嘩，上倉呀？買咁多，如果係車輪鮑就正啦。食完因住要通波仔喎。
冇法啦，一時手痕就買左，呢款「夾硬監你一買就」六罐裝火腿豬肉(佢唔叫午餐肉，用料靚少少架)，白豬仔，好味D架。
仲送條方巾，我諗姐係「碗布」掛，買番黎即晚已經煎左一罐加送。
又真係幾好味，整餐蛋飯、餐蛋麵都掂。我都係覺得呢類罐頭點都係要祖國出品先岩口味，外國果D唔係果回事。
條方巾原來都好正，吸水力強，又有彈性，用黎抹碗好快乾。
呢款「夾硬監你一買就」六罐裝，賣$65.9，平均每罐唔駛11元。算抵啦。
2012年10月8日 星期一
白豬仔火腿豬肉六罐裝 White Piggy Chopped Pork And Ham Six-Can Package
嘩，上倉呀？買咁多，如果係車輪鮑就正啦。食完因住要通波仔喎。
冇法啦，一時手痕就買左，呢款「夾硬監你一買就」六罐裝火腿豬肉(佢唔叫午餐肉，用料靚少少架)，白豬仔，好味D架。
仲送條方巾，我諗姐係「碗布」掛，買番黎即晚已經煎左一罐加送。
又真係幾好味，整餐蛋飯、餐蛋麵都掂。我都係覺得呢類罐頭點都係要祖國出品先岩口味，外國果D唔係果回事。
條方巾原來都好正，吸水力強，又有彈性，用黎抹碗好快乾。
呢款「夾硬監你一買就」六罐裝，賣$65.9，平均每罐唔駛11元。算抵啦。
2012年10月7日 星期日
「顛炒」係咪即係快炒加拋鑊呀？What Is "Vibrating" Stir Fry?
係花雕袖珍食譜睇到「顛炒」一詞，覺得幾有趣，響網上Google下，原來係炒菜常用詞，例如查「顛炒幾下」就有50幾萬條。
查漢英對譯，係stir-fry，即係「炒」。「顛炒」可能就係「快炒」，但係應該唔多似，因為個「顛」字實在太傳神。查中文詞典，「顛」有「震盪」的意思。
「顛炒」應該係「一路震一路炒」。有時見到好多大廚一邊快炒，一邊小動作拋鑊，兩個動作一齊做，可能就係「顛炒」之謂。請高人指教下！
2012年10月2日 星期二
煲粥炒麵 Congee And Noodle
今日貼文之前，要為昨晚南丫島海難事件遇難者致哀！人生無常，大家真係要好好保重，更加要珍惜眼前人！
幾日假期食左唔少肥膩野，今日一於唔食飯，煲一大煲粥，炒兩大碟麵(冇錯，係兩大碟)做正餐。
粥：柴魚花生瑤柱陳腎瘦肉粥
麵：韭菜豆芽土魷絲炒麵
煲粥料：
炒麵料：
粥：柴魚花生瑤柱陳腎瘦肉粥
麵：韭菜豆芽土魷絲炒麵
煲粥料：
炒麵料：
快D埋位食喇喂！
2012年10月1日 星期一
花雕酒袖珍食譜 Hua Diao Wine Mini Recipe
屋企樽煮送花雕用晒，去超市買，花多眼亂，唔知買邊樽好。
見到呢支花雕酒，樽頸吊住個招牌仔，打開一睇，原來係個袖珍食譜，就買左佢。
食譜用繁體字印，睇兩睇就知係由簡體字用機器轉過黎，錯漏唔少，反而平添額外閱讀樂趣！
你地睇下啦。
下面一款「三絲敲魚」真係第一次睇到，做法係將魚肉「用小木槌敲成魚片」，精彩！
呢款「海米珍珠筍」最後係要「顛炒」，真係唔知點為之「顛」炒呢？妙！
我最想跟佢整既係最後一味「醉雞」。不過唔知點解明明教人「放入鍋內加入葱、姜(薑)和水，加蓋」但係跟住又要「以強微波燜20分鐘取出」？個鍋唔知點解變左微波爐！
茄瓜芽菜炒肉末 Stir-Fried Egg Plant Green Bean Sprout With Minced Pork
街市有種「手指矮瓜」幾得意，買左一扎。用黎炒免治豬肉。
未炒已諗到呢個送會腍 bat bat，於是專登要落D細豆芽菜落去，等佢爽口D。
矮瓜隻紫色好靚，但係炒完碟送要保留佢既紫色，唔係容易。
我用少少食用梳打+鹽水浸佢，再走油，用左差唔多半樽油。結果都有一細半變左啡色。
矮瓜走完油要瀝去多餘油份備用。
再炒個芽菜肉碎，最後加入矮瓜，埋獻略收汁，上碟。
矮瓜今次走油時間長，應該快手D，效果可能會好D。
呢碟送，又腍又爽，唔錯！
2012年9月29日 星期六
豉汁蒸白倉 Steamed Write Pomfret Fish In Black Bean Sauce
我其實好少蒸成條魚，因為我唔係好鍾意整有頭有眼既食材。
不過今日行街市見到個魚檔，將各種各類魚排放得非常整齊企理。
真係令人眼前一亮，其中一大排白倉魚好搶眼，就忍唔買左呢條。
5元兩，呢條要40元，即係半斤=八兩啦。
番到屋企沖洗乾淨，抹乾水，落少少紹酒搽勻裏外，又搽左少少幼鹽，放入雪櫃等佢入味。
樁爛兩湯匙豆豉，拍碎蒜頭再切碎，又切定薑絲、蔥粒。開定甜豉油。一切準備好就可以蒸！
倉魚從雪櫃取出，底面搽少少油。鋪上豆豉蓉、蒜粒、薑絲。大水滾，中猛火蒸12分鐘。
蒸好後，淋上豉油、灑上蔥粒，贊熱油趁熱起筷！
2012年9月23日 星期日
大同月餅 Tai Tung Moon Cakes
買左兩個大同月餅試下，一個雙黃白蓮，一個雙黃蓮蓉。
大同月餅比我既感覺係比較傳統，古老。個餅油水充足，未切個餅底都會沁油。
細個時，月餅以「夠油水」做賣點，個餅皮係肥到漏油架。
細個時，行政總廚幫趁一間「祥利老餅家」，供月餅會，一次過就取餅十幾二十盒。跟行政總廚去餅家，見到好大個玻璃櫃檯，櫃檯裏係玻璃層格，月餅一個個分門別類放晒響度，非常壯觀。
果陣D月餅名堂多多，我最記得既有「寶鴨穿蓮月」(可能即係單黃蓮容月)，「蛋黃雞油月」，「欖仁蓮蓉月」、「伍仁鹹肉月」，「伍仁甜肉月」等等。
「祥利老餅家」響威靈頓街，一早已經唔見左咯。唔知你地有冇印象呢？
講番呢兩個大同月餅，油水多，蛋黃漏油，好甜，但稍欠蓮蓉香。
而家好多人買既榮華美心，月餅好乾身，已經唔係傳統走油水路數喇。
番茄煮牛丸 Braised Beef Balls And Tomato
番茄紅素聽講好有益，咁就要食多D番茄啦。
牛丸如果整得靚，好和味，最好買D靚野啦。一半牛丸一半牛筋丸，用番茄煮，又可以撈飯，又有咬口。
番茄先煮爛，調味。牛丸洗淨，揀幾粒切花，再爆炒至外皮微金黃色。
落埋番茄再煮至汁液濃香，加少少蔥花。
開飯喇！
鹹肉煮苦瓜 Braised Sliced Salty Pork And Bitter Melon
做人要食得鹹苦，試下呢碟鹹肉煮苦瓜就岩晒啦。
脢頭瘦肉用鹽醃過夜，再蒸熟切大片。
長苦瓜切成麻將牌大小，用鹽醃出苦汁，再浸幾次水。
用磨豉醬起鑊，爆香，落苦瓜、鹹肉，大火爆炒，再贊水加蓋煮至苦瓜腍身。
落少少指天椒，埋獻收汁上碟。
隻磨豉醬麻麻地，唔落可能仲好！
2012年9月18日 星期二
二手鵝掌冬菇炆米 Braised Second Hand Goose Feet Mushroom Rice Noodle
成班老友去食酒席，食到肚滿腸肥，間酒家既菜式又份量十足，食唔晒。
有碟蠔皇鮑片炆鵝掌，食剩成半碟，鮑片掃清光，剩番鵝掌冇人吼。
冇理由咁浪費，打包拎番屋企，掟入雪櫃幾乎唔記得左佢。
呢日醒起呢兜二手鵝掌，一於整番碟鵝掌冬菇炆米生菜底。
呢隻超平米粉竟然出奇咁軟滑，索晒D汁，非常好食。
炆鵝掌係酒家師傅既工夫，我只係執二攤乍，將廚餘recycle，整出一大碟，又一餐！
訂閱：
文章 (Atom)