鹽蒸芋頭仔 Steamed Baby Taro With Salt

中秋節除左食月餅，就係食芋頭仔。

其實仲有好有特色既菱角，不過我唔知點整。

街市差唔多檔檔都有芋頭仔賣，買左十元，有十二個。

將芋頭仔徹底清洗乾淨，用鹽水浸佢一陣，再幫佢地洗白白。

最好預先一日將芋仔曬乾，略收水。



放入蒸籠，灑上適量粗鹽，加蓋蒸25分鐘就食得。

出籠喇！

芋仔可擺放好幾日，攤凍食，收乾水食都咁正。

灑D砂糖食，都好正。

 

昆布海藻冬菇排骨湯 Kelp, Seaweed, Mushroom And Pork Spare Rib Soup

今日卒之可以試下響CitySuper買既「日本三寶」：昆布、海藻、原木菇。



一於煲番煲昆布海藻冬菇排骨湯。

屋企有人唔鍾意飲昆布海藻，未飲已經話腥喎。未飲又點知呢，試下先啦。

昆布跟說明做法，浸軟後用慢火煮5分鐘，去左D潺，再用清水過乾淨。

海藻同冬菇洗淨浸軟。

排骨頭30元，洗乾淨，出水，去碎骨。

先煲個排骨湯底，將排骨頭連同冬菇、兩粒蜜棗煲一個鐘。



跟住落埋昆布片，海藻，轉中慢火再煲一個鐘以上。

熄火、調味。



湯渣可以點豉油食，個湯其實好清甜滋潤，我唔覺腥喎。



昆布海藻含豐富碘質，間中飲下都幾好架。

月餅 Mooncakes

今年屋企揀左食美心月餅，雙黃蓮蓉同雙黃白蓮蓉都有買。

白蓮蓉自從好多年前俾人捧上天之後，一直都廣受歡迎。

其實食真的，我認為黃蓮蓉仲好食。

白蓮蓉清甜。

黃蓮蓉香甜。

各有各好食，我更加鍾意黃蓮蓉。

另外又買左盒東方小祇園月餅，呢間係著名齋廚。

佢既月餅可以逐個買，任你揀，我買左兩個雙黃白蓮蓉，

兩個雙黃蓮蓉。仲未食呀。

日本即食麵：沖繩そば(蕎麥麵) Japan Instant Noodle: Okinawa Soba Noodle

試下呢隻沖繩そば，查日漢詞典，そば係蕎麥麵。

一剪開個包裝袋就聞到麵香，隻麵餅係微長方形，麵條扁身。

味粉包一開二，一邊係鰹魚豬軟骨味湯粉，一邊係七味唐辛子粉。

參照指示煮出黎，碗麵就係咁樣。

麵身微韌，頗彈牙，夠香。味粉湯都唔錯。

偶然試下，都幾好。不過唔可以講有驚喜。

去城市超市買日本食品 Japan Food Bought From City Superstore

屋企附件淨係得惠康、百佳、佳寶超市，

買黎買去都係買類似食物。

有日經過沙田城市超市CitySuper，入去逛下，

樣樣都未見過，好多野買，好似大鄉里出城咁，

結果唔覺唔覺就買左三百幾蚊。

睇下我D戰利品(其實係我變左人戰利品多D)

1) 日本鳥取縣原木菇，$120

2) 北海道真昆布，$36

3) 買左昆布，就順便買埋海藻，伊勢產海藻，$27

4) 見到各種各樣既麵條，執左兩包，呢包係山形縣麵條(烏東)，$34


5) 呢包係長崎縣素麵，$49

6) 行兩行又見到好多即食麵，買左幾包，呢包係沖繩小麥(蕎麥)麵，鰹魚豬軟骨汁味，$14

7) 呢包係九州風味老麵，鹿兒島黑豚肉骨焦蔥風味，$14


8) 呢包係福岡縣產中華蕎麥麵，鹽味，強調不含合成化學劑，$26 (貴！)

9) 見到呢包韓國黑豆醬撈麵，又買埋，$15

10) 跟手又買左包雜果仁燕麥片包，$42.5

買左咁多，得閒逐樣試下，希望物有所值啦。

你地有冇好介紹呀？

茄片煎鮫魚 Fried Mackerel With Tomato Slice

今日見到魚檔既鮫魚幾靚，買左兩塊16元，再買個番茄。其實我好少食鮫魚，覺得佢會腥。

返屋企洗乾淨兩塊魚肉，索乾水，灑適量幼鹽，再灑D荳蔻粉，放入雪櫃雪佢三個鐘。

煎時用隻平底鑊，落少少油，將兩邊煎至微焦香，鍾意香口D可以煎到兩面香脆。

將魚鏟起，再煎兩片番茄，放在碟上，再放上鮫魚，灑少少蔥花，一碟簡簡單單既煎鮫魚就完成喇。

估唔到喎，好好味喎。鮫魚骨唔多，啖啖肉，一D都唔腥喎。

三黃蓮蓉月餅 Triple Egg Yolks Lotus Seeds Paste Mooncake

我喜歡傳統月餅，一個整得好既傳統月餅，本身就係一件藝術品。

今年第一次試食美心三黃蓮蓉，係傳統黃蓮蓉，獨立石榴紅色鐵盒包裝。

好精緻，個餅整得好靚。

餅皮花紋同字體都紋路清晰，令人感覺得到製作認真。

靚到有D唔捨得切開佢。



蛋黃漏油，皮薄而軟。

蓮蓉香、甜、滑，餘味悠長。真係抵讚！

好味！

焗葡汁雞飯 Baked Chicken Rice In Portuguese Style Sauce

新版yahoo第一個問題就係，中文字體大小一係就太細，一係就太大，冇左舊版大小岩岩好既字體。唔該執執佢啦！！

屋企又食剩成兩碗飯，整咩好呢？今日諗既就係整焗葡國(汁)雞飯。
查下資料，整葡汁都幾多功夫，又要買幾多材料，於是就偷懶，去超市買樽「葡汁」，都係13個幾，都算平。

再去菜檔買紅蘿蔔一條，薯仔一個，洋蔥一個，磨菇一包，去雪肉檔買左塊雞扒。
做法：
1) 雞扒醃好後切件，煎香煎至兩面金黃色兜起。

2) 原鑊爆香乾蔥頭，炒個蛋炒飯底，用焗碟盛起。
3) 爆香磨菇、洋蔥，炒至四成熟兜起。
4) 爆香適量葡汁，落紅蘿蔔、薯仔，加水煮至腍身。
5) 將雞扒、洋蔥、磨菇回鑊，同紅蘿蔔、薯仔一齊炆煮。

6) 調較葡汁至適量份量和濃度。

7) 將汁，料淋在飯面，放入已預熱200度焗爐內焗至表面焦香即成。

呢隻葡汁好夠味，材料調味時記得唔好太重手。

 

 

酸菜乾煮鯇魚腩 Braised Fish Belly With Dried Sour Vegetable

上個post要你地估個樣野，係酸菜乾黎。呢棵酸菜乾係我自家曬架！響酷熱天氣警告既大太陽下面曬足一個星期，大大棵酸菜就變左酸菜乾喇。

做法：

酸菜一大棵，用鹽水浸一段時間之後，用清水沖洗乾淨。吊起掛在猛烈陽光之下，曬一星期變成酸菜乾。
將酸菜乾再浸入清水中，俾佢吸足水份，剪成短度，渣乾水備用。

鯇魚腩一塊洗淨，用鹽省勻，放入雪櫃醃佢一個鐘以上。然後索乾水，燒熱鑊，落油、薑片，將魚腩煎至兩面微金黃。

 

贊入多量滾水到正煎魚既鑊內，放入酸菜乾，一湯匙紹酒，麻油，糖，乾指天椒，加蓋用中火煮魚。


煮約半小時，至汁液略收，試味調味後即可上碟。

呢個係煮魚，唔駛埋獻，要有較多湯汁留在碟內，先有風味。



酸菜乾食法同口感都同普通酸菜唔同，同用白鑊烘乾再炒既酸菜都唔同架。

呢個煮魚鹹、鮮、酸、辣，好好食架！