業主收樓喇！
各位網友仔，你地諗掂搬去邊未呀？Yahoo話有「輕鬆搬家」服務喎，通知佢新網址服務喎。
唔知點服務法呢。
總之就係要搵定地方啦，有咩好提議？我地可以一齊搬去果度咪又傾過囉。
2013年8月30日 星期五
2013年8月25日 星期日
杞子龍眼茶 Wolfberry Longan Drink
泡呢個茶我冇乜譜，只憑感覺，視乎盛器容量決定材料多少。
今次只係泡一茶壺，用咁多多材料都好夠。
將杞子龍眼乾浸洗乾淨，放入茶壺，沖入滾水泡十五分鐘就飲得。
趁機會用下套青花瓷杯碟……
飲下一杯，飲下又一杯，都幾寫意架！
肉碎豆豆 Stir-Fried Minced Pork With Yellow Bean Sprouts And Peas
肉碎係半肥瘦肉碎。豆豆第一個豆係大豆芽，第二個豆係玉豆。
做法好簡單，先將大豆芽略為去根，再處理好玉豆切短度。燒熱白鑊，先烘乾大豆芽，再烘乾玉豆，將兩樣兜起備用。
再燒熱白鑊，落醃好的肉碎，將肉碎炒散炒熟。如果用半肥瘦肉，呢個步驟可以唔落油，肥肉爆下爆下會出油，爆炒好兜起備用。
洗乾淨鑊，燒熱，落薑片落鹽落油，大豆芽同玉豆回鑊，贊水贊酒快炒，將玉豆炒熟。
豬肉碎回鑊，加入少少紅指天椒乾，將所有材料炒勻，埋獻收汁即可上碟。
呢碟送爽口有咬勁，又係送飯一流！
2013年8月18日 星期日
淮山杞子瘦肉螺頭雞湯 Chinese Yam, Wolfberries, Lean Pork, Chicken and Screw Head Soup
本來想做呢個燉湯，不過屋企冇夠大既燉盅，又想用下個電子瓦罉，所以就變番煲湯。
整呢個湯話說有段故。上星期同屋企人去某酒家食晚飯，我地四個人，叫左淮山杞子燉螺頭，要三百二十幾元。
等到盅燉湯上黎，我隔遠都見到都好大盅，女侍應話幫我地響另一張枱仔分湯，我地話好呀。
到佢將湯渣上枱，平平放滿一碟，冇咩問題。再上湯，我地一人一碗，係酒家飯碗大小，都好正常。
不過侍應上完湯後話，「畢晒架喇」，我就直覺有少少疑問，睇下碗湯大約七八成滿，咁大個湯盅畢四碗就渣都冇，係咪有少少那個呢？
當時有衝動想問經理，不過都忍左冇問。心想，如果六人或八人一枱，每人只係分得半碗，收三百幾元盅係咪過份？
事後諗番，真係好想知道實情，例如係咪真係畢晒湯同料？酒家係咪睇人頭計分量？三百幾元盅湯係咪四位用？
第二日又同屋企人去另一間檔次較低一級既酒家晚飯，我專登又叫淮山杞子燉螺頭湯，今次既情況係：
1）盅湯二百六十幾元，個湯盅同上次既大小一樣。
2）女侍應在我們桌旁既小枱上畢湯同湯渣。
3）湯渣滿滿一大碟，湯先上每人一碗。
4）盅湯未畢完，放在小枱上。
5）我地飲完一碗，侍應幫手再畢第二碗。結果成盅湯有成十碗。
6）盅內仲有未畢晒既湯渣，可以再畢出大半碟。
我明白酒家做生意各有各方法，只係唔知點解第一間酒家會咁做，請問各位高人既意見，係我少見多怪定係咩理由呢？
好喇，故仔講完。今次因為受左「啟發」於是自己整番盅螺頭湯，以下言歸正傳。
為左整呢個湯，以下1）至5）項材料全部響「樓上」新買，都好敗家架！
材料：
1）特級紅螺頭十粒（買左一包八兩，特價138元)
2）一級河南淮山片十片 (買左一樽八兩，特價46元）
3）寧夏杞子適量 (買左一包八兩，36元)
4）特選泰國龍眼肉十粒 (買左一包一斤，特價85元）
5）珍品紅棗八粒 (買左一樽，58元）
6）雞殻一隻30元
7）雞腳八隻10元
8）瘦肉20元
做法：
先浸螺頭，雞殻、雞腳、瘦肉出水，淮山杞子龍眼肉浸洗乾爭。
將以上材料，加三片金華火腿、薑片一同放入電子瓦罉中。
加入十一碗清水（有人話要加滾水，不過我係加凍水）
用大火半燉半煲六個鐘以上（我用左六個半鐘煲到八點開飯飲湯)。
煲好計下，共有十碗湯，湯渣大把。唔駛調味本身都好清鮮。調下味就同酒家冇兩樣。
煲到天黑，影相效果麻麻。
計下數，為左呢煲湯，買材料一共用左四百二十幾元，當然剩番好多料可以用好多次！
2013年8月10日 星期六
欖菜香芹肉絲手摷米粉 Hand Stirred Rice Stick With Preserved Mustard Leaf And Olive, Chinese Celery And Pork St
肥哉手摷米粉又黎喇！
今次用左兩個「江門排粉」（一包三個），加埋配料，可以整到一巨碟。
配料有：
1）欖菜適量（兩湯匙)
2）中芹三棵切幼條
3) 脢頭瘦肉絲
4）紅蘿蔔絲適量
做法就係用肥哉版手摷法，唔駛炒架。
將米粉用凍水浸軟至白色，撈起瀝乾水備用。
起鑊爆炒已醃好既肉絲，炒到咁上下落埋紅蘿蔔絲再炒。
之後就熄火，待材料攤凍一陣，加入米粉同欖菜，再落適量油、鹽、糖、雞粉、魚露等等味料。此時就洗乾淨雙手，用陰力摷呀摷呀，卒呀卒呀，將材料同味料摷入米粉度，卒均。做好之後就由佢靜置一陣入味。
之後就原鑊開慢火，加蓋，適量贊水，將米粉慢慢加熱。熄火，攤凍一陣，再將米粉翻轉摷鬆，重複一次。
待米粉軟熟後，最後加入中芹，摷入米粉中。
又用慢火加蓋同上處理，直至中芹轉軟身香氣四溢即可收火上碟。
睇落好似好多功夫，其實只有一招，就係用十隻手指去摷，完全唔駛炒，可以用少好多油。
2013年8月4日 星期日
番茄韭菜炒牛肉 Stir-Fried Tomato, Chinese Chives And Sliced Beef
又係時候要吸收多D番茄紅素喇，今次整碟番茄炒牛肉，加左少少韭菜落去，增加纖維素。
番茄三個，牛肉三十元，韭菜適量(唔可以太多，否則會搶味)。
牛肉切片醃好，先燒熱鑊加油爆炒至八成熟兜起。
原鑊落番茄，加薑片、糖、贊紹酒，將番茄炒腍，全程唔駛落水，用番茄本身既水份將番茄炒腍。
牛肉回鑊，炒勻，最後落埋韭菜，埋個略多汁既獻(豉油、蠔油、粟粉、水）。
韭菜同番茄牛肉加埋一齊，幾好味。
開飯要連汁都撈埋，又開胃，又可以完全吸收晒D番茄紅素！
燕麥曲奇! Oatmeal Cookies!
不過唔知點解，呢款有"Friend of the heart"標誌既燕麥片，包裝袋背後會介紹呢個燕麥曲奇食譜。
本來燕麥片多到食唔完，煩緊點樣食多D清咁D，但係睇到呢個食譜，決定要多食燕麥片保健康既你，敢唔敢整？整左敢唔敢食？
兩杯燕麥片要配一杯牛油！一杯糖！一杯啡糖！（即係兩杯糖）！ 兩隻蛋！好肥好甜喎，同食麥片既原意相反喎。
有冇人試整過？
江門排粉 Kong Moon Rice Stick
慶祝第100圖錄！
考下你，廣東米粉五大皇牌係邊「五大」？我上網搵左一陣都搞唔清楚！留番比高人指點下。
總之呢隻珠江橋牌「江門排粉」就自稱係五大皇牌之一。
我買佢其實係俾個名「吸引」，點解叫做「排粉」唔就咁叫「米粉」呢？仲要係「江門」出產既添！個英文名都幾特別，「江門」譯做Kong Moon，係港式廣東話拼音，唔係漢語拼音。
見到呢包野個名，坦白講令我好自然想到既係「便便」！不過唔係厭惡性，係印象深刻。哈哈！！
好野，個名改得好！起碼吸引到我買左一包，得閒依佢教既整法整黎食。
2013年7月28日 星期日
柴魚白菜花生排骨豬肝粥 Dried Fish, Chinese Cabbage, Peanut, Pork Rib And Liver Congee
柴魚花生豬骨粥煲得多，做法唔講喇。
呢次加埋白菜同豬肝，增加纖維素，又滋補，一於豐富D。
白菜洗淨同柴魚花生豬骨一齊落，煲至粥綿。
食前先落醃好既豬肝，滾熟就可以裝碗。
再落少少同呢個粥係絕配既沖菜吊味，加埋葱粒，就更加和味！
2013年7月24日 星期三
白灼蘭度肉片 Boiled Chinese Broccoli And Sliced Pork
廚房成日煎煎炒炒，油煙好多，有時改下整法，可以減少油煙，洗抽氣扇都慳番。
記得以前讀書有個老師話佢家中煮食只用水煮，烚熟就食，好健康。又聽過朋友講起個外傭做菜成日都係煮煮淥淥，唔駛抹抽油煙機。
兩個理由加埋，都真係幾有說服力架。所以我呢次就唔開油鑊，一於用白灼法。
買左斤好靚無渣芥蘭，再加少少脢頭肉片，就整左呢個白灼蘭度肉片，無油煙操作，一樣好好味喎。
芥蘭摘去大葉(唔係掉，仍然可以灼食)，只留中間部分。脢頭肉切片醃好(今次我落左梳打粉)，我平時炒肉前唔會用粟粉醃肉，今次灼肉就要落埋粟粉，仲要落多D。
白灼芥蘭水要大滾油要多，落薑片、少少鹽同糖，仲可以落少少食用梳打粉，將蘭度灼好排好在碟上。
白灼肉片就要用慢火，水要微滾，落肉片，唔好即刻搞散，由佢pet pet下慢慢灼熟先會滑。
將肉片放在蘭度上，淋上熟油+蠔油+老抽，搞點啦！蘭度卜卜脆，肉片軟軟滑，令人胃口大開！
2013年7月21日 星期日
欖菜肉碎四季豆 Stir-Fried Snap Bean With Minced Pork And Preserved Mustard Leaf And Olive
慶祝第100「炒」
！！
！！呢味送好食又好送得飯，而且成本好經濟，可以響屋企自己炒，唔駛一定去酒樓架。
四季豆一扎14元
絞碎豬水展一包(用三分一就夠)
欖菜一至兩湯羹
泰國乾辣椒四隻
薑絲、蒜蓉適量
材料就係咁簡單，炒一碟計成本唔駛三十元。
欖菜真係幾特別既發明，欖菜既菜，其實係芥菜葉。兩樣野加埋一齊醃，做出獨特美味！粒欖可以起肉剪碎用埋！
四季豆(白豆角其實都可以)撕衣切度。豬肉調味。
先燒熱鑊，落少少油爆炒豬肉，炒至散開兜起，再落油，爆香薑絲蒜蓉，落四季豆乾炒一陣，如果想四季豆乾身D，可以炒至表面微焦收水。
然後逐少逐少贊水，將四季豆炒至約七成熟。此時加入肉碎、乾辣椒、欖菜，用大火快炒，贊酒再適量贊水，將四季豆炒熟。
埋獻收乾汁即可上碟。我鍾意四季豆唔太腍，要有咬口。如果鍾意食腍D，可以贊水炒耐D，甚至可以先灼一灼四季豆先炒，聽講生四季豆有毒，要炒熟先好食，不過我唔鍾意呢個做法。
淨係呢個送已經可以扒三碗飯啦！
訂閱：
文章 (Atom)