呢個飯盒係專登買送整，唔係食隔夜送架。
想有肉又有多D蔬菜，於是整個兩菜一肉拼盒。
蘿蔔、椰菜各一個(只須用三分一)，用黎炒既牛肉，我鍾意有D趙口既，買左20元。
睇下D牛肉幾靚！
牛肉洗淨，用糖、豉油、酒、鹽、少少梳打粉、水、油醃勻入味。
蘿蔔切條，椰菜切大角片。
用薑片起鑊，爆炒蘿蔔，贊水煮到透明撈起。
炒椰菜至僅熟撈起。
燒熱鑊落油燒至出煙，落牛肉大火快炒，贊酒，再落蘿蔔炒勻，埋獻收汁。
蘿蔔、牛肉、椰菜排好，聽日果餐就唔駛出街同人逼喇。
好味好好味！
2010年9月12日 星期日
2010年9月6日 星期一
月餅我食先 Wing Wah Mooncake
嘩，點解咁多空位架，漏左好大條LAR喎，成個山窿咁喎。
買左呢個一個裝月餅，爭五毫子就五十元。
食食下有種「怪怪的」既感覺。個皮太薄太軟太滑，好似用左護膚品咁，蓮蓉同蛋黃完全分離，溝唔埋既。唔係話佢唔好食，不過冇左以前食月餅既感覺咯。
其實而家D月餅同我細個時果D唔同左好多，而家D月餅個表面基本上係乾身既，你睇下連個底都係乾身。
以前D月餅講究「油水」，個餅成個都「肥林林」架。要多油水先至矜貴。
以前D月餅用豬油、雞油、鴨膏搓蓮蓉，品類繁多，香味各異。而家講健康，冇左呢D風味LU。
2010年9月5日 星期日
冬瓜陳皮鴨腿湯飯 Rice in Winter Melon Duck Leg Soup
冬瓜陳皮鴨腿湯飯[偷工版]
雖然係「偷工」，不過冇減料架。
燒鴨髀(四分一隻鴨)25元，最好買靚D既燒鴨啦，不過費事行，響就近燒臘檔買，普普通通。
冬瓜一片。陳皮、八角、冬菇、薑片適量。
陳皮越靚越好，又係冇專登買靚陳皮，只係雜貨鋪十元兩既貨色乍。
先煲個冬瓜陳皮湯底：水(用雞湯好味D)、冬菇、陳皮、八角、薑片、冬瓜粒煲至出味。
燒鴨先沖洗，去除多餘油膩，放入湯底內轉慢火慢慢煲至腍身。
將鴨腿湯煲至濃度適中，試味，將已腍身既鴨腿取出。
去除湯面多餘油份。
用大碗裝飯，鋪上鴨腿，再將滾湯過濾沖入碗中，灑上蔥花，即成冬瓜陳皮鴨腿湯飯。趁熱享用。
帶飯篇之：勝瓜炒蝦仁飯 Stir-Fried Silk Melon and Shrimp Lunch Box
勝瓜一個。冰鮮蝦一斤。
先煮好飯，今次煮糙米溝白米飯。
勝瓜切滾度，蝦仁處理好，完全唔駛調味，本身已好好味。
燒熱鑊，落油落薑片，爆炒蝦仁，贊酒，炒至七成熟撈起。
原鑊落勝瓜，贊水，落少少鹽，炒至開始軟身，將蝦仁回鑊兜勻，埋個薄獻(生抽、生粉、雞粉)，兜至收汁，蝦仁僅僅熟即熄火盛起。
因為食時仲要「叮」熱，所以唔可以炒到好熟。
2010年8月29日 星期日
叉燒煎鴛鴦蛋 Fried BBQ Pork and Eggs (hen egg + salty duck egg)
早有預謀留起左少少自家製叉燒，用黎整番碟叉燒煎蛋。
打開雪櫃，剩番兩隻雞蛋，一隻鹹蛋，一於就煎鴛鴦蛋啦。
材料：
叉燒適量。雞蛋兩隻。鹹蛋一隻。蔥適量。
做法：
1 叉燒切小三角塊，落鑊爆香備用。
2 鹹蛋蛋白混合雞蛋，打勻備用。
3 鹹蛋蛋黃蒸熟，壓碎，落鑊用少少油細火炒溶備用。
4 蔥切粒備用。
5 將以上1至4混合。
6 燒熱鑊，落適量油，傾入5。此時可決定炒滑蛋定煎蛋，炒滑蛋即快炒至蛋液剛凝固就上碟，不能見焦。煎蛋則煎至兩面金黃微焦才上葉。
呢碟煎蛋，就咁睇未必睇得出有鹹蛋，食落就發現蛋味鹹香，同一般煎蛋唔同。
2010年8月28日 星期六
蜜汁肥叉 BBQ Fatty Pork
肥哉焗叉燒第二版之：蜜汁肥叉
唔忿氣點都要買番舊肥脢頭，再焗一次。
做法同蜜汁瘦叉一樣，只係將針扒換左脢頭，將蜜汁加倍。
舊脢頭買左38元。
我已經要左舊肥既，但係肥瘦唔夠均勻，唔知係唔係最岩做肥叉既脢頭一早已經留俾燒臘鋪，又或者俾燒臘檔買起左呢？
我個焗爐焗肥叉中。。。
肥叉出爐喇！
伙記，黎一碗肥叉飯加色！
脢頭肥叉好食過針扒瘦叉，冇得傾。我已經加倍落蜜汁，仲係唔夠甜，燒臘檔D叉燒真係落好多糖架！
2010年8月22日 星期日
蜜汁瘦叉 BBQ Lean Pork
買左個焗爐好少用，驚佢發霉，今日點都要開下佢，學人整下叉燒先。
去街市本來買脢頭豬肉架，但係去到幫襯開既肉檔，我話想試下整叉燒，佢就介紹我買「針扒」。我見到一大舊瘦肉，同腦海中果碟製成品「肥叉」差好遠。不過又試下啦，切左一舊33元。於是本來諗住整肥叉，變左整瘦叉，健康D唔食咁肥都好既。
屋企有用剩既一大樽麥芽糖同叉燒醬，可以慳番自己調醃料既時間。
將舊針扒切開三條，洗乾淨就落少少鹽、雞粉、兩湯匙叉燒醬醃佢，朝早放入雪柜留番下晝整。
以下方法係響網上學番黎，火候時間冇完全依到足，差唔多啦：
預熱焗爐220度10分鐘。
焗盤同鋼格都包上錫紙，鋼格錫紙篤窿用黎流汁，焗盤裝住D汁，鋪上錫紙可以容易清潔。如果唔係整完有排清理。
放上豬肉，放入焗爐220度焗15分鐘，然後翻轉再焗15分鐘。
然後取出搽勻麥芽糖汁，再入爐每邊都焗5分鐘。
取出攤凍切片，就係一碟「瘦叉」喇。哈哈，都幾似模似樣喎。
針扒肉食落係腍瘦而不太鞋，帶少肥，有肉味。我落左成兩匙蜜汁，都唔夠食開既叉燒咁甜。整過先知燒臘檔既叉燒落左好多糖，係又肥又高糖既野黎，自己整可以控制調料，可以食得健康D。
2010年8月21日 星期六
冬菇髮菜雪耳炆花膠 Mushroom, Moss, Fungus, Fish Maw Stew
材料：
冬菇八隻。髮菜一撮。雪耳一朵。花膠一隻。翠玉瓜一個。
準備：
冬菇浸洗好，剪去蒂。先行炆好，(做法同平日炆冬菇一樣)再剪成角粒。
髮菜浸洗乾淨，用油省過備用。
雪耳浸洗好清除硬物，摘細朵備用。
花膠隔一兩日前先浸發好，剪成麻將大小備用。
翠玉瓜切厚片再切大角粒。
炆的步驟：
一、先燒熱油鑊，落薑爆香，落翠玉瓜爆炒，晒少少鹽，將翠玉瓜炒至五成熟上碟。
二、原鑊再燒熱，落雪耳爆炒，贊少少酒、水將雪耳炒透。
三、放入冬菇，加水、加入髮菜、蠔油炆之。
四、炆至汁水略收，加入花膠，再加水或雞湯加蓋炆約15分鐘。
五、此時汁液漸收，加入翠玉瓜，兜勻，埋獻試味後，即可上碟。
花膠有益對皮膚好，但係都幾「膠口」，所以我加入「爽口」既雪耳同翠玉瓜平衡番，用冬菇同蠔油提味，效果都唔錯架。
呢碟野主角雖然係花膠，但係食落最好味既唔係佢，你地想像下邊樣最好味？
冬菇？翠玉瓜？雪耳？髮菜？
2010年8月20日 星期五
2010年8月15日 星期日
2010年8月14日 星期六
牛肉炒翡翠豆苗 Fried Bean Sprout and Beef
溫室翡翠豆苗一包13.9元。
用黎炒既靚牛肉20元。
薑絲適量。
牛肉用糖、生抽、蠔油、水、油醃勻至入味。
豆苗洗淨瀝乾水。
先用溫油泡炒牛肉，牛肉落鑊略兜即可熄火，撈起備用。
大火再燒熱油鑊，落薑絲，落豆苗快炒。
牛肉回鑊兜勻，贊酒，埋獻略收汁即可上碟。
豆苗都幾爽脆好食，炒時記得要落薑絲紹酒擘走豆腥味。牛肉香滑又帶咬勁，好味！
訂閱：
文章 (Atom)