油鹽水浸黃腳鱲 Braised Yellowfin Seabream In Salty And Oily Water

 

浸魚比蒸魚的肉質更滑，今日就買左三條黃腳鱲仔，25元，一於用油鹽水浸之。

 

黃腳鱲清洗乾淨去清細鱗，在肚肉放片薑，再全身抹上粗鹽薑粒，醃一陣。

 
燒滾一鑊水，放入薑片葱段，加油、鹽、胡椒粉。再將魚放入，此時轉為細火慢慢浸魚。

整個過程水都唔可以滾，只用慢火保持較高熱度，魚在平靜的熱水中慢慢浸熟，約需時15分鐘。

上碟，灑上薑絲、葱粒、芫茜碎，贊熱油，落蒸魚豉油即可開飯！

 

 

 

睇下先，魚肉細滑，十分可口！大家不妨一試！

 

 



***Please leave your feedback, thanks!***

肥哉廚房2013年之前六百幾個貼文載於「隨意窩」網站，觀迎光臨指教：http://blog.xuite.net/fatjoykitchen/hkblog
 

茄汁毛豆蝦仁 Braised Soybean And Shrimps In Tomato Paste

本來想整雪菜毛豆蝦仁，但係用番茄會健康D，所以改為茄汁毛豆蝦仁。

材料好簡單，毛豆一包，番茄三個，蝦仔半斤，金華火腿幾片。



毛豆先用水煮一煮，再逐粒剝出備用。蝦仔剝好去腸洗乾淨，醃好再索乾水。番茄切粒。毛豆用金華火腿水煨熟兜起。

燒熱鑊，落油，將蝦仁炒至八成熟兜起。原鑊放入番茄炆煮至變成茄醬，調味。此時放入毛豆同蝦仁。

將所有材料炒勻，略為收汁即可上碟。

上碟後灑上少少炒香金華火腿碎，更加惹味！

***Please leave your feedback, thanks!***

腐乳豉椒排骨蒸飯 Steamed Rice With Pork Rib In Salted Bean Curd Paste With Preserved Black Bean And Red Chili

呢款蒸飯又係用傳統電飯煲蒸，豉椒排骨飯好普通。蒸法非常簡單方便。



今次主要特色係用腐乳做主打醃料醃排骨。腐乳梗係用香港名牌支持本土經濟啦！

呢度一條肉排26元，用一磚至磚半腐乳已足夠，再加酒、糖、少少鬆肉粉同雞粉先醃夠時間。



蒸之前再加入蒜蓉、豆豉、紅椒絲同粟粉撈勻，就可以放入米面。一至二人份只須用一半肉排分量已夠。

在電飯煲加入兩量杯水，放上蒸板，再成盅放在蒸板上，就可以加蓋蒸至自動跳掣。

再保溫十分鐘左右開蓋，就見到呢盅香氣撲鼻嘅腐乳排骨蒸飯喇！

***Please leave your feedback, thanks!***

白豆角番茄牛肉 Braised White Long Bean And Tomato With Sliced Beef

呢味白豆角炆番茄炒牛肉，又係「雙蔬+肉」配搭，綜合炆+炒兩法。效果唔錯，可以一試！

白豆角摘好，番茄切好。白豆角先用油鹽水灼一灼去左草青味備用。

牛肉切片醃好，先炒至八成熟兜起。原鑊落番茄炆炒至腍身，加入白豆角再炆煮至個人喜好的腍度。

最後牛肉回鑊快炒，埋獻略收汁即可上碟。

白豆角炆番茄後再炒入牛肉，就完成呢碟雙蔬+肉配搭。色水、味道、口感都唔錯！開飯喇喂！！



 ***Please leave your feedback, thanks!***

傳統電飯煲蒸飯 Steam Rice Using Traditional Electric Rice Cooker

傳統電飯煲平實耐用，除了用內鍋煮飯外，更可利用蒸板蒸飯。蒸飯效果比煮飯似乎更佳，而且可以免卻煮飯後要清洗傳統鋁質內鍋的麻煩。

呢個樂聲牌綠色電飯煲，已屬古董級，但仍然好使好用，煮飯蒸飯十五分鐘搞掂，自動保溫，簡單方便快㨗！

利用附件蒸板，加水蒸煮生米飯，效果與台灣蒸飯神器XX電鍋異曲同工，超好用！

例如一至二人份蒸飯：在內鍋注入約一杯水，放入蒸板。用盛器放一量杯米加約一量杯水，按個人喜好調整水量，再放在蒸板上，加蓋按掣。

約十五分鐘跳掣，讓其保溫十五分鐘即可開飯。簡簡單單就是好！

***Please leave your feedback, thanks!***

藍莓飲 Blueberry Drink

 

自家製清涼明目藍莓飲，非常美味！做法簡單，主料是藍莓、紅蘿蔔、杞子，其他配料隨意，但我認為不宜太多，我只加了蘋果，取其甜味。

 

藍莓一包，紅蘿蔔(甘筍)一條，杞子適量，爽身紅蘋果一個。藍莓、杞子浸洗乾淨。甘筍、蘋果切好。加入約500cc冰水。

所有材料倒入攪拌器，打碎攪勻。

呢個份量可以做出約兩支500cc果液。放入雪櫃雪凍D飲，消暑、明目、有益，正！

清補涼糖水 Ching Po Leung Sweet Soup

清補涼湯飲得多，清補涼糖水係第一次煲。買左包清補涼，包裝後面提及可以煲糖水，一於試下。

呢包野係中國特產蝴蝶牌，但係響香港包裝，響藥材鋪見到，十五元一包。

包裝內既桂圓肉同薏米都係用膠袋獨立包裝。浸洗三十分鐘之後就可以煲得。我先煲薏米以外既材料，煲至蓮子開始腍身先落薏米，再煲至薏米剛腍就差唔多。

調味用黃冰糖，多少隨意。

煲好熱飲又可以凍飲，但攤凍之後個糖水變得較杰身。如果想放入雪櫃雪凍飲，煲時要加多一倍水。

***Please leave your feedback, thanks!***

酸菜絲瓜炒牛肉 Stir-Fried Sour Vegetable Silk Melon And Sliced Beef

瓜菜炒肉，如用兩種瓜菜就可以有無窮配搭。呢碟酸菜絲瓜炒牛柳就係一例。酸菜鹹脆，絲瓜爽滑清甜，兩種口味口感各異，但係又好夾。同炒牛柳，非常美味醒胃，各位不妨一試。 





材料好簡單：酸菜只需少量，絲瓜半個，牛柳肉適量，薑絲、蒜片、紅椒絲，就係咁多。

酸菜先用白鑊烘乾兜起。落油燒熱，落薑絲爆炒牛肉。再落切成滾度批左皮嘅絲瓜同蒜片，贊水贊酒，炒至絲瓜軟身，埋獻調味略為收汁即可上碟。

炒酸菜不宜太乾身，留多少少汁，非常惹味，送飯一流！

***Please leave your feedback, thanks!***



淡菜節瓜瘦肉湯 Dried Mussels Hairy Melon Lean Pork Soup

早前買左一大包淡菜，用咗一次，放入雪櫃就唔記得咗，今日拎番出黎，煲咗個淡菜節瓜瘦肉湯。

仲加埋好多配料，有薏米、花生、沙蔘、南北杏、陳皮同百合。一齊洗乾淨，浸半個鐘。

瘦肉少少就夠，呢度二十元瘦肉用咗半舊，切厚片。另外兩個節瓜，我擦左D毛，連皮煲。用左個半節瓜，留番半個可以用黎炒蛋或者煮粉絲蝦米都唔錯。

煲滾水，將材料放晒入去，大火煲滾再轉中細火，煲兩個鐘已經夠晒火候，調味就飲得！

今次節瓜連皮煲，所以個湯帶微綠色，淡菜帶少少鹹甘味，節瓜腍軟，全部湯渣都食得唔好嘥！

***Please leave your feedback, thanks!***