瓦煲炆牛腩 Stewed Beef Brisket In Clay Pot

25元買左個白淨鐵線瓦煲仔，炆左煲沙茶牛腩。

普通牛腩一斤要62元，好貴。檔口阿哥送埋花椒八角同香葉，仲送左一盒仔沙茶醬。

牛腩出水洗淨後，用個瓦煲爆香，再加入滾水，用中細火炆左兩個幾鐘，加埋少少紅蘿蔔同沙茶醬，再炆至半收汁。

原煲炆原煲上，咁先夠風味。

日本山本山煎茶(綠茶) Japan Yamamotoyama Sen Cha (Green Tea)

 

逛沙田城市超市，又買左一堆食物，第日逐樣講下。今日先講呢包日本山本山煎茶。



綠茶葉以「嘉道」命名，集合三個縣既茶葉，埼玉縣佔70%，其餘來自靜崗縣及鹿兒島縣。



茶葉大小不一，有整片又有碎片，又有葉柄。

用我隻黑萬花蓋碗沖一碗，加蓋泡一泡再飲。



清香。

韓國即食麵：黑豆醬撈麵 Korean Instant Noodle: Black Bean Paste Potato Ramen

今日食埋呢包韓國黑豆醬撈麵，15元包。

典型韓國即食麵餅，一大包黑豆醬。

撈勻就食得，睇樣好似好鹹，其實味道岩岩好。都唔錯。

包黑豆醬仲有少少肉粒仔，唔係齋黎。

全麥淨包 Whole Wheat Bread

用麵包機搓揉麵糰，再自己整包，整左好多次，效果都係差唔多。

個包包好有份量，密度較高，包身較硬，同出面包鋪既鬆軟、密度低、包身輕既包包，差好遠。

主要原因我估係我未掌握好發酵時間同技巧。

不過自己整既又真係真材實料，冇添加古靈精怪既化學成分，又有咬勁，都可以接受啦。

罐頭篇6：回鍋肉 Canned Food: Sliced Pork In SzeChuan Style

 

梅林牌版本有三，有上海版、有北京版，又有海外版(午餐肉)。

此款回鍋肉則有北京、上海二版，相中乃上海版，包裝紙條圖案設計顏色與舊時不同。

至此方知從前慣吃之回鍋肉，實乃今之北京版也。

此上海版回鍋肉，味道與慣吃者亦稍有不同，實為稍遜也。

筍片大而粗硬，肉塊則略嫌乾瘦細碎，辣油色澤也過於橙紅。



家中另購有北京版一罐，他日開食，當再作比較。

清炒雙蔬 Stir Fried Double Vegetable

呢碟雙蔬係椰菜同菜心。

椰菜耐煮而爽甜，要先落鑊加少少水炒，然後先至落味道較清淡既菜心。



加多薑絲，贊埋紹酒，特別香。

鍾意食辣可以加埋指天棷，又以整下色水。

椰菜炒菜心，兩種菜口感同味道都唔同，炒埋一碟又幾夾喎。

此所謂「和而不同」。

雪菜鹹肉蝦仁 Stir Fried Preserved Vegetable, Salty Pork And Shrimps

雅虎唔知搞乜，新版差過舊版，唔夠User-friendly呀喂！今晚上唔到相呀！而家上番都係要出聲！唔該整好D佢啦。

材料：

1) 青、黃雪菜各一棵。(只須用約十分一分量)
2) 雪蝦一斤。
3) 豬腩肉一小塊。
4) 指天椒兩隻。
5) 蔥適量。



做法：

1) 雪菜用鹽水浸一浸，再過清水減去部分鹹味，切細粒，渣乾水。薑粒爆起鑊，落雪菜、贊少少酒、落少少糖、麻油先炒香備用。



2) 雪蝦清理好，入雪櫃抽乾水。燒熱油，爆香炒至八成熟備用。
3) 豬腩肉用鹽水煮至腍身，攤凍後切幼條備用。
4) 所有材料準備好後，燒熱鑊，落少少油，爆炒鹹肉，炒至微焦，放入蝦仁、雪菜，快炒，落指天椒粒、埋獻收汁上碟。



5) 灑上青蔥粒。

紅青蘿蔔排骨雞腳湯 Carrot, Green Turnip, Pork Rib And Chicken Feet Soup

 

唔忿氣又用大砂煲煲湯喇。個煲夠大，一於買多D蘿蔔，落左三個青蘿蔔，一個大紅蘿蔔。




三十元排骨頭，四隻雞腳，仲有四隻冬菇，三個蜜棗，適量南北杏。

今次響個砂煲底加番塊平均散熱板。

 

用最細火煲左六個鐘，真係天光煲到天黑。咁樣煲湯而家冇人有耐性喇。

 

 

 

黃芽白煮午餐肉 Braised Cabbage With Luncheon Meat

黃芽白要煮腍先好食，平時就咁用大量薑絲煮黃牙白已經好好食。

想好味D可以落蝦米。食剩左午餐肉，可以用黎煮黃芽白，都幾正。

北京梅林午餐肉兩塊切幼條，黃芽白五大片切幼條，大量薑絲，再加四隻乾椒切粒。

煎香午餐肉，落薑絲，加水，加味，落黃牙白，加蓋煮到腍，最後落乾椒再煮一煮。



食得！

西洋菜蝦乾乾蒸肉餅 Dry Streamed Watercress, Dried Shrimps And Minced Pork

呢碟用蒸籠乾蒸，蒸完就係一舊菜肉，冇汁。

你話有汁好定冇汁好？

 

 

西洋菜羅漢果豬肘湯 Watercress, Dried Mangosteen And Pork Soup

買左呢個東莞雲鼎冇一個月，煲左四次湯就裂底喇。

我已經係用中火、細火煲，現代煤氣爐火力真係猛，普通瓦煲真係頂唔順。

今次煲完呢個西洋菜羅漢果豬肘湯，煲底就出現一條裂紋，仲有燒乾左既漏湯痕跡。

48元個煲，用四次，即係12元一次。XYZ#%/妖/*(<<@!!!

西菜蝦乾蒸肉餅 Streamed Watercress, Dried Shrimps And Minced Pork

蒸肉餅好簡單，加多D菜健康D，例如呢碟加左西洋菜，再落少少蝦乾，就已經好好味。

材料：

1) 半肥瘦豬肉30元絞碎。
2) 西洋菜適量 (屋企煲西洋菜湯拎起一D就得)。
3) 蝦乾適量。

4) 辣椒乾三隻。
5) 薑米適量。
6) 葱粒適量。

做法：

1) 半肥瘦調好味，醃好雪一個鐘。(醃料：豉油、糖、鹽、雞粉、紹酒、麻油、生粉)
2) 西洋菜洗淨切細粒。

3) 蝦乾浸軟切粒。
4) 將西洋菜、蝦乾粒、辣椒粒、薑米搓入豬肉內，搓勻。可以做到兩碟。


5) 將肉餅蒸十五分鐘。
6) 灑上蔥粒即成。

呢個西菜肉餅，係咪諗起西洋菜豬肉水餃既餡呢，其實就咁食都好好啦。

早幾日仲蒸左個韭菜肉餅，我鍾意食韭菜，覺得仲好味。

蝦乾蝦子乾燒伊麵 Braised E-Fu Noodle With Dried Shrimps and Shrimp eggs

我咁講一定會俾大師傅鬧：整乾燒伊麵真係易到痺。

屋企有蝦乾、蝦子，想食伊麵，就係咁簡單。

大伊麵兩個(兩個已經可以整到一大碟，隻碟細D都裝唔晒)。

用凍水沖一沖乾淨，瀝乾水。我既做法係完全唔駛先煮再過冷河，咁樣做個麵會變得太腍同好易爛。

蝦乾浸軟剪成粒，用薑起鑊，爆香。

加入已浸軟既日本冬菇，加水，加味(鍾意咩味隨個人喜好)，炆煮十幾分鐘。

此時加入伊麵，吸收汁液，煮軟，控制鑊內水量，燒到伊麵有乾身感覺。

加入蝦子、韭黃，撈勻，熄火上碟。

碟邊圍上菜遠，好睇又好食。

呢碟乾燒伊麵出街食一定冇咁大份量，一定冇咁平。

抗通脹，就要多D自己煮食。