油麥菜一斤，豆豉鯪魚一條(連豆豉約一湯匙)，薑絲適量。
油麥菜洗淨，切頭切尾，只留中間部分，再切度。
豆豉鯪魚用手撕開，摘去魚鰭同中間的骨。
落油燒熱鑊，落薑絲、豆豉爆香，校中火，落鯪魚炒香兜起。
再燒熱鑊，落油麥菜快炒，灑少少鹽、雞粉、贊酒，炒至八九成熟時將鯪魚回鑊炒勻，即可上碟。
油麥菜好易熟，忌腍身，可以俾佢「碟上熟」，食時岩岩好。
2011年2月27日 星期日
茄汁西芹香煎龍利柳 Fried Sole Fillet and Celery in Tomato Paste
琴日用剩一個番茄，少少西芹，整咩好呢？買左包冰鮮龍利柳，一於香煎，淋上茄汁同炒西芹就色香味俱全啦。
龍利柳自然解凍，徹底索乾水，用鹽、雞粉、紹酒醃一小時以上，撲上生粉香煎。
番茄煮爛成汁醬，炒西芹，兩樣燴一燴，淋上龍利面，即成。
味道幾夾，唔錯。
2011年2月26日 星期六
番茄西芹牛粒通粉 Tomato Celery and Beef Soup Pasta
整一大鑊通粉，全日都唔駛食飯，有時兼開下都唔錯，連整送既時間都慳埋。
材料用左：番茄五個，西芹適量切粒，牛筋丸適量切粒，通粉隨意。
我係先煮好通粉，再炒料煮汁，然後將通粉回鑊，落滾水或雞湯煮滾就食得。
2011年2月20日 星期日
節瓜煮豬肉 Boiled Hairy Melon with Pork
煮個最平實既菜。呢款係我細個時隔離屋師奶成日煮俾佢個仔仔食既：節瓜煮豬肉。師奶話節瓜夠「正氣」，太子都食唔壞咁話。
不過今次整既係肥哉版。
材料：節瓜三個，脢頭瘦肉20元，薑片適量。
節瓜切片，用薑片爆香油起鑊，放入節瓜中火快炒，然後半炒半煎將節瓜煎至表面微焦兜起。全程唔駛落水架。
脢頭瘦肉切好，用鹽、糖、紹酒醃夠時間。唔好落豉油呀，落豉油會令節瓜容易變酸。
爆炒豬肉片，炒至表面同節瓜一樣微焦。節瓜回鑊同豬肉片炒勻，此時落碗半至兩碗清水或雞湯，加蓋，用中火炆煮至只餘少量汁液。
開蓋，埋獻試味，搞掂。
呢個菜雖然平平無奇超簡單，但係係我童年回憶，滋味零舍唔同！
2011年2月19日 星期六
琵琶豆腐兩吃(蒸+煎) Steamed and Fried Pipa Beancurds
第一吃：蒸。
第二吃：煎。
豆腐兩塊，鯪魚膠四兩，冬菇、蝦米、沖菜、蔥適量。
相中既分量可以整30件琵琶豆腐。
工具：瓷羹十隻。
做法：
1 豆腐壓碎，然後混入鯪魚膠、冬菇、蝦米、沖菜、蔥粒，用雞粉、糖、調味。
2 瓷羹搽油，將以上材料釀入，放大碟上中火蒸。
一吃：蒸琵琶豆腐
蒸10分鐘，將豆腐從瓷羹退出，灑上蔥粒，落少少生抽，贊上滾油即成。
二吃：煎琵琶豆腐
先炒個薑汁芥蘭鋪碟邊備用。蒸豆腐5分鐘，將豆腐從瓷羹退出，攤凍，索乾水，撲少少粟粉，用油半煎炸至金黃色，埋個玻璃獻即可上碟。
試食結果：鍾意食煎多D！
2011年2月3日 星期四
雙糕賀年 Double Cakes New Year Greeting
恭喜發財！身體健康！
今日年初一，煎雙糕賀下年先！
先煎黑芝麻年糕，切片再開一半，落少少蛋汁煎會比較香口。
再煎芋粒蘿蔔糕，見唔見到芋粒呀？件糕比芋頭糕軟滑，幾特別。
2011年2月1日 星期二
2011年1月30日 星期日
瑤柱臘味芋粒蘿蔔糕 Dried Scallop Chinese Sausage Taro Dice Turnip Pudding
哈哈哈，似唔似張「九龍壁畫」呀？
呢個糕又係我肥哉特製架，專登響蘿蔔糕入面加埋芋頭粒，咁就食蘿蔔糕同時食埋芋頭糕啦！
蘿蔔同粉既大約比例 (呢個配方可以整到一個11吋X6吋長形蛋糕模既份量)
蘿蔔二斤半。
粘米粉180克。
澄麵20克。
配料：
芋頭粒一碗半。瑤柱四粒。臘腸兩條。冬菇(係冬菇，唔要花菇)五朵。蝦米適量。
做法：
預備一個糕模，加一張鋁箔覆蓋糕模兩邊內壁同底部，仲要兩邊留掩，可以覆蓋糕面。
蘿白一半刨絲一半搞成濃汁。
瑤柱用水煮半小時以上至腍身拆絲(瑤柱水留用)。臘腸、冬菇切粒。蝦米洗淨。
燒熱鑊先落臘腸粒炒至出油，再放入冬菇蝦米炒香，最後再放入瑤柱絲，贊少少紹酒炒香上碟。
原鑊落瑤柱水，先加幾片薑煮滾至出薑味，撈起薑片，倒入蘿蔔絲同蘿蔔蓉，煮滾。煮至透明。
放入芋頭粒，再煮滾。收火加蓋局一陣。
此時用篩逐少篩入粘米粉同澄麵，攪勻。
再加入先前已爆香既材料(留起少少用黎鋪面)，攪勻。
調味，可加鹽、雞粉、蠔油等，唔好咁重手呀。
將攪好既粉漿倒入已掃油既糕模(鋁箔)，將粉漿面抹平，兩邊掩上鋁箔密封好。
用大火蒸一小時以上，最後十分鐘打開鋁箔掩在糕面鋪上先前留起既部分材料做裝飾，再掩好蒸十分鐘，熄火局多十分鐘即成。
今日唔准食，要等到過年先准食。
2011年1月29日 星期六
黑芝麻椰汁年糕 Black Sesame Coconut Cream Chinese New Year Pudding
要食黑芝麻年糕，就要自已整啦。呢款係肥哉特製架。
材料：
黑芝麻、紅棗、靚片糖(要深啡色)、椰漿、糯米粉、粘米粉、澄麵、水、油。
各樣材料比例同做法唔多講喇，舊年做過。可以睇呢度。http://hk.myblog.yahoo.com/fatjoykitchen/article?mid=807
比較特別係落黑芝麻，要先洗一洗再用白鑊炒香就得。
所有材料搞掂倒入隻大雞公碗度，落鑊蒸45分鐘變成咁↓
攤凍放入雪櫃雪硬，食前切件煎香。
2011年1月23日 星期日
豉油王乾炒一丁麵 Stir Fried Instant Noodle With Soya Sauce
買左牛肉味一丁麵，本來用黎看門口做下早餐。點知有人話唔岩口味，佢地食慣原味同雞蓉味。唔肯食。
於是拆出黎整碟炒一丁麵啦，個麵係包包一樣，冇分別既。
材料好簡單：
唐生菜一棵，雞蛋一隻，一丁麵兩個，靚老抽適量。
先將唐生菜切絲。雞蛋煎成蛋皮再切絲。一丁麵用滾水滾兩滾至岩岩散開撈起過冷河備用。
洗乾靜隻鑊，我今次都係用隻碳鋼鑊，落少少油，落一丁麵炒開，逐少逐少加入靚老抽，如果唔中意包牛肉味粉，就索性改晒味，落少少鹽同雞粉，或者落蠔油都得。不過要唔好太重手，如果唔係鹹得滯。
炒呀炒，呢隻鑊仲可以玩埋拋鑊，拋呀拋，然後落大部分蛋絲同生菜絲，又炒又拋將材料撈勻，即可上碟。
在上面再落幾條蛋絲，碟邊放少少生菜絲做裝飾就OK啦。
金銀魚球魚尾豆腐湯 Double Fish Balls Fish Tail Bean Curd Soup
鯇魚尾一條13元，洗淨抹乾用薑片起鑊煎香備用。
鯪魚肉10元，揑成魚球，一半煎香至金黃色備用。
布包豆腐一塊切長粒備用。
用瓦煲落兩片薑煲滾水，放入已煎香之魚尾滾半小時以上。
半小時後，放入金銀鯪魚球，再用中火滾半小時以上。
半小時後，放入豆腐粒，又用中火滾十五分鐘。
調味，灑上葱粒趁熱飲。魚尾可以起點豉油食。
備註：如果想濃味D，可以用淡豆漿做湯底，或者先落一塊豆腐煲個湯底。
2011年1月15日 星期六
價升質降 Rising Price but Deteriorating Quality
而家D街坊食品真係又貴又差。今日又行過旺角，走去X園食左碗牛筋丸麵，又去X記食左碗魚蛋粉，又走去X利買左四個港式麵包：兩個叉燒餐包，兩個火腿蛋包。
先講下碗牛筋丸麵，牛丸都算「尚可」啦，麵已經差左D，湯就再差D，要24元碗。好耐冇去X園食喇，今次去佢變左喇。以前枱上會有一隻碟仔俾客人斟魚露呀豉油呀辣油呀咁，用黎點牛丸食，而家冇左，慳番D功夫。以前D辣油又香又辣，而家得個辣字，一D香味都冇。
跟住講下碗魚蛋粉，呢間X記有五十幾年歷史，佢而家仲話湯底用正豬骨同大地魚。我幫襯左好多年，睇住佢退步，越黎越差。今日碗粉既湯底毫無鮮味，同滾水加味精冇乜分別，只係靠浸住既魚蛋幫下味。魚蛋既質量都差左好多。而家百物騰貴，做生意始終要賺錢，唯有偷工減料。仲加左2元，要20元碗添。18元加到20元，加左11個巴仙。價升質降，真係「雙管齊下」咯。
再講下X利四個麵包，上次賣3元個，而家賣4元。質量就冇乜變，都算仲有D本心。不過3元加到4元，足足加左百分之33.33架，都好狼胎。
冇法啦，而家樣樣都貴。碗魚蛋粉我越食越無耐喇，因為我睇唔到佢會「改善」，老字號都係咁，睇怕只會越黎越差。真正用心做既街坊魚蛋粉其實一早已經絕左跡咯。
訂閱：
文章 (Atom)