苦瓜炆去骨豬手 Braised Boneless Pork Trotter With Bitter Melon

呢個送好食，大家一定要試下。



大苦瓜一個9元，豬手一包半隻30元。呢個材料已經可以做到一大碟。

先炆豬手。豬手出水洗淨去碎骨，用自己喜歡既炆法先炆好，例如南乳炆，柱侯炆，滷水炆等等。



我今次用少少南乳炆，炆好後去骨、切細舊備用。

再炒苦瓜。苦瓜切好，用鹽醃半小時以上，過水，渣乾水。

燒熱鑊，落油，落蒜片、薑片、乾葱片，爆炒苦瓜，贊酒，加入少少炆豬手既汁，將苦瓜炒至八九成熟。



此時將去骨、切好既豬手回鑊，再落炆豬手既汁。



快炒至苦瓜全熟收汁，即可上碟。



好味！和味！

花膠炆白背黑木耳 Braised Fish Maw With White-Back Black Fungus

先排浸發左好多花膠，今日清埋佢。用黎炆白背黑木耳。



花膠筒五隻，白背黑木耳兩朶，冬菇適量，墊碟底菜心五棵。材料就係咁多。



花膠筒、木耳、冬菇浸好洗淨剪裁好。

木耳、冬菇用紹酒、糖、油撈一撈，燒熱鑊，落油，爆香。

落薑片，落花膠爆炒一陣。



贊水浸過材料，中火炆煮至差唔多收汁，調味。



炒好菜心，放碟底，炆好既花膠木耳冬菇放上面。

開枱裝飯趁熱食起筷喇喂！

花生眉豆排骨節瓜湯 Peanut, Black Eye Bean, Pork Rib Hairy Melon Soup

節瓜、花生、眉豆，幾夾味架。落埋冬菇就更香。



呢個湯本來想落埋鱆魚，會仲好味，但係鱆魚越黎越貴，唔落喇。

買包花生眉豆，4蚊。排骨頭30蚊。節瓜三個。冬菇幾隻，就係咁多料。



全部放入大瓦煲，煲三個鐘就飲得。

罐頭篇10：煙熏午餐肉 Canned Food: Smoke Pork Luncheon Meat

響惠康見到長城牌出左一系列平價午餐肉，仍以白豬仔做招牌，12.9一罐，花款好多。



有煙熏，有蒜香，有香辣，有火腿。好奇之下，買左一罐煙熏午餐肉。



開罐倒出係咁樣。



煎兩片試下。

整碗餐肉一丁做早餐，呢碗野成本大約六元，出面茶餐廳要十幾二十元。



塊午餐肉食味都可以啦，煙熏味唔係好濃，只係有少少感覺。十幾元一大罐都算係咁啦。

水瓜炒肉片 Stir-Fried Sliced Pork With Sponge Cucumber

今日熱到飛起。行街市見到有水瓜賣，聽講水瓜可消暑，於是賣左一條，成二尺長好似支棍咁。



自自然然就想起「水瓜打狗唔見一撅」呢句話，水瓜拎起手真係有種一打就斷既感覺架。

今次用左半肥瘦豬肉切片，專登落少少肥肉增添油水。水瓜做法同絲瓜差唔多，批皮切滾度。



先燒熱鑊，落油落薑片，再落醃好既肉片，大火爆炒，贊少少酒，炒至肉片九成熟。



此時落已瀝乾水既水瓜，又大火快炒，將水瓜同肉片都炒熟，埋獻收汁上碟。

呢個送要注意埋獻收汁，全程唔駛落水，水瓜會出水架。



水瓜食味清甜，爽中帶腍，滑不溜口，好正！比絲瓜更滑！



三兩下手勢就食鬼晒，淨番D肉片！

番茄掟死豬八戒(番茄炆豬腩) Braised Pork Belly With Tomato

健康飲食除左要注意食物營養均衡外，仲要注意通過食物提高人體免疫力。據說番茄有大量番茄紅素，對身體有益，梗係要食多D啦！聽講番茄紅素係「脂溶性」，在油脂中先會更易分解被人體吸收。咁就不如用番茄黎炆個豬腩肉啦！

今次我用左大大個番茄，共四大個成斤半有多，13元。豬腩肉只係買一條就夠，19元。

一於用番茄掟死隻豬八戒！



豬腩肉洗淨調好味，燒熱油鑊，落薑片爆香，爆至表面微金黃。



此時倒入已切好既番茄，轉中火兜勻。

呢個送全程唔駛落水，就用番茄本身既汁液炆腍腩肉。



係咁炆煮，煮至番茄爛成茄漿，調味，即可上碟。



響上面落少少碎鮮茄粒，再插幾朵西蘭花仔，就更靚！呢碟送既主角係番茄唔係豬八戒，茄汁用黎撈飯最正！

冬菇豬展花膠湯 Mushroom, Pork Shank And Fish Maw Soup

工作辛苦，人衰老得快，久唔久都要食番D好野保養下，花膠就可以護膚養顏，令皮膚復元，靚D。



本來想燉湯，唔落咁多料，只係用左四個花膠筒，一舊豬展，十隻冬菇，八粒紅棗就算。但係冇時間，整整下變番煲湯算數！



主角係花膠，無謂喧賓奪主喇。

所有材料準備好，加一大鍋水，先大火煲滾，再轉中細火煲三個鐘。



煲到個湯有少少膠質感覺就差唔多，調味即成。



記得食埋湯渣，特別係D花膠呀！

清炒西蘭花雲耳 Stir-Fried Broccoli And Black Fungus

西蘭花兩棵$7.9



雲耳適量。

清清地炒呢碟菜，清下腸胃。西蘭花浸洗乾淨，切好再沖洗，先用油鹽水焯至八成熟，瀝乾水備用。

雲耳浸軟，用豉油、糖、油撈一撈。燒熱鑊，加油加薑片，爆香雲耳，贊水煮三五分鐘兜起瀝乾水備用。



再用薑片起鑊燒熱，落西蘭花大火快炒，贊酒，再將雲耳回鑊，繼續大火快炒，落調味炒至均勻即可上碟。

呢碟清炒西蘭花雲耳，有益健康，食多兩件無妨！

乾煸四季豆牛粒 Stir Fried Beef Dice With Four Season Peas

母親節快樂呀！！



第二個送係乾煸四季豆炒牛粒。



牛粒40元，四季豆一扎12元。

牛粒用美X鮮醬油、糖、少少鬆肉粉、少少玉桂粉醃過夜。四季豆切短段。

用白鑊將四季豆烘乾至表面微焦，兜起備用。



另用平底鑊落少少油煎牛粒。



煎至表面金黃，裏面岩岩熟為合。兜起。

燒熱中式鑊，落油，薑片，爆炒四季豆，贊少少酒。



放入牛粒，大火快炒，埋薄獻收汁上碟。



阿媽趁熱食喇喂！！好味呀！！

各位網友請多多留言支持下我肥哉呀。。。。。。

欖豉三色椒炒牛柳條 Stir Fried Beef Strips With Preserved Olive And Three Color Peppers

各位網友仔，母親節快樂呀！



今日炒完兩個送，下晝就一家人出街慶祝母親節喇，今晚同阿媽去食自助餐呀！



第一個送係欖豉三色椒炒牛柳條。牛柳條係琴日留起一塊牛柳切成。加入三色椒，同落少少欖豉。

先大火熱油爆炒牛柳條，炒至轉色即兜起。再落片薑，爆香剪碎既欖豉，再落切好既三色椒，大火快炒。



最後將牛柳絲回鑊，埋個薄獻收汁即可上碟。



七彩繽紛，零舍開胃！