乖乖豬過馬路(紅蘿蔔青瓜薯仔馬蹄炆排骨) Braised "Traffic Light" Pork Rib

薯仔炆排骨係每一家既家常送，我今日試下加多三樣野落去：



1) 紅蘿蔔
2) 青瓜
3) 馬蹄

咁就變左碟「乖乖豬過馬路」又名「紅綠燈排骨」。乖乖豬過馬路當然就係要睇住紅綠燈啦！
紅蘿蔔(紅燈)，青瓜(綠燈)，薯仔(黃燈)，馬蹄(馬路)，排骨(乖乖豬)，哈哈哈！

加入紅蘿蔔、青瓜、馬蹄，成個送口感豐富好多，而且更加有益。我既做法係要令薯仔最腍、紅蘿蔔小腍、青瓜爽、馬蹄脆。



先將一字排醃好(醃過夜)，燒熱鑊落油落薑片，爆香排骨，跟住落切滾度既薯仔，爆炒一陣，加水加蓋炆煮至熟。



接住開蓋加入切細滾度既紅蘿蔔，又炆一陣，跟住落中滾度青瓜同馬蹄，兜勻煮滾即可。



用蠔油、老抽調味加色，炆煮至汁液濃稠即可上碟開飯！



嘩，呢隻乖乖豬同馬路紅綠燈都好好食架！

白豆角炒肉條 Stir-Fried White String Bean And Meat Strips

滾紫菜冬瓜肉丸湯用剩一大舊鯪魚豬肉混合肉膠，將佢煎香，就咁食其實都好香口。



切左D頭頭尾尾就咁食，剩番呢塊肉餅，再切條，用黎炒多碟白豆角肉條。

白豆角一札仔三元，再加幾隻乾紅指天椒，蒜片，乾蔥片，材料就係咁簡單。

白豆角切度，燒熱鑊，落油，爆香蒜片、乾蔥片，薑絲，落白豆角，邊炒邊贊水，炒至差唔多熟。



加入肉條，紅指天椒乾，大火爆炒，贊酒，調味，埋獻，收汁，上碟。



白豆角我唔鍾意煮得太腍，鍾意有少少咬勁。魚肉豬肉條非常搭配，好味。

 

紫菜冬瓜自製肉丸湯 Purple Laver Winter Melon Home Made Meat Ball Soup

紫菜湯貼過一次 （http://blog.yahoo.com/_GTVKXK26JCKSEBAIIJPTGF4PU4/articles/1001628 ），今次再整，做法唔同。


材料：紫菜兩餅，白冬瓜一斤，(鯪魚滑10元，絞碎半肥瘦豬肉20元，呢兩樣只須用三分一份量)。



做法：
1) 紫菜洗淨瀝乾水，留起半碗後用。
2) 冬瓜去核省乾淨皮面白霜，切片。





3) 鯪魚滑同半肥瘦豬肉撈勻，落調味(鹽、糖、豉油、胡椒粉、酒)加一隻蛋，搞至起膠，再撻生魚咁撻十幾下。整好之後睇唔出混入左魚肉架。



4) 煲滾水，先落冬瓜紫菜，滾三十分鐘至一個鐘，令紫菜味全出，冬瓜全腍。
5) 將紫菜冬瓜湯過濾，變成清湯。



6) 另外，煲滾水，用手將魚肉豬肉膠(jit)成肉丸，逐粒放入滾水中，滾至浮面，將肉丸放入凍水中過冷河。



7) 將紫菜冬瓜清湯煲滾，加入肉丸，再煮滾，調味。
8) 最後加入先前留起既紫菜，即可上枱！



呢個做法紫菜味特濃。



肉丸口感唔錯，後下既紫菜又有咬感，冬瓜又清潤，正！

豆竹蠔菇尖椒炆豬腩 Braised Pork Belly With Bean Milk Stick Oyster Mushroom And Red Pepper

響超市見到有鮮豆竹賣，買左包。又買左包韓國蠔菇King Oyster Mushroom 。



再買左幾隻紅尖椒，用黎炆豬腩肉。豆竹洗淨切短度。蠔菇切粒。尖椒切角。

豬腩肉醃一個鐘以上，再出水，爆香。



再落薑片，爆炒豆竹、蠔菇。

腩肉回鑊，加水蓋過面炆之。



炆至肉腍收水，調味，落埋紅尖椒角，埋獻。再轉入瓦煲，加蓋燒至姐姐聲即可上枱。

味道普通啦，豆竹唔夠普通腐竹好味。

英式肉腸三色螺絲粉 Le Eliche Tricolori And British Style Banger

買親通粉之類都有排食，好似包三色螺絲粉，食左一次，仲有好大包，於是又整左呢碟野。



呢包英式肉腸（主要成份係豬肉、牛肉、麵包碎、麵粉），用半煎半煮方法整好。一條已經好Heavy，伴三色螺絲粉，加少少茄醬，又一餐。



呢隻banger腸，味道普通，鹹，冇乜肉香。

中下價肉腸，係咁上下喇，呢款有8.3％係麵包碎，質地木左少少。



間唔中食一餐都可以啦。

紫洋紅椒炒青通 Stir-Fried Purple Onion, Red Pepper And Green Water Spinach

呢個菜顏色豐富，普普通通炒一碟通菜都可以炒得更有趣味、更健康。



材料：

1）紫洋葱一個  (10元三個）
2）紅尖椒兩隻  (5元三隻)
3)  青通菜一斤  (8元斤)

所有材料洗淨，洋憼同紅尖椒都切幼條，青通菜切去部分通頭，摘好。

燒熱鑊，落油，落薑片，先爆香洋葱同尖椒，兜起備用。

跟住落蒜片炒通菜，我今次用魚露炒，冇落鹽。



通菜炒至差唔多得時，將洋葱紅椒回鑊，大火快炒兜均即可上碟。



炒青通加入紫洋紅椒，色香味都更豐富！

 

 

火腿津白 Braised Tianjin Cabbage With Ham

火腿津白簡簡單單，但係非常美味。去酒家食，閒閒地都要六七十元碟，白已煮就平好多。



響超市買左個中型短身紹菜，6.5元。用幾片金華火腿就可以整出呢碟菜。

金華火腿切片洗淨。紹菜切幼條。

燒熱鑊，落泹落薑片，落紹菜炒一陣，贊水蓋過菜面，加埋幾片金華火腿，加蓋煮。



煮至菜完全腍身，取出火腿片切絲。



煮至水份略為收乾，埋個薄玻璃獻，即可上碟，菜面放回火腿絲就完成。



呢個火腿津白完全唔駛落鹽。如果改用雞湯煨煮就更和味。

鹹肉絲瓜豆腐魚尾湯 Salted Pork Dice Silk Melon Bean Curd Fish Tail Soup

呢個湯有鹹肉味，又有魚鮮味，又有絲瓜既清甜，好好味，大家有時間可以試下。



材料包括：
1）大魚尾一條14元
2）豆腐一塊3.5元
3）絲瓜半個
4）金華火腿三片
5）薑片適量

半肥瘦鹹肉半舊，切大丁。絲瓜半個批皮切條。大魚尾洗淨抹乾水，放落用薑片起鑊既熱油鑊，慢慢煎至兩面微焦香。



將煎魚尾既油全部「秘」出，放入金華火腿，倒入滾水淹過魚尾面，加蓋先滾約二十分鐘。



再加入豆腐同鹹肉丁，再加蓋滾約二十至三十分鐘。



最後加埋絲瓜條，加蓋滾五分鐘。調味即成。



湯渣都唔好嘥，魚尾仍然鮮美，點靚豉油好好食。

肥哉小炒 Fat Joy's Stir-Fried Dish

買左舊半肥瘦豬肉，20元，醃鹹烚熟，分左兩半，一半切條做左呢個小炒。另一半切大粒滾左個魚尾湯（見另一貼文）。



小炒其他用料包括：



1）韮菜花7元
2）中芹3元
3）韮黃2元
4）蝦乾17元兩，用左少少。

燒熱鑊，落油，爆香已浸洗瀝乾水既蝦乾同肉條，兜起。

留番炒完既油，再燒熱鑊，落薑片、中芹，贊水，先炒香。再落韮菜花，炒勻。



蝦乾肉條回鑊，再大火顛炒，贊酒，埋獻。最後落埋韮黃快炒收汁熄火上碟。



惹味，和味！

梅酒(四百二十五天) Plum Wine(425 Days)

老豆！父親節快樂呀！



開支梅酒乾番杯先！浸左一年零兩個月喇，四百二十五日喇。

酒味香，有梅子果味，又唔係太甜，都唔錯。

雖然全屋都唔係酒徒，今日都試少少啦！



晏畫仲炒左個肥哉小炒同滾左湯，唔得閒貼上黎住喇，要出街同老豆過節喇。


Happy Father's Day! 飲杯！