我好怕整有頭有眼既食材，例如雞、魚，所以好少整，蝦係例外。又唔識斬雞，所以完全未整過全雞。
見惠康有斬好左冇頭既江豐雞，半隻一包，就買左一包。用半包鹽焗雞粉，想試整鹽焗雞。
我知道一開始就已經唔岩，因為隻雞已經斬左，雞皮焗完肯定會收縮，味道亦會流失，不過好過冇得整啦。
做法：將雞索乾水，落大約半包鹽焗雞粉，紹酒，海鹽，少少糖搽勻雞件，砌番好，醃佢兩小時。
用錫紙包好，放入焗爐用200度焗30分鐘，即可上碟。
個樣同味道都可以啦，不過雪雞點都冇得同新鮮雞比架喇。
2012年7月8日 星期日
鹽焗雞 Baked Salted Chicken
我好怕整有頭有眼既食材，例如雞、魚，所以好少整，蝦係例外。又唔識斬雞，所以完全未整過全雞。
見惠康有斬好左冇頭既江豐雞，半隻一包，就買左一包。用半包鹽焗雞粉，想試整鹽焗雞。
我知道一開始就已經唔岩，因為隻雞已經斬左，雞皮焗完肯定會收縮，味道亦會流失，不過好過冇得整啦。
做法：將雞索乾水，落大約半包鹽焗雞粉，紹酒，海鹽，少少糖搽勻雞件，砌番好，醃佢兩小時。
用錫紙包好，放入焗爐用200度焗30分鐘，即可上碟。
個樣同味道都可以啦，不過雪雞點都冇得同新鮮雞比架喇。
2012年7月7日 星期六
薑蔥蠔油蝦皮撈麵 Noodle Mixing With Ginger, Green Onion, Dried Small Shrimps in Oyster Sauce
用蝦記蝦子麵整左呢碟薑蔥蠔油蝦皮撈麵。
薑蔥撈麵食得多，今次落埋蝦皮，要自己整先有得食啦。
1 蝦子麵兩個用我鍾意既乾燒法整好。2 切好薑絲蔥絲，用熱油爆炒，放在麵上。3 用蠔油汁炒香蝦皮，淋在麵上。
然後，就係撈呀撈呀撈呀！
撈勻就食得，可以分出三四個食飯碗撈麵架！
燒臘檔 Roast Meat Stall
食燒臘你鍾意邊款呀？
燒臘好食，我家經常係正餐既菜式，貪佢買番黎就食得，唔駛整。行政總廚而家係半退休狀態，多左買燒臘做送。
不過燒臘就係咁掛晒出街，好多燒臘鋪都係響店外開個露天檔，掛起晒D燒臘黎賣，係香港城市一景，你睇下呢間既掛架幾宏偉！你睇下幾多選擇！
街上人多車多，有時沙塵滾滾，有人覺得唔係太乾淨。可能掛左成朝都係咁買黎食，食之前你地會語會「爆」下佢呢？
燒肉有時骨有血，一定「爆」，但係雞就唔想「爆」，因為爆完就唔好食。
2012年7月6日 星期五
鹽水荔枝 Lichee In Brine
喂喂喂，唔係湯丸呀，係荔枝呀。
網友「加油加油」話佢媽媽教落用鹽可以令荔枝冇咁燥火，於是我就浸左呢兜鹽水荔枝喇。
一浸就浸左18粒，放入雪櫃雪凍，今朝食下一粒，食下又一粒，結果食鬼晒。
而家個喉嚨都冇事喎，一D都唔覺燥火喎，真係得喎，
唔該晒阿加油媽媽！
街邊大排檔 Roadside Cooked Food Stall
今時今日唔少「大排檔」已經上左樓，有好幾間摩登餐廳都自稱「大排檔」。
其實原裝大排檔都係響街邊開，而家又係屬於「瀕危物種」，要品嚐真正大排檔風味，真係要行快兩步趁早喇。
呢個大排檔仲請緊人喎，祝老闆生意興隆呀！
有型燒臘飯店 Stylish BBQ Restaurant
燒臘係香港道地美食，馳名世界。香港地「燒臘飯店」好多，但係講到有型，我會選呢間做第一名。佢仲係「海鮮燒臘飯店」添喎！
有冇見過咁大個咁多字既橫式招牌？
成幢樓既設計風格幾有型！而家真係少見，應該「保育」，即係維持原狀，繼續服務平民大眾。千祈唔好搞「活化」，最忌俾財團改頭換面。
得閒同行政總廚去食番餐先！
2012年7月5日 星期四
瑞士雪糕 Swiss Ice Cream
呢個瑞士雪糕招牌好型呀！
成層樓外牆都做呢款六十年代批盪式招牌，都算大陣仗。但係間鋪早已執笠封艇，市區重建，社會發展，舊物淘汰殆盡！
有冇人食過「瑞士雪榚」呀？我就冇乜印象喇……
上網查下資料，有咁既一段：
SWISS ICE CREAM COMPANY LIMITED於 1964-02-29 在香港成立.
該公司在運營 37 年後，宣告解散
公司在香港的注冊編號為 0009797 ，屬於香港本地公司（私人公司）
2012年7月3日 星期二
冰室與麵廠 Ice Cafe And Noodle Factory
今日出下外景先！
香港一味向前行，似乎唔記得後面仲有D值得珍惜既野。
我覺得冰室同麵廠係香港道地飲食文化既兩大特色。而家叫做「冰室」既，都係又殘又舊，真係拆下一間又少一間。
「麵廠」就仲有唔少，仍能保持一定水準，但係好多鋪面都已經「溶溶爛爛」，唔知仲可以支撐得幾耐呢？
入去買左一斤普通蝦子麵，38元有十個，都係標準裝啦。
香港一味向前行，似乎唔記得後面仲有D值得珍惜既野。
我覺得冰室同麵廠係香港道地飲食文化既兩大特色。而家叫做「冰室」既，都係又殘又舊，真係拆下一間又少一間。
「麵廠」就仲有唔少，仍能保持一定水準，但係好多鋪面都已經「溶溶爛爛」，唔知仲可以支撐得幾耐呢？
入去買左一斤普通蝦子麵，38元有十個，都係標準裝啦。
糯米糍荔枝 Lichee
係咪靠害呀，岩岩食完薑醋，又買咁多糯米糍荔枝番黎，好燥架喎。
不過D荔枝又幾靚，仲超多水超甜添。
以前猜謎語有所謂：
紅布包白布……(下接十個字)。謎底就係荔枝。
你識唔識接呢十個字呀，唔好扮唔識喎，接得上既雖然未必一定係「長者」，但點都係「老餅」一個啦！
2012年7月2日 星期一
豬腳薑蛋醋(一日後) PTGE In Sweetened Vinegar (One Day Later)
浸左一日，翻熱就食得。味道完全同以前食既豬腳薑醋一樣。甜酸配搭恰好，豬腳薑唔係咁難整喎。
我主要係食蛋，所以霸左兩隻。你睇下似唔似台灣D鐵蛋？
甜醋好好味，但係肯定有超多糖，都係少食多滋味為佳。
2012年7月1日 星期日
豬腳薑蛋醋 Pig Trotters, Ginger And Eggs In Sweetened Vinegar
冇人生仔坐月要食薑醋呀，唔好誤會。係口痕想食薑醋D蛋，所以就整左呢個輕巧版既豬腳薑蛋醋喇。
生仔煲薑醋用料十幾斤十幾斤咁買，仲要用個巨煲。我今次只係輕量級煲醏，用料如下：
1) 添丁甜醋一支500ml
2) 黑糯米醋細半碗約100ml
3) 豬腳一包有六件
4) 大舊薑六塊
5) 雞蛋六隻
做法跟足支同珍添丁甜醋，抄錄如下：
將豬腳約600克洗淨及斬件，放入滾水中煮30分鐘後瀝乾。雞蛋4隻(我志在食蛋，加多2隻)烚熟去殼。
薑150克去皮洗淨，燒熱鑊將薑炒至乾身，並加入添丁甜醋500毫升、黑米醋100毫升(我先將薑轉落瓦煲，再落醋)。
煮滾後用慢火煲約一小時，再加入豬腳及雞蛋，以慢火煲約二至三小時，浸約一天後翻滾即可食用。
忍口唔食住，浸佢一日，聽日先食！一人一隻蛋、一舊豬腳、一至兩塊薑，可以分出六份！
2012年6月30日 星期六
咖哩豬柳飯 Curry Pork With Rice
要食咖哩豬柳飯，除左要煲飯，當然就係要煮一大兜咖哩豬柳啦。
唔鍾意豬柳，可以整牛柳、牛腩，不過咖哩牛食得太多，所以想試下豬柳。
材料：咖哩粉兩包，今次用左冠益華記小包咖哩粉。洋蔥一個。番茄一個。豬柳一條。椎果適量(可以唔落)。香葉兩片。
肥哉版做法：豬柳切片，用醃料醃夠時間，最好醃過夜。洋蔥、番茄、椎果切細粒。燒熱鑊落油，落咖哩粉爆香，落洋蔥、番茄、椎果，再落冰糖、加水先煮個咖哩濃汁，要煮到洋蔥番茄同椎果都溶入汁中。另外用薑片起鑊，落油，爆炒豬柳片，炒至微焦香，加入咖哩汁中，再煮至豬柳全熟，汁液夠濃稠即可盛起。
嘩，呢碟咖哩豬柳，可以夠送好多碗飯，唔駛整第二樣送啦。
咖哩豬柳飯到，熱辣辣，想食「大辣」就再加辣油啦，正！
2012年6月24日 星期日
學斗豆腐炆火腩 Stewed BBQ Pork Belly With Bean Curd And Vegetable
過節一定買燒肉，一餐食唔晒，第日用黎做咩好呢？
最常用黎炆豆腐啦，加埋學斗白菜，可以多一點變化，又有營養。
呢個送可以整多D汁，用黎撈飯好開胃。燒肉揀比較入味同較瘦既，例如近沙梨篤仲正。
材料：布包豆腐一塊，學斗白菜半斤，隔夜燒肉適量。
先煎好豆腐，再爆香火腩，又炒好學斗白菜至八成熟。
再將豆腐、火腩回鑊，轉中慢火炆之，落老抽、蠔油、紹酒、魚露調味，炆至火腩出味，豆腐索晒味，此時加入學斗白菜，轉大火快炒至全熟。
埋獻留適量汁液即可上碟。
辣椒腐乳炒通菜 Stir-Fried Hollow Vegetable In Chili Bean Curd Sauce
你地去酒家食晚飯，會唔會例必點一碟炒青菜架？
我越黎越覺得響酒家點炒青菜，價錢太貴，貴都預左，但係真係未必好過自己炒。
所以，去酒家食飯，我而家寧願食少碟菜。
父親節去某名廚名下酒家晚鈑，就叫左碟腐乳炒通菜，炒出黎真係差過我自己整，要收80元碟！
自己炒，用左香港名牌廖孖記辣椒腐乳三磚。
白通菜(柳葉通)一扎五元。適量蒜蓉，就係咁簡單。
新買一樽廖孖記衛生腐乳王，要40元樽。個包裝係傳統式，冇啤膠封口，難免「漏汁」，感覺唔係咁「衛生」，
但係開蓋後香氣四溢，佢既腐乳係有番咁上下水準既。
用三磚就岩岩好，唔駛落鹽。白通菜洗淨切好，一定要瀝乾水，以炒時唔會大量出水為合。炒就好簡單，燒熱鑊落油，爆香腐乳蒜蓉，爆至香噴噴，落通菜用大火快炒，炒到菜熟收水上碟。
簡簡單單一碟腐乳炒通菜，即使計二元一磚腐乳，成本都係十一元。行政總廚都話好食過酒家！
2012年6月23日 星期六
2012年6月17日 星期日
薯蓉「比薩」 Potato Paste "Pizza"
唔好誤會，呢個薯蓉「比薩」唔係Pizza黎，冇落麵粉，全部係薯蓉黎架。
兩個大薯仔就可以整到一大碟，一家食完先出去wet慶祝父親節！
材料：
大薯仔兩個，煙豬腩三條，紫洋蔥半個，芫茜三條。
做法：
薯仔連皮切片隔水蒸熟，搓爛備用。煙豬腩切度，紫洋蔥切粒，芫西切碎。
燒熱鑊落少少油爆香煙肉，爆至出油，落洋蔥爆炒一陣。
將煙肉同洋蔥放入薯蓉中再搓勻，落鹽、糖調味。
放入雪櫃雪凍雪至較硬身。
燒熱平底鑊，落少少油，將薯蓉放入鑊中壓平鋪落鑊底，用中慢火煎至兩面黃，落芫茜再將兩面煎香即可上碟。
一大碟切開八大塊，阿爸食多塊啦！和味！
訂閱：
文章 (Atom)