淡菜節瓜瘦肉湯 Dried Mussels Hairy Melon Lean Pork Soup

早前買左一大包淡菜，用咗一次，放入雪櫃就唔記得咗，今日拎番出黎，煲咗個淡菜節瓜瘦肉湯。

仲加埋好多配料，有薏米、花生、沙蔘、南北杏、陳皮同百合。一齊洗乾淨，浸半個鐘。

瘦肉少少就夠，呢度二十元瘦肉用咗半舊，切厚片。另外兩個節瓜，我擦左D毛，連皮煲。用左個半節瓜，留番半個可以用黎炒蛋或者煮粉絲蝦米都唔錯。

煲滾水，將材料放晒入去，大火煲滾再轉中細火，煲兩個鐘已經夠晒火候，調味就飲得！

今次節瓜連皮煲，所以個湯帶微綠色，淡菜帶少少鹹甘味，節瓜腍軟，全部湯渣都食得唔好嘥！

***Please leave your feedback, thanks!***

雪菜肉絲湯米 Rice Noodle With Preserved Vegetable And Shredded Pork In Soup

雪菜肉絲湯米(茶餐廳版)係平民食製。湯底係味精湯，只係用雞粉同鹽開。雪菜肉絲係預製，食時淋上面。如果有潮洲辣油，加少少仲正。

茶餐廳食而家連杯餐茶大約要25元，自己整可以整到一大煲。雪菜浸水減咸味，切粒，略為烘乾。肉絲醃好炒香，加入雪菜，紅辣椒，加水半炆炒。調味埋個多汁獻。

整左一大碗，可以當送送飯，送粥都得。

今日整湯米，煮個米粉底，加上適量雪菜肉絲連汁就搞掂。

呢一大碗足夠兩個人食，就係差左D辣油！

***Please leave your feedback, thanks!***

糖醋烤鯪魚 Roasted Dace In Sweet And Sour Sauce

想食燻魚又唔想開油鑊炸魚，今日試左呢個懶人簡易法，整出黎既效果都有幾分似燻魚架！

買罐鮮炸鯪魚，加一包糖醋骨醬就可以做到類似燻魚效果。

罐頭鯪魚有三條，取出瀝去油，打開，在上面抹上糖醋骨醬，靜置一小時以上俾佢入味。

醃好後放入烤箱，我用150度每邊烤10分鐘，烤幾耐視乎個人喜好，耐D就乾D。烤至汁料收乾就可以。

出爐上碟，攤凍就食得。味道幾正，真係似食燻魚架！大家如有興趣，不妨試下！

***Please leave your feedback, thanks!***

廚餘(冬菇蝦米肉碎)炆豆腐 Braised Bean Curd With Leftover (Mushroom Dry Shrimp And Minced Pork)

惜食減廢係美德，一餐食唔晒既食物變左廚餘，飽肚之時會想過掉左佢算數，費事保存，但係咁樣浪費食物係唔岩既，所以就整左呢砵廚餘炆豆腐。

呢餐廚餘係咩？就係行政總廚整既「冬菇蝦米剁豬肉」，佢整左一大碟，一餐食唔完，本來把心一橫想掉左佢，但係冇咁做，雪左人雪櫃。今日買舊豆腐炆番佢就係一道菜啦。



先將廚餘爆番熱，加入適量水，放入豆腐炆至香氣四溢，調味埋獻，留多少少汁，灑上葱粒就搞掂。

一舊豆腐而家賣四個半，可以炆出一大砵。如果琴日倒左碟剩送就冇今日呢味喇！ 



***Please leave your feedback, thanks!***

三洋傳統電飯煲＋煮飯巾 Sanyo Traditional Electric Rice Cooker + Rice Napkin

 

而家煮飯高科技日新月異，電飯煲動輒幾千蚊甚至萬幾蚊一個，唔知仲有冇人會珍惜呢種傳統鋁膽電飯煲呢？佢雖然舊，但係仲好用得架。

呢個三洋電飯煲係同條電線分體既，煲邊有個電線插位。呢個設計好過而家電線同個煲連體既好多。

 

呢種鋁膽煲煲飯會黐底，所以而家多數人轉用易潔膽。但係以前冇易潔膽，用煮飯巾就可以解決問題。不過我買唔到煮飯巾，只買到煲魚袋。今次拆開個大煲魚袋當煮飯巾試下。各位知唔知邊度可以買到煮飯巾呀？請指點下。

 

今次煮一杯米試下，先浸洗乾淨煲魚袋，墊在鋁膽內，再放入洗好既米，加水，照常㩒掣煮飯。

 

煮好飯保溫15分鐘，將煲魚袋連飯抽出。抽起成袋飯時，布袋有部分黐底，要用一隻手㩒住個煲先可以將成袋飯抽出。

 

將米飯用另一個兜裝起摷鬆，即可開飯。鋁膽冇飯粒黐住，易洗好多。



 

塊布就有不少米飯黐住，不過較易剝離，清洗容易好多。如果買到真正既煮飯巾，呢個煲就唔駛退役喇！

 

 

 

 

 

大同電鍋蒸兩味 Two Steamed Dishes Using Tatung Multi-functional Cooker

 

今日試用個大同電鍋蒸番兩味：榨菜蒸豬肉 + 豆腐豆豉蒸鯇魚。 

 

我用個不鏽鋼深兜蒸第一味，再在上面套一隻搪瓷碟蒸第二味。點解個蓋係透明？我今次換左個玻璃蓋，貪佢可以See through! 睇住裏面D食物由生變熟，有趣味好多！

 

我既做法係咁：先落兩碗水入電鍋，煲至滾。放入鋼兜豬肉先蒸8分鐘，再放入浸過水再用糖同麻油撈過既榨菜。

 





再在上而套一隻直徑同個鋼兜一樣既碟，蒸魚。豆腐切塊墊底，放上豆豉同用少少鹽醃過既鯇魚腩(我偏愛魚腩下裝，所以你地會見到我所有蒸魚腩都係下裝架)！放少少薑絲就可以蓋上玻璃蓋，繼續蒸15分鐘。



 

十五分鐘後，兩味都蒸熟，贊少少熱油，灑上葱粒即可開飯！

  

 

 

 

 

香港三元牌大水煲 Hong Kong Rings Brand Water Kettle

你地經歷過屋企要煲水沖涼既日子未呢？以前冇熱水爐，冷天沖涼就要先煲一大煲熱水。用呢個大水煲煲水沖涼都唔錯，佢可以裝到成30碗水架！

 

呢種古老銻煲(我諗係鋁煲)其實好有型架，睇怕而家冇咩人再用黎煲水飲，就快絕跡，放響廚房都係做陳列品，回味一下從前既黃金歲月。

 

個柄鑄刻左三元牌RINGS BRAND個Logo，係MADE IN HONG KONG 香港製造架！個煲26cm，係以前茶樓用既重量級水煲。而家有D舊式茶餐廳仲可以見到佢既踪影。



 

 

煲內出水口有隔渣網，做工都幾認真架。我正話仲用蘋果皮煲水清潔過裏面，去除左一D水漬。

 

我估冇乜人會影煲底，就影一張做個記錄，個煲底都仲保養得幾好架。

 

最後黎張正面靚仔照，寶貝可以光榮退役喇！

 

 

 

 





大同電鍋煲絲苗 Tatung Multifuntional Cooker

 

大家好！今日終於下定決心要寫返個Blog喇！2015年第一篇要用個新煲上場同大家見面。

 

 

幾個月前已留意到附近電器店有賣台灣的大同電鍋，一直都冇諗住要買。直至最近上網瀏覽文章，始知呢隻電鍋係台灣人家居廚房神器。

 

見佢個設計簡樸無華，而且色水大紅大綠，夠晒傳統，於是買左呢個我相信係「入門版」既黎試下。

 

呢個香港電壓220V版條電線係連住煲底，唔係台灣版本可以響煲邊拔出。條電線連住個煲，清洗同搬動或收藏都唔方便，唔知點解要咁設計呢？



 

大同電鍋應配蓬萊米，不過我食開絲苗，一於試煲下。用附件量杯量左兩杯米，按說明加水至內鍋刻度2，再響外鍋加一量杯水。

開始㩒制煲飯喇！呢個煲煲飯都幾「熱鬧」下，過程中外鍋水滾，會聽到內外鍋之間pet pet水聲，同內鍋被滾水衝擊至在外鍋內震動同移動既聲音。用開日式電飯煲第一次轉用呢隻電鍋，真係都幾「震撼」。煮到就水乾時仲會啪啪聲，但係仍未跳至保溫掣，當時真係啪到我有D驚，好彩最後佢都自動跳至保溫。相信係我未習慣，少見多怪而已。

 

保溫15分鐘後，摷鬆D飯，就係咁樣。飯煲得夠軟，效果都唔錯。我鍾意硬身少少，下次會落少一D水。

 

 

 



碭山梨雞骨草南北杏排骨湯 Pear Pork Rib Soup

各位大家好嗎？呢個幾月佔中佔到社會撕裂，整左野都冇心機貼上黎，成個十月都冇貼文喇！

呢排好多種梨可以在街市買到，其中有一種其貌不揚，外皮粗鞋既叫碭山梨，12元買左3個，加埋少少乾雞骨草、南北杏同排骨，煲左呢個湯。

三個梨其中一個大到好似沙田柚咁，大過隻食飯碗。三個梨批左層粗皮，內面其實係爽甜既梨肉，真係梨不可以貌相。

將梨、南北杏、雞骨草、排骨全部掉晒入煲內，煲到夠火候就掂。

個湯甜到不得了，落鹽平衡下味道，非常正。煲完湯既梨肉出奇地軟滑清甜，夠晒滋潤。每人飲一碗就好，飲太多可能吸收太多糖份。

***Please leave your feedback, thanks!***