各位老友再見喇！Goodbye my good friends!

各位支持肥哉既朋友，幾年來好多謝你地黎睇我個網誌，無論你地有冇留言，我都好感謝！
你地既光臨，係我繼續落去既動力。我已在google開左個「肥哉廚房」網站http://fatjoyskitchen.blogspot.hk/，不過我唔係好識用google blog，我會慢慢適應。
我可能會將所有舊post搬去隨意窩，因為yahoo話可以全部幫我地搬過去，似乎好方便。如果我搬去隨意窩，個名都會用「肥哉廚房」。

我大後日就會㩒制「匯出資料」，下星期呢隻度就變左唯讀模式，即係唔可以post野又唔可以留言，只可齋睇。所以而家通知各位，加油加油、朱媽媽、半日安、莎莉、tdk Tang、美國既Mr.Yu、Angela MY等等等等各位網友(冇打你名唔好見怪)。。。。。。好多謝你地呀，我地後會有期喇！

肥哉祝大家開開心心，萬事如意，食得是福，身體健康！！

肥哉谷歌開爐之：淮杞炆雞翼 Braised Chicken Wings With Chinese Yam and Wolfberries

搬過黎樣樣都唔未習慣，唯有慢慢適應啦。

今日整左一碟淮山杞子炆雞翼，就試下做個谷歌開爐首貼。



材料：

1）淮山、杞子、圓肉適量。

 

2）雞中翼一磅。



做法：
1）先將雞中翼解凍慢火出水。再過多次冷河，用老抽、糖、薑汁、紹酒、蠔油醃勻放入雪櫃一小時以上。
2）淮山預先浸洗乾淨再煲到腍備用。
3）杞子圓肉用熱水浸洗乾淨備用。
4）燒熱瓦煲，落少少油，用薑片起煲，放入雞翼同圓肉，加少少水先慢火炆一陣。


5）再放入淮山杞子(杞子留起少少），繼續炆。
6）炆至雞翼全熟，汁液收至濃稠，即可熄火局一局。



7）上碟，灑上少少鮮紅杞子整色水，成碟靚晒。

我搬左黎呢度呀喂！

搵黎搵去都係呢度比較順眼D，所以註冊左個賬戶，就叫番肥哉廚房 Fat Joy's Kitchen。都唔知點樣用，要慢慢適應下。
各位網友仔入黎睇下好唔好啦！
都唔知可唔可以輸入番晒yahoo既六百幾篇網文同大量相片。
真係好鬼死麻煩！

我響Google開左個新Blog

Yahoo提供既合作平台係Xuite隨意窩，你地會搬去嗎？

有冇好提議？其他網站又唔知Yahoo搬唔搬到去。

搬左既網友仔俾下意見。。。。

我唔係好鍾意個隨意窩。改為登記左個肥哉廚房google blog. 地址係：
http://fatjoyskitchen.blogspot.hk/

去探下我啦，乜都要由頭黎過，真係費時失事。

肥哉Yahoo收爐之：佛手瓜紅蘿蔔粟米螺頭鳳爪豬展湯 Buddha's Hand Melon Pork Shank Soup

所謂天下無不散之筵席，Yahoo收鋪，肥哉唯有收爐喇，第日搬去新鋪先再玩過。

Yahoo收爐盡地一煲：佛手瓜螺頭鳳爪豬展湯，落足料，大家都黎飲番碗啦！



材料：佛手瓜四個，紅蘿蔔一大條，粟米三條，豬展一大舊，螺頭四粒，鳳爪六隻，紅棗六粒，薑片四片。



煲法好簡單，先洗淨佛手瓜、紅蘿蔔，佛手瓜略批皮，紅蘿蔔批皮，切滾度。粟米斬件。豬展鳳瓜出水洗淨。螺頭隔晚浸定。



將所有材料放入大煲，加水蓋過材料面，先大火煲滾，再轉中慢火煲佢四個鐘以上。



就咁飲都已經好味，再落少少鹽調下味，仲正。



煲完湯既豬展鳳瓜，點靚豉油食，好好味。螺頭切片，又點下豉油食，惹味！粟米更加要食埋，又腍又甜。

 

 

 

 

 

 

 

 

 

 

 

搬去邊好呀喂？

業主收樓喇！
各位網友仔，你地諗掂搬去邊未呀？Yahoo話有「輕鬆搬家」服務喎，通知佢新網址服務喎。
唔知點服務法呢。
總之就係要搵定地方啦，有咩好提議？我地可以一齊搬去果度咪又傾過囉。

杞子龍眼茶 Wolfberry Longan Drink

 

買左一大包寧夏杞子一大包泰國龍眼乾，想要好好用晒佢地，最好既辦法莫過於整杞子龍眼茶，經常飲用。

泡呢個茶我冇乜譜，只憑感覺，視乎盛器容量決定材料多少。



今次只係泡一茶壺，用咁多多材料都好夠。



將杞子龍眼乾浸洗乾淨，放入茶壺，沖入滾水泡十五分鐘就飲得。



趁機會用下套青花瓷杯碟……



飲下一杯，飲下又一杯，都幾寫意架！

肉碎豆豆 Stir-Fried Minced Pork With Yellow Bean Sprouts And Peas

肉碎係半肥瘦肉碎。豆豆第一個豆係大豆芽，第二個豆係玉豆。



做法好簡單，先將大豆芽略為去根，再處理好玉豆切短度。燒熱白鑊，先烘乾大豆芽，再烘乾玉豆，將兩樣兜起備用。



再燒熱白鑊，落醃好的肉碎，將肉碎炒散炒熟。如果用半肥瘦肉，呢個步驟可以唔落油，肥肉爆下爆下會出油，爆炒好兜起備用。

洗乾淨鑊，燒熱，落薑片落鹽落油，大豆芽同玉豆回鑊，贊水贊酒快炒，將玉豆炒熟。



豬肉碎回鑊，加入少少紅指天椒乾，將所有材料炒勻，埋獻收汁即可上碟。



呢碟送爽口有咬勁，又係送飯一流！

淮山杞子瘦肉螺頭雞湯 Chinese Yam, Wolfberries, Lean Pork, Chicken and Screw Head Soup

 

本來想做呢個燉湯，不過屋企冇夠大既燉盅，又想用下個電子瓦罉，所以就變番煲湯。




整呢個湯話說有段故。上星期同屋企人去某酒家食晚飯，我地四個人，叫左淮山杞子燉螺頭，要三百二十幾元。
等到盅燉湯上黎，我隔遠都見到都好大盅，女侍應話幫我地響另一張枱仔分湯，我地話好呀。
到佢將湯渣上枱，平平放滿一碟，冇咩問題。再上湯，我地一人一碗，係酒家飯碗大小，都好正常。
不過侍應上完湯後話，「畢晒架喇」，我就直覺有少少疑問，睇下碗湯大約七八成滿，咁大個湯盅畢四碗就渣都冇，係咪有少少那個呢？
當時有衝動想問經理，不過都忍左冇問。心想，如果六人或八人一枱，每人只係分得半碗，收三百幾元盅係咪過份？
事後諗番，真係好想知道實情，例如係咪真係畢晒湯同料？酒家係咪睇人頭計分量？三百幾元盅湯係咪四位用？

第二日又同屋企人去另一間檔次較低一級既酒家晚飯，我專登又叫淮山杞子燉螺頭湯，今次既情況係：

1）盅湯二百六十幾元，個湯盅同上次既大小一樣。
2）女侍應在我們桌旁既小枱上畢湯同湯渣。
3）湯渣滿滿一大碟，湯先上每人一碗。
4）盅湯未畢完，放在小枱上。
5）我地飲完一碗，侍應幫手再畢第二碗。結果成盅湯有成十碗。
6）盅內仲有未畢晒既湯渣，可以再畢出大半碟。

我明白酒家做生意各有各方法，只係唔知點解第一間酒家會咁做，請問各位高人既意見，係我少見多怪定係咩理由呢？

好喇，故仔講完。今次因為受左「啟發」於是自己整番盅螺頭湯，以下言歸正傳。



為左整呢個湯，以下1）至5）項材料全部響「樓上」新買，都好敗家架！

材料：




1）特級紅螺頭十粒（買左一包八兩，特價138元)
2）一級河南淮山片十片 (買左一樽八兩，特價46元）
3）寧夏杞子適量 (買左一包八兩，36元)
4）特選泰國龍眼肉十粒 (買左一包一斤，特價85元）
5）珍品紅棗八粒 (買左一樽，58元）
6）雞殻一隻30元
7）雞腳八隻10元
8）瘦肉20元

做法：



先浸螺頭，雞殻、雞腳、瘦肉出水，淮山杞子龍眼肉浸洗乾爭。



將以上材料，加三片金華火腿、薑片一同放入電子瓦罉中。
加入十一碗清水（有人話要加滾水，不過我係加凍水）
用大火半燉半煲六個鐘以上（我用左六個半鐘煲到八點開飯飲湯)。



煲好計下，共有十碗湯，湯渣大把。唔駛調味本身都好清鮮。調下味就同酒家冇兩樣。



煲到天黑，影相效果麻麻。



計下數，為左呢煲湯，買材料一共用左四百二十幾元，當然剩番好多料可以用好多次！

 

 

 

 

 

 

 

 

 

 

 

 

 

 

 

欖菜香芹肉絲手摷米粉 Hand Stirred Rice Stick With Preserved Mustard Leaf And Olive, Chinese Celery And Pork St

肥哉手摷米粉又黎喇！

今次用左兩個「江門排粉」（一包三個），加埋配料，可以整到一巨碟。

配料有：



1）欖菜適量（兩湯匙)
2）中芹三棵切幼條
3)  脢頭瘦肉絲
4）紅蘿蔔絲適量

做法就係用肥哉版手摷法，唔駛炒架。



將米粉用凍水浸軟至白色，撈起瀝乾水備用。



起鑊爆炒已醃好既肉絲，炒到咁上下落埋紅蘿蔔絲再炒。



之後就熄火，待材料攤凍一陣，加入米粉同欖菜，再落適量油、鹽、糖、雞粉、魚露等等味料。此時就洗乾淨雙手，用陰力摷呀摷呀，卒呀卒呀，將材料同味料摷入米粉度，卒均。做好之後就由佢靜置一陣入味。

之後就原鑊開慢火，加蓋，適量贊水，將米粉慢慢加熱。熄火，攤凍一陣，再將米粉翻轉摷鬆，重複一次。



待米粉軟熟後，最後加入中芹，摷入米粉中。



又用慢火加蓋同上處理，直至中芹轉軟身香氣四溢即可收火上碟。



睇落好似好多功夫，其實只有一招，就係用十隻手指去摷，完全唔駛炒，可以用少好多油。

番茄韭菜炒牛肉 Stir-Fried Tomato, Chinese Chives And Sliced Beef

又係時候要吸收多D番茄紅素喇，今次整碟番茄炒牛肉，加左少少韭菜落去，增加纖維素。



番茄三個，牛肉三十元，韭菜適量(唔可以太多，否則會搶味)。

牛肉切片醃好，先燒熱鑊加油爆炒至八成熟兜起。

原鑊落番茄，加薑片、糖、贊紹酒，將番茄炒腍，全程唔駛落水，用番茄本身既水份將番茄炒腍。



牛肉回鑊，炒勻，最後落埋韭菜，埋個略多汁既獻(豉油、蠔油、粟粉、水）。

韭菜同番茄牛肉加埋一齊，幾好味。



開飯要連汁都撈埋，又開胃，又可以完全吸收晒D番茄紅素！

燕麥曲奇! Oatmeal Cookies!

　

講起食燕麥粥，大家都會諗到「好健康」，可以降膽固醇。

不過唔知點解，呢款有"Friend of the heart"標誌既燕麥片，包裝袋背後會介紹呢個燕麥曲奇食譜。

　

本來燕麥片多到食唔完，煩緊點樣食多D清咁D，但係睇到呢個食譜，決定要多食燕麥片保健康既你，敢唔敢整？整左敢唔敢食？

兩杯燕麥片要配一杯牛油！一杯糖！一杯啡糖！（即係兩杯糖）！ 兩隻蛋！好肥好甜喎，同食麥片既原意相反喎。

有冇人試整過？

江門排粉 Kong Moon Rice Stick

慶祝第100圖錄！

考下你，廣東米粉五大皇牌係邊「五大」？我上網搵左一陣都搞唔清楚！留番比高人指點下。

總之呢隻珠江橋牌「江門排粉」就自稱係五大皇牌之一。

我買佢其實係俾個名「吸引」，點解叫做「排粉」唔就咁叫「米粉」呢？仲要係「江門」出產既添！個英文名都幾特別，「江門」譯做Kong Moon，係港式廣東話拼音，唔係漢語拼音。



見到呢包野個名，坦白講令我好自然想到既係「便便」！不過唔係厭惡性，係印象深刻。哈哈！！

好野，個名改得好！起碼吸引到我買左一包，得閒依佢教既整法整黎食。

柴魚白菜花生排骨豬肝粥 Dried Fish, Chinese Cabbage, Peanut, Pork Rib And Liver Congee

柴魚花生豬骨粥煲得多，做法唔講喇。



呢次加埋白菜同豬肝，增加纖維素，又滋補，一於豐富D。



白菜洗淨同柴魚花生豬骨一齊落，煲至粥綿。



食前先落醃好既豬肝，滾熟就可以裝碗。



再落少少同呢個粥係絕配既沖菜吊味，加埋葱粒，就更加和味！