番茄薯仔牛腩湯

番茄薯仔滾牛肉湯整得多，今次試下煲牛腩。

番茄6個薯仔4個14元。

牛腩(軟骨、牛筋、腩)斤半80元(好貴下，下次要40元就夠)。

做法：

1 牛腩洗淨去血污，出水，再沖洗乾淨。

2 燒熱鑊，落油，多薑，爆香牛腩備用。

3 大煲煲滾水，放入切細塊之番茄，煲個湯底。

4 放入牛腩，陳皮、薑片，先煲一個鐘。

5 放入薯仔，中慢火再煲兩個鐘，調味即成。

煲好後撈起牛筋腩切件點豉油食。

 

 

煎年糕

上星期整左兩底年糕，今日終於得閒D可以煎黎試下。

煎法：

一、切片

二、用易潔鑊慢火先煎熱

三、上蛋汁再落鑊煎至微焦香

四、排碟

黃糕：甜味層次較豐富，有椰汁味、蔗糖味、紅棗味。質地比較軟少少。

白糕：清甜而帶薑味，好正！質地軟中帶咬口，因為落左合桃，咬落合桃香味融入糕中，好好食呀。

 

薑蓉炒芥蘭

超簡單超好食炒芥蘭：薑蓉炒芥蘭

芥蘭一斤6元。

燒熱油鑊，爆香薑蓉，先炒莖再落埋葉，加鹽、糖炒至岩岩熟上碟。

 

青瓜炒鴛鴦魷

好耐好耐冇食過鮮魷，今日炒番味鴛鴦魷先。明知膽固醇高，不過呢碟送真係好好味，好日都唔食一次，冇所謂啦。

材料：

1 鮮魷三隻19元。乾土魷一隻屋企買落。

2 大青瓜一個7元。

3 蝦糕、指天椒適量。

做法：

1 鮮魷洗淨，切花(我應該切錯左，我響外面切，似乎要響裏面切，實在太耐冇整喇)。土魷洗淨浸軟。用鹽、魚露、糖、生粉、酒醃均備用。

2 青瓜刨一半皮，切片備用。

3 燒熱鑊，落油，落薑，少少鹽，爆炒青瓜至微透明，鏟起。

4 落薑、蒜、爆香蝦糕。先落土魷炒香炆一陣，再落鮮魷大火炒。

5 青瓜回鑊快炒，埋獻(生粉、生抽、糖)，收汁上碟。

鴛鴦魷口感各有不同，一樣濃郁惹味。青瓜清甜爽脆，兩樣材料非常配襯。

 

 

煎封紅鱲仔

紅鱲仔兩條，40元(4元兩)。

芫茜、蔥、指天椒適量。

紅鱲仔洗淨，用鹽搽勻醃一小時以上備用。

芫茜、蔥切度，指天椒切粒備用。

煎魚：燒鑊至大熱，落油，燒至出煙，校中火，將已索乾水既紅鱲仔放入鑊，煎至兩面金黃香脆，鏟起。

推獻：用生粉、魚露、糖、酒、生抽、水開勻，放落鑊推獻，加入芫茜、蔥，熄火。淋上魚面。

落少少指天椒粒，即成。

三味香菜炒蛋

香菜三種：韭黃、芫茜、蔥。

蛋：三隻。

調味：雞粉、鹽、魚露。

呢個炒蛋風味獨特，如果鍾意食香菜，一定要試下。今次專揀三種最易熟既香菜黎炒蛋，快、靚、正！

做法：

1 韭黃、芫茜、蔥徹底清洗乾淨，剪成短度，瀝乾水備用。

2 蛋三隻，落少少雞粉、鹽、魚露，打勻。

3 將香菜直接倒入蛋液中，撈勻。

4 燒熱鑊，搪勻油，燒至出煙，校中火倒入蛋液快炒。

5 邊炒邊校火力，炒至蛋液剛好凝固，即可上碟。

呢碟蛋要趁熱享用，放得耐香菜會出水(所以最好先瀝乾水)就影響食味。

雙喜椰汁年糕

肥哉雙喜椰汁年糕：
一、紅棗杞子片糖椰汁年糕(加左油)
二、合桃薑蓉冰糖椰汁年糕(冇加油)

材料：糯米粉、粘米粉、澄麵。椰漿、片糖、冰糖。紅棗、杞子、合桃、薑適量。

年糕配方多籮籮，究竟邊條方最正呢？響網上睇左一排，自己編左條配方，貪佢容易記，順便試整「雙喜椰汁年糕」，打孖上，請各位指教下。祝各位新年進步，年年高陞！

呢個配方可以整到個五吋半直徑，一吋半高既圓形年糕。

糖：片糖或冰糖 200g
水：200g
糯米粉：200g
粘米粉：20g
澄麵：80g
椰漿：100g
油：1湯匙 (可不落)

做法：
1 煮糖水：慢火將糖溶入水中，攤凍備用。
2 開粉：糯米粉、粘米粉、澄麵篩勻，落糖水攪勻，再落椰漿再攪勻。

3 加油：落1湯匙油攪勻，怕肥可不落。

4 落料：黃糕(片糖)落紅棗杞子，白糕(冰糖)落合桃薑蓉。

5 蒸糕：把粉漿倒落糕模，我用左個五吋半圓形糕模，大火蒸1小時。

岩岩蒸起。

攤凍用保鮮紙包好，放入雪櫃雪一日先可以煎黎食。聽日先可以試味。

 

枝竹豆卜炆鯇魚腩

枝竹一包7元。而家D枝竹愈賣愈貴，7元得三枝，愈黎愈少，好離譜呀。

豆卜5元。鯇魚腩一舊21元。

鯇魚腩洗淨用鹽醃一日。索乾水，落鑊煎至金黃焦香。

枝竹浸軟剪度，豆卜一開二，落鑊用蠔油、老抽、糖、雞粉炆至腍。

將魚放入枝竹豆卜中，加水再炆煮，至開始收水。

埋獻至收汁，落蔥粒即可上碟。

 

乾燒鮮蝦粉絲煲

冰鮮蝦半斤24元。

龍口粉絲細半包(大包裝)。

土魷一隻。

大豆芽菜半斤。

中芹、芫茜、指天椒適量。

準備：

1 粉絲用凍水浸軟，瀝乾水備用。

2 冰鮮蝦洗乾淨，用大滾水白灼一下即撈起。蝦水放入一粒金華火腿雞湯粒，開成上湯備用。

3 土魷浸軟洗乾淨剪成絲，用糖、豉油、油、魚露、酒、鹽醃勻。

4 大豆芽用白鑊烘乾水，剪碎。

5 中芹莖切短度，芫茜切條、指天椒切粒。

做法：

1 蝦用廚房紙完全吸乾水，用油鹽乾煎蝦，煎至香脆鏟起。

2 燒熱鑊，落油，用薑起鑊，放入土魷絲爆炒至香。

3 落上湯煮滾後，放入粉絲。

4 兜炒粉絲，煮一陣待其吸收湯汁。放入大豆芽碎兜炒。

5 落中芹再炒至粉絲完全吸收湯汁。

6 用瓦煲仔，落油搪勻，燒至夠熱。把上述5放入煲內，落指天椒，埋獻汁(生粉、老抽、蠔油)，用筷子撈勻。

7 放入乾煎蝦，加蓋乾燒一陣。

8 燒至滋滋聲，開蓋，用筷子略撈一下粉絲同蝦，加入芫茜，再加蓋局一陣即成。

呢個乾燒粉絲要完全乾身才算成功，食落非常惹味架！