街市檔D白豆角好新鮮好靚，10元斤，買左一斤用黎清炒。
今次用欖油清炒。
豆角摘短度，用薑片蒜頭起鑊，落少少鹽，基本上唔駛點落水，就咁炒到岩岩熟，贊少少紹酒就可以上碟。
攤凍再放入雪櫃雪凍D，仲好食。
食時落D麻油同山西老陳醋撈一撈，仲正。白豆角岩岩熟，有咬勁，不過阿媽唔鍾意食凍野，佢又嫌豆角唔夠腍。。。
2011年5月11日 星期三
2011年5月10日 星期二
傳統乾麵餅 Traditional Dried Noodle
我同屋企人都幾鍾意食紅磡張X記既麵餅，特別係其中最簡單兩種：全蛋麵同蝦子麵。呢間麵廠有五十幾年歷史，師傅整麵都有一定水準，好過超市賣果D乜乜牌物物牌。
不過乾麵餅原來一D都唔平，最平既「全蛋麵」都要三十幾元斤，一斤大約十個。前日買左一斤全蛋麵同一斤蝦子麵，用左84.8元。全蛋麵平均3.82元一個，蝦子麵平均4.66元一個，貴過出前一丁架。
自己淥麵餅，加D豉油熟油已經唔錯。好過食埋晒D味精味粉。
整番碟「乾炆蝦子麵」：
1) 在鑊內放入兩碗清水，煮滾。
2) 落少少油。
3) 放入蝦子麵兩個，中火煮開，攪散。
4) 我家有一樽張X記蝦子，加左少少「加料」，如果冇可以唔落。
5) 慢慢煮直至麵完全吸收水份並略為收水，上碟。
6) 乜野調味都唔駛落，呢個乾炆法令麵餅完全索番本身既味，冇流失，已好夠味。
霸王花鮑魚骨湯 Night Blooming Cereus Pig Bone Soup
材料：
乾霸王花適量。鮑魚骨30元。蜜棗三個。陳皮一角。南北杏適量。
做法：
霸王花浸軟洗淨撕開剪好。
鮑魚骨出水沖洗乾淨。
用大瓦煲煲滾十碗水，將材料放晒入去，煲滾再轉文火煲三個鐘，調味即成。
呢個湯都幾好飲架，霸王花又好特別，響網上剪左一段介紹：
霸王花即劍花，因其花大有穗，根莖特別發達，攀爬能力特強，霸氣十足，故稱“量天尺”，又稱“霸王花”。對治療腦動脈硬化，心血管疾病有明顯療效，能清熱潤肺，除痰止咳，滋補養顏，是極佳的清補湯料。
2011年5月7日 星期六
魚露豆豉鯪魚炒飯 Fish Sauce Fried Rice With Dace
豆豉鯪魚一條(走豆豉)剪碎。
飯兩碗。蛋一隻。薑粒、蔥粒適量。魚露適量。
先炒個蛋炒飯底，加入魚露調味炒勻。
撥開飯中間，爆香豆豉鯪魚粒。
再炒入飯粒炒勻，最後落蔥粒再炒勻炒至飯香乾身即可上碟。
啫啫雙通菜煲 Sizzling Double Hollow Vegetables Pot
又黎抗通脹小炒先，買左半斤大葉通菜，半斤柳葉通菜，用左八元，用黎整個啫啫雙通菜煲。
起鑊料：
1) 薑絲 2) 蒜頭 3) 乾蔥 4) 紅椒絲 5) 蝦膏 6) 鹽
通菜：兩種通菜洗淨，瀝乾水，切好備用。
蝦米：蝦米仔浸軟洗淨備用。
瓦煲：用慢火燒住瓦煲備用。
燒熱鑊，落油，爆香所有起鑊料，再放入蝦米炒香。加入通菜炒勻，炒至八成熟，兜入已燒熱瓦煲內，將通菜「啫」熟即成。
快D趁熱開飯喇。。。
2011年5月2日 星期一
鹽焗蛋 Salt-baked Eggs
整鹽焗蝦後留低成煲鹽，就咁掉左好晒，於是用黎整多一次鹽焗蛋。
個煲仔可以一次焗五隻雞蛋。要用慢火煨焗，開始時唔可以一直燒個煲，要燒下焗下直至蛋熟，如果唔係隻蛋可能會爆。
焗蛋既質感幾得意，同蒸蛋煮蛋唔同。
鹽焗蝦 Baked Shrimps In Salt
行街市見到冰鮮蝦，54元斤，買左一斤，有24隻。試整鹽焗蝦。
用美國Lodge生鐵煲仔焗。蝦洗淨，修剪一下，挑腸，索乾水備用。
煲內放好錫紙，先鋪一層粗鹽，將蝦一排排放入，加鹽，一層層排好，用鹽封好。加蓋，中火燒煲15分鐘，再焗5分鐘。
開蓋，將蝦取出上碟即成。
焗蝦可保留原汁原味，呢次試整乾左少少，呢個size既蝦應該全程12-15分鐘就得。
豆腐生菜魚球湯 Bean Curd Lettuce Fish Ball Soup
再整個湯。滑豆腐一塊三元切碎，放入一鑊大滾水中，加油鹽薑片滾一陣。
鯪魚膠用匙羹逐羹逐羹筆入湯中，做成魚球。再滾起滾十五分鐘。
調味。如果想好味D，可以用雞湯底滾呢個湯。
碗中放生菜絲，將滾湯用料倒入碗中，將生菜絲灼熟即成。
蠔油豆腐 Fried Bean Curd In Oyster Sauce
買左兩塊滑豆腐，六元，整一送一湯。
其他配料：生菜一斤五元，魚膠四兩七元。
先整個送：
呢個又係抗通脹菜式，成本唔駛五元！
生菜一棵，用油鹽水灼熟，圍碟備用。
豆腐一塊開十，煎至兩面焦香，落蠔油獻(蠔油、粟粉、盬、糖、生抽、紹酒)炆一陣至獻汁濃稠。
將豆腐排在生菜中間，淋上獻汁，加少少芫茜即成！簡單有益又好味！
2011年5月1日 星期日
馬蹄粟米紅蘿蔔排骨湯 Water Chestnut Carrot Sweet Corn Spare Rib Soup
今日買左馬蹄，粒粒都好靚。
再買左一條粟米，一個紅蘿蔔，斬左27元排骨頭，再買包南北杏，煲左個馬蹄粟米紅蘿蔔排骨湯。
馬蹄洗淨切頭切底，專登唔刨皮，煲好湯連皮都可以食埋。
所有料放入瓦煲，文火煲四個鐘，即成。唔調味都非常甜美，加少少鹽平衡下，吊出肉味，仲好飲！
眼仔碌碌馬頭魚 Chilled Horsehead Fish
你睇下眼仔碌碌架，算好新鮮啦！
今日魚檔好多冰鮮馬頭魚賣，大條小小要2.5元一兩，我見碟碟15元碟既魚仔都好靚，買左一碟15元有3條，醃鹹佢香煎，會好好味！
桂林馬蹄 Kwai Lin Water Chestnuts
全街市只有一檔賣馬蹄，係桂林馬蹄，八元斤，成籮馬蹄都係俾泥封住，未經清洗，好有原始風味架。
我買左五元，洗乾淨，馬蹄其實好靚架，天然顏色好有古典味。
訂閱：
文章 (Atom)