差好多。

湯底好普通，令人失望。魚蛋爽係爽，但較硬。魚片好DD。20元一碗，貴左D喇。

廣西沙田柚

厚皮沙田柚又黎喇，呢隻「原版」沙田柚，我係以食皮為主。今次呢個幾墜手下，應該都幾多汁。10元個，廣西沙田柚，老闆寫明「甜到漏」。食完肉，梗係要整番味蝦子柚皮啦。

大同老婆餅

元朗間大同老餅家，老婆餅款式好多，有原版，有蓮蓉，有豆蓉(綠豆蓉加紅薑)，有豆沙(紅豆蓉)，有黑芝麻(冇記底係咩餡)。個餅皮鬆化而不散，塊餅可以容易搣開分食，唔會好似其他老婆餅咁，一搣即皮開肉爛。

大同隻原版老婆餅好食，不過冇咩特別，我鍾意佢隻紅薑豆蓉，好有特色。白蓮蓉都好正。

大芥菜鹹排骨湯

大芥菜一個7.5元。一字排29元。中芹4元。

一字排用鹽醃鹹，最好醃過夜備用。

大芥菜、中芹洗淨，芥菜切件，中芹切度。

先將醃透既一字排出水，過冷河，然後切去太肥部分。

瓦煲煲滾水，放入大芥菜大火滾之。

用薑起鑊，爆炒已出水之一字排，爆至微焦香兜起沖水，沖去油份。

大芥菜煲至開始腍身時，放入一字排，再煲。

煲至一字排骨肉可分離時，放入中芹滾一陣，調味即成。

 

菜心炒牛肉 Fried Vegetable With Beef

由細食到大，點都要整番呢碟經典家常送。

菜心一斤9元。牛肉一舊22元。

牛肉用老抽、生抽、糖、鹽、油、少少水醃勻備用。

菜心洗淨摘好備用。

燒熱油鑊，用薑起鑊，快炒菜心至八成熟鏟起。

爆炒牛肉，菜心回鑊，兜勻，埋獻(生粉、蠔油)收汁即可上碟。

 

碗

無限回憶在飯碗。。。碗碗常滿

 

牛油蛋糕仔[試爐版]

試下整蛋糕仔先。

響網上有好多整蛋糕仔既配方。呢次用料配搭係：

自發麵粉150克。牛油40克。奶水50克。砂糖100克。蛋2隻。

200度焗18分鐘。

呢個份量可以整到9個撻模蛋糕仔。

都幾好食喎，哈哈。