仲以為嫩雞煨麵簡單易整，整過先知原來都幾多工夫，整到我身水身汗。
本來想買新鮮上海幼麵，但係琴晚麵鋪賣晒，今日唯有買包裝麵條。
小棠菜四棵已經夠晒。綠雪菜少少。新鮮靚雞髀兩隻。
雞髀用鹽、糖、紹酒、醃過夜。小棠菜切丁(少葉多莖)，炒熟。雪菜浸一浸鹽水，切小粒。
雞髀隔水蒸至九成熟，起肉切丁。雞骨留用。
煲雞湯：用蒸雞雞汁+雞骨+鹽+濃湯寶(雞湯)+薑蔥+水適量煲至出味，過濾備用。
煮麵條：滾水煮麵條至軟身再煮一陣，過冷河備用。
所有材料準備好晒，就可以正式整呢個嫩雞煨麵喇。
燒滾雞湯，放入麵條，煮至湯轉濃，麵條變得更軟而微爛(微爛係關鍵，我覺得D麵要爛爛地至好食)。
此時較慢火，依次放入雪菜粒、雞肉丁，攪勻。
熄火，放入小棠菜拌勻即成。
呢排熱到飛起，煲番個清熱消暑湯先。
白霜皮冬瓜斤半。瘦肉20元。薏米、蓮子、茨實、蜜棗、陳皮適量。
冬瓜卒乾淨皮上既白霜，切好。瘦肉出水。其他材料洗乾淨。用個大煲，落十碗水，Dump晒D料入去，先用大火煲滾，再轉中慢火煲個半至兩個鐘就飲得。
呢個湯完全唔駛調味，就係要佢清清地，原汁原味至好，攤凍飲仲正。
琴晚逛百佳，見到D湯料包都幾正喎，買左呢包料，內有：海底椰、佛手瓜、粟米、紅蘿蔔、南北杏、蜜棗，企企理理，幾得人喜歡喎。
今日買多二十元豬脊骨黎煲，做法簡單，個湯都幾甜幾好飲。
豬骨出水，除去碎骨。將湯料洗淨，粟米斬件，全部放落煲。
中慢火煲三個鐘，調味，飲得！
材料：
士多啤梨一盒。一字排35元。洋蔥一個。麥芽糖一湯匙。甜豆適量。
做法：
1 士多啤梨洗淨，將一部分切粒，另一部分用攪拌機攪成果汁(混合油一湯匙、麥芽糖水半杯)。
2 一字排用糖、鹽、雞粉、玫瑰露酒(我諗用香檳仲正)醃過夜。
3 用平底鑊，落油爆炒已切碎既洋蔥。落一字排，贊水爆炒，加蓋半煎煮至一字排呈金黃色全熟而洋蔥差不多全部融化消失為止，鏟起。
4 洗淨鑊，落油燒熱。傾入士多啤利汁，埋獻(鹽、糖、雞粉)煮至濃度適中，落士多啤利粒同一字排，快脆兜勻。
5 再落D已炒熟既甜豆，上碟，加適量橙皮絲做裝飾，趁熱食喇！
註：呢個小炒靈感來自通少既「通之廚房」 http://hk.myblog.yahoo.com/tony-karen/article?mid=44944，我自己做左一D改動變化。
荷蘭鍋開鍋之二：手撕雞燉飯
今日整左個手撕雞燉飯，我用既材料如下：
1 白米嘜半，糙米半嘜。
2 新鮮龍崗雞髀兩隻。
3 紅蘿蔔兩個。洋蔥兩個。
4 磨菇、乾蔥頭、蒜頭、薑適量。
做法：
1 燒熱鍋，落油爆香薑片、乾蔥頭蒜頭。再落洋蔥。再落紅蘿蔔磨菇煮一陣。
2 雞髀調味醃至入味，最好醃過夜。鋪在1之上，贊少少酒、水，加蓋用中細火燜大約10分鐘。
3 將雞髀燜至剛熟，把全部材料取出。手撕雞肉備用。隻雞髀就咁食都已經超好味，又滑又多汁！
4 煮飯：將白米糙米撈勻，洗淨放入鍋內，再注入雞湯、清水浸過米面，加蓋先開中大火煮滾米水，再改中小火燉約8分鐘。
5 此時開蓋，加入先前已準備好既材料，鋪在飯面，再加入適量雞湯。加蓋續燉10分鐘左右至聞到微焦香，熄火靜置15分鐘。
6 開蓋，將材料和飯撈勻即成。
荷蘭鍋既鎖水功能好出色，個飯同雞都保持適當濕潤，一D都唔會乾硬。
響網上買左個荷蘭鍋(Dutch oven)，係個鑄鐵(Cast iron)鍋黎。開左鍋(用熱水洗淨，抹乾，搽油，放入焗爐200度乾焗30分鐘，留在爐內自然冷卻)，即刻整番煲燜雙腩試下煲先。牛腩、豬腩一齊黎！
牛坑腩60元。豬腩肉18元。南瓜適量。鹵水料、八角、陳皮適量。
雙腩出水洗乾淨，切大件。南瓜切丁粒。
燒熱鍋，落油薑起鑊，爆香雙腩，贊酒，落鹵水料適量、鹽、糖(片糖仲好)、雞粉、八角、陳皮，再落水，加蓋用中小火炆煮。
按個人喜好決定炆幾耐，我認為大約個半鐘後牛腩已夠腍，豬腩比牛腩更易腍，此時加入南瓜，再炆約八分鐘至略收汁即成。
可以埋獻，不過我想睇清楚第一次炆出黎既汁液顏色，冇埋獻，而且全程都冇落豉油。
都幾好味，個汁係有D鐵鍋效應黑黑地，但唔算太黑，煮多幾次我諗會改善。
