酸菜肉絲炒米粉 Fried Rice Stick With Pickled Vegetable And Pork Strips

行政總廚抽獎抽左包番禺排粉，佢唔鐘意食，擺左係度好耐，今日我攞黎整酸菜肉絲炒米粉。

 

我買左酸菜同脢頭瘦肉，酸菜浸下鹽水切好再用白鑊烘乾備用。脢頭肉切絲醃好。

 

米粉浸凍水浸至發白撈起源瀝乾水，加入生油撈勻。

酸菜肉絲炒香贊水煮熟，連汁撈入米粉中。用手摷勻，摷米粉已介紹好多次，唔再講喇。

 

將摷好既米分放入平底易潔鑊慢慢半煎炒至米粉熟，即可上碟。

 

肥哉摷米粉又一版本，幾好味架！

 

肥哉廚房2013年之前六百幾個貼文載於「隨意窩」網站，觀迎光臨指教：http://blog.xuite.net/fatjoykitchen/hkblog



 

 

 

黃瓜節瓜扁豆排骨湯 Old Cucumber, Hairy Melon, Hyacinth And Aduki Bean Pork Rib Soup

老黃瓜同節瓜都係煲湯既上佳材料，今次試下雙瓜合璧，加埋雙豆：扁豆同赤小豆，用黎煲排骨頭。

老黃瓜連皮，節瓜去毛也連皮煲。排骨頭出水。扁豆赤小豆洗乾淨。加埋紅棗同陳皮，所有材料放入大煲內，加水煲三個鐘。

三個鐘後就煲成咁↓，雙瓜差唔多溶晒。

湯渣好食，扁豆夠腍，一定要飲湯食渣。

蒸劃魚 Steamed Fish

街市魚檔有好多款一碟碟海魚賣，其中一款就係呢種「劃魚」，似乎係用黎做鹹魚果隻劃魚。

買左一碟試下，15元有7條。返到屋企清洗乾淨，用少少鹽醃佢幾個鐘。

放入鑊隔水蒸12分鐘，落葱贊油，加埋自家調製蒸魚豉油。肉質幾滑，骨唔算多，都唔錯！

冬瓜薏米瘦肉湯(第二版) Winter Melon Pearl Barley Lean Pork Soup

煲左個冬瓜薏米淮山茨實赤小豆瘦肉湯，放左上肥哉廚房隨意窩旺下果邊個場。已經係第二次煲呢款湯。

http://blog.xuite.net/fatjoykitchen/hkblog/212109309

冬瓜薏米瘦肉湯(第二版) Pearl Barley Winter Melon Lean Pork Soup (Second Version)

呢款冬瓜薏米瘦肉湯，仲落左其他配料，包括扁豆、茨實、淮山、赤小豆。

冬瓜落多D，湯味更濃。將所有材料洗淨，放入煲內加滿水，大火煲滾轉中火煲至扁豆腍身即可。

煲好後調味，無論熱飲冷飲都適宜，所有材料都可以食番晒，唔會浪費。

 

冰豆腐炆鯇魚腩 Braised Fish Belly With Iced Bean Curd

見人整冰豆腐咁好玩，又試下整，不過琴日我買左舊滑豆腐，唔係硬豆腐。

放入冰格冰左一日，攞出黎浸水解凍，再榨乾水， 榨完塊豆腐都差唔多散晒。



再切小塊，準備用黎炆魚。

鯇魚腩已醃左一日，抹乾水煎至兩面金黃，再加水炆煮，再放入冰豆腐，炆至夠時間，埋獻收汁上碟。

口感較滑豆腐有少少韌，都幾得意！



西檸汁石斑柳 Deep Fried Garoupa Fillet With Lemon Sauce

炸開魚唔好浪費鑊油，於是再整左呢碟西檸汁石斑柳。

急凍石斑柳一包，解凍用少少鹽、胡椒粉醃一日。切件索乾水，放入麵漿中上勻漿液，再放入油鑊中炸至硬身金黃色。

煮個現成「西檸軟雞汁」，加埋乾葱，淋上魚柳上面，就搞掂。

 

 

肥哉廚房2013年之前六百幾個貼文載於「隨意窩」網站，觀迎光臨指教：http://blog.xuite.net/fatjoykitchen/hkblog

 

 

糖醋鱸魚 Deep Fried Sea Perch Fillet With Sweet And Sour Sauce

買左包急凍海鱸魚片，整左另碟糖醋鱸魚。酸酸甜甜，可以補救鱸魚稍欠鮮味的缺點。

呢包鱸魚片，劏得乾乾淨淨，解凍後用鹽醃過夜，索乾水，搽上乾粉就可以落油鑊炸。

炸至兩面金黃色，上碟。我用左包現成糖醋排骨醬，加少少乾葱煮個汁，淋上魚面，灑上葱粒就可以上枱。

 

用酥炸法，魚塊香口D，加上糖醋汁，幾開胃架！

 

肥哉廚房2013年之前六百幾個貼文載於「隨意窩」網站，觀迎光臨指教：http://blog.xuite.net/fatjoykitchen/hkblog

 

蘭度炒斑球 Stir-Fried Garoupa Fillet With Chinese Kale Stem

惠康黎左一批越南石斑肉，一包有五片，買左一包試下，唔錯！石斑柳始終好過龍利，好過鯰魚好多好多！

用三至四片已經可以炒出一大碟，呢包可以食兩餐。今次用黎炒蘭度。

石斑切塊，索乾水，用鹽、紹酒醃夠時間，再撲上粟粉，泡油至熟，撈起備用。

燒熱鑊，落油，落薑片，爆炒蘭度，贊水，加鹽、糖。將蘭度炒熟。

斑球回鑊大火快炒，埋獻收汁上碟。石斑啖啖肉，鮮美有魚味，帶皮有咬勁，蘭度爽脆，正！

水煲蘋果湯 Water Kettle Apple Soup

用水煲煲湯水真係好方便，最正係可以成煲拎起斟落碗或杯，翻熱又容易。今日呢煲就落左蘋果做主角，配一條紅蘿蔔、一支粟米，再落少少龍眼肉、杞子同適量羅漢果(冇入鏡)。

將所有材料準備好，放入煲，加水煲兩三個鐘就可以飲。本身已好濃郁香甜，唔駛調味。

雪菜肉絲冬菇蝦米新竹炊粉 Taiwanese Rice Noodle In Pork Mushroom Soup

響阿信屋買左一大包「新竹炊粉」，有十四個，今日用左三個，整左一大鍋湯米粉。

參考包裝說明，用左雪菜、肉絲、冬菇、蝦米做料。

個米粉幾有分量，質地好幼細。跟佢個做法，先爆炒材料，再落水煮成濃湯，再放入已浸開既米粉。

呢隻炊粉唔錯，口感軟中帶咬勁，轉轉口味，係唔錯既選擇。

旺角平民麵包店 A Local Bakery In Mong Kok

 

旺角有間平民麵包鋪，賣傳統港式包餅。有日行街路過，入去睇睇，麵包餅食色澤鮮明，而且售價便宜。菠蘿包、雞尾包、火腿蛋包、芝麻包、甜餐包、椰絲奶油包通通都係六元三個。 



擺到成間鋪都係，仲有蛋撻、香蕉糕、燒餅、雞仔餅。我入去果陣就有人買緊雞仔餅。鋪仔細細，不過好多野賣！

花多眼亂唔知買咩好，見咁平樣樣都想試。卒之買左一個懷舊銻兜純味蛋糕，9元個。三個芝蔴包，三個火腿蛋包。

原味蛋糕湯碗咁大，質地軟中帶微韌，有陣甜味，香味則稍淡。

 

芝蔴包大大個，芝蔴夠多，味道微鹹，香味較淡。

 

 

火腿蛋包細細個，裏面有塊蛋有塊火腿。味道偏淡。 





平民包店薄利多銷，D包餅賣相唔錯，算係咁喇。小市民志在醫肚，唔會苛求，真係要多謝店主服務大眾。相信店主都係辛苦經營，間鋪如果唔係自己買落，睇怕都幾難捱貴租。