鴨腳扎 Duck Feet In Bean Milk Sheet Roll

上次整鮮竹卷，仲用剩一大張腐皮，一直想整鴨腳扎。



今日用左細半張，就包左四隻鴨腳扎。



鴨腳扎係幾花功夫既點心，如果怕麻煩又或者唔鍾意整野食，就唔好試喇。

我既做法係咁：

1) 鴨腳四隻，洗淨出水、剪甲。再用蠔油、冰糖、紹酒、豉油，加水細火炆一個鐘以上至夠腍兼入味。熄火放涼。



2) 魚肚一塊開四份，冬菇兩隻開邊，浸透，然後放入炆鴨腳汁裏面慢火煮一陣。

3) 半肥瘦豬肉攪碎，落少少鹽調味，撻幾撻備用。

4) 腐皮剪長條狀四片，噴水令其微濕。

準備好以上各樣，就可以包：



將豬肉釀入鴨掌中，再加一塊魚肚、半隻冬菇，然後用腐皮捲實，用粟粉收口。



燒熱大鑊滾水，放入鴨腳扎隔水蒸12分鐘。

蒸好後淋上炆鴨腳獻汁，即成美味肥哉版鴨腳扎！



我冇用芋頭，其實以前D鴨腳扎係冇芋頭架。

火腿煮大白菜 Boiled White Cabbage And Ham Soup

雪櫃有一大包鹹火腿未用過，今日切一舊出來煮大白菜。



簡簡單單，有菜食有湯飲，火腿煮完仲可以切絲食番添。



大白菜一斤11元，洗淨然後裁切一下，例如將大塊既莖葉一開三。菜頭一開二。

火腿沖洗乾淨切片，另加多量薑片，放入大滾水中先煲個火腿湯底，煲至湯色變微白。



此時落白菜，加蓋煮滾再煮十幾分鐘至菜腍身即成，如果鍾意食腍至爛既白菜，可以繼續煮至合心水為止。



本來想落埋上次用剩既半包鮮白果，但係打開包裝發覺已經變左味，冇落。

如果落埋白果，味道同湯色效果會更加好。

皮蛋蝦米蒸豬肉餅 Steamed Minced Pork With Dried Shrimps And Thousand Year Egg

鹹蛋蒸肉餅食得多，今次要整個皮蛋肉餅，加埋蝦米，增加鮮味同咬感。


半肥瘦豬肉20元絞碎。皮蛋一隻切碎。蝦米適量切粒。薑兩片切粒。葱粒適量。材料就係咁多。



豬肉落鹽、糖、豉油、紹酒，攪入皮蛋、蝦米、薑粒、粟粉，撻幾撻，放入雪櫃雪一小時等材料入味。


一小時後，燒熱大滾水，蒸十二分鐘。

落蔥粒，用汁淋下即可上檯。


皮蛋蝦米蒸肉餅，味道同口感都唔錯架！

薑絲炒芥蘭 Stir-Fried Chinese Broccoli

今日想炒芥蘭，點知成個街市都冇芥蘭賣。結果去左隔離村街市，得兩檔有，一檔16元斤，一檔14元斤，貴呀！



14元斤乾水芥蘭好似仲靚D，就買左一斤。返屋企整個分體式炒芥蘭。



數一數，一斤14棵，即係1蚊1棵。

行政總廚炒菜好豪架， 一斤摘剩半斤炒，已經好忍手。佢炒芥蘭係唔會要D葉，淨係炒蘭度。咁搞法炒埋都唔夠一碟，太浪費喇。我食菜鍾意食葉，其實花都好食，於是乜都唔掉！將棵菜分體，好以整牛雜咁，剪開肺、腸、膀、肚。



將棵芥蘭分成四部分：葉、葉柄、莖(即蘭度)、花。全部炒黎食！



蘭度要削晒皮先炒得，削到我手軟，呢碟炒芥蘭係功夫菜黎！



用薑絲爆香，先放蘭度，再放花、葉柄，最後放埋葉。



落鹽、冰糖、贊水、贊酒炒至岩岩熟。



葉炳放碟底，葉同花圍邊，上面鋪蘭度，咁就冇浪費，一斤可以炒出一大碟啦！



只要芥蘭唔係太老，全部都可以食晒架！

番茄周打蜆肉湯火腿通粉 Sliced Ham Chifferi In Tomato Clam Chowder

為左抗通脹，已經響屋企自己整早餐一段時間。好似火腿通粉，就食左幾次。

通粉煮好放雪櫃，第二朝好快就可以加入火腿絲整出火腿通粉，不過日日食真係食到口淡。但係通粉仲有一大盒，食極食唔完。



今日一於加料買兩罐罐頭湯整埋佢。一罐番茄湯，一罐周打蜆肉湯，溝埋一齊煮火腿通粉。



煮出個濃湯火腿通，又有湯飲又有火腿通粉食，口味唔同左，人都開胃D。終於夾手夾腳將成大盒通粉掃清！



真係好食過茶餐廳既通粉好多架！

泡龍井茶 Dragon Well Tea

呢排青花熱，想試下泡茶。

 

岩岩買左罐平價龍井茶，獅峰牌70元。

幾鍾意呢種舊式包裝設計，條"木嘴"金魚幾搶眼，而家都係賣少見少架。我記得以前個罐面係塗上包裝圖案，而家係用貼紙貼響罐面，已經簡化左。



呢個檔次，講究飲茶既人唔會睇得上眼。



就用個提環壺黎泡茶，聽講唔可以用大滾水，但係我冇溫度計，只係攤左一陣就沖入壺。再沖落杯仔度，慢慢品嘗。



我對泡茶無認識。自然冇講究。志在玩下套青花茶具。

節瓜金菇蝦米煎蛋 Fried Eggs With Striped Hairy Melon, Dried Small Shrimps And Enoki Mushroom

今日煲節瓜湯留起左細半個節瓜，加埋買落既金菇同蝦米，煎三隻蛋，又係一碟送喇。



節瓜切幼條，金菇撕開，蝦米仔浸軟，蛋三隻打勻，落鹽。



燒熱鑊，落油鹽，爆香蝦米仔，再落節瓜，贊水炒至節瓜七成熟。

落金菇炒勻，將所有材料撥向鑊邊(今次用中式鑊黑金剛)，將多餘油同汁液流向鑊中隔開。



將材料倒入蛋液中，撈勻。洗乾淨鑊再落少少油，燒熱，倒入蛋同材料，半炒半煎至外面微金黃內裏嫩滑，即可上碟。



今次專登上隻紅萬壽橢圓形碟，等個賣相色彩美艷D。

用呢隻碟裝，你地夠唔夠膽食呀？



以前好多酒家都係用呢種碟啦，好似傳統名店醉瓊樓就係，我印象最深刻，十年前去食，都仲係用緊紅萬壽碟。

醉瓊樓D碟仲用到好舊，有D仲洗到甩色添架！自從驗出呢種碟既釉彩會釋出毒素，全港酒樓酒家都用清一色白雪雪既餐具，千篇一律，無晒情趣咯。

節瓜花膠雞腳排骨湯 Fish Maw Chicken Feet Pork Rib And Hairy Melon Soup

本來想煲個懶人湯----節瓜瑤柱湯，點知屋企用晒瑤柱，於是搞下搞下煲左呢個湯。

我用既材料：

1) 節瓜四個(13元節瓜要多個湯先夠味)



2) 鱆魚兩隻18元
3) 花膠筒兩個
4) 雞腳六隻10元
5) 排骨頭32元
6) 花生2元
7) 冬菇八隻
8) 蜜棗三粒
9) 紅棗六粒
10) 陳皮一塊
11) 薑片兩塊

我既做法：

1) 花膠煲軟剪開洗淨
2) 雞腳出水洗淨去甲
3) 排骨出水洗淨去碎骨
4) 鱆魚出水搣去眼咀
5) 冬菇浸軟剪掟
6) 節瓜切大塊
7) 花生、蜜棗、紅棗、陳皮洗淨
8) 用雲鼎大瓦煲煲滾大半煲水，然後將材料放晒入去，中火煲四個鐘。調味即成。



落左花膠同雞腳，個湯既「厚度」增加左。



越煲越濃郁越好味。