鱆魚乾蒸鯇魚腩 Steamed Dried Octopus And Fish Belly

 

各位好呀！冇見一排祝大家身體健康！事事順利！

 

今日煲蓮藕鱆魚湯，留起半截鱆魚鬚，用來整左呢味「鱆魚乾蒸鯇魚腩」，搞搞新意思！鱆魚浸軟剪好鋪在處理好、醃好嘅鯇魚腩上，放上薑絲就可以蒸。



 

蒸十零分鐘至魚熟，取出。倒出魚汁，剪碎鱆魚鬚，另切好葱花，校好蒸魚豉油備用。

 

魚汁係精華所在唔好浪費，將汁同鱆魚粒落鑊煮滾，煮至略收汁，灑上葱粒，加埋蒸魚豉 油，淋在魚腩上。

一味特色鱆魚蒸鯇魚就完成，非常惹味鮮美，撈少少汁送飯一流！

 

 

  ***Please leave your feedback, thanks!***

肥哉廚房2013年之前六百幾個貼文載於「隨意窩」網站，觀迎光臨指教：http://blog.xuite.net/fatjoykitchen/hkblog 

 

雲耳炒豆苗Stir-Fried Black Fungus With Pea Shoots

新一年要注意健康，食多點素菜。今次就炒番碟雲耳炒豆苗，清清腸胃。 



豆苗半斤剛好炒出一碟，加埋適量雲耳，加幾片紅蘿蔔校下色，材料十分簡單。先將雲耳浸軟先用油鹽水炆煮至自己喜歡既腍度。

豆苗浸洗乾淨，用較多油，薑片起鑊，落鹽、糖、贊酒炒至九成熟。 





 再將兩樣材料兜勻，將豆苗炒熟，埋薄獻即可上碟。

平時食得瑤柱扒豆苗、蟹肉扒豆苗多，今次食番餐雲耳炒豆苗，更覺健康清新！ 

 ***Please leave your feedback, thanks!***

干燒明蝦 Pan-Fried Tomato Garlic Prawn

2016新年快樂呀！飲和食德身體健康呀！今日一月一日等我整番碟嘻哈大笑「干燒明蝦」賀一賀佢！



時間關係，一於用懶人造法，買包「干燒明蝦醬」代勞。加埋八隻冰鮮藍海蝦，就係咁簡單。

海蝦洗淨，修剪觸鬚、頭上尖刺同蝦腳，索乾水，邊煎邊贊酒，燒至八九成熟。

此時加入「干燒明蝦醬」，快炒收汁至蝦殼有乾脆感即可上碟開餐。

新年伊始，再次恭祝各位豐衣足食，日日開懷大嚼！

***Please leave your feedback, thanks!***



北芪金雞粥 Radix Astragali (Beiqi), Jinhua Ham And Chicken Congee

呢個粥個名夠晒正！我要攞注冊商標。金雞粥者，金華火腿鹹雞粥之省稱也。個名起得好，煲同食都開心D！

材料：北芪幾片，陳皮一塊，金華火腿一塊，醃過夜去骨鹹雞約半隻。



先洗淨金華火腿，出出水，再用火腿、北芪、陳皮先煲好一個粥底。食前加入鹹雞肉，煲滾轉中小火「煨」一陣至雞肉出味，即可裝碗享用。

食時可在碗底鋪上生菜絲，倒入滾粥，再灑少少葱粒，幾條薑絲。金華火腿鹹香加埋雞香，呢個肥哉版金雞粥都幾滋味㗎！

***Please leave your feedback, thanks!***

滑蛋蝦球 Scrambled Eggs With Prawns

逛街市見檔口賣冰鮮海蝦，幾靚，有三個品種，每斤48元。我選了紅色同藍色兩種，各買半斤，共48元。紅色細隻少少嘅用黎整左呢個滑蛋蝦球。

其實即係蝦仁炒蛋嘅「分體版」，將炒滑蛋同炒蝦球分開擺碟，以免蝦球俾蛋包住見唔到。呢個炒法賣相靚Ｄ。

蝦仁剝殼洗乾淨，用粗鹽同生粉「省」一下，靜置一陣，再「啤水」多次，起「雙飛」後放入雪櫃。

起油鑊將已索乾水嘅蝦炒至成為蝦球全熟兜起備用。原鑊落蛋液(三隻蛋，加入少少生粉水，鹽、糖同葱粒)，快炒至凝固，鏟起放在碟圍邊，中間放入蝦球，再灑上少少青葱粒即成！

***Please leave your feedback, thanks!***

節瓜煮沙白 Braised Hairy Melon And Clams

節瓜煮沙白，清鮮美味。煮出適量湯液，加落飯食有湯飯效果，相當開胃。



材料：沙白一斤20元。節瓜一個6元。少少冬菜（一包三元用去四分一包)。沙白先洗刷乾淨再浸水幾小時。節瓜切條。冬菜清洗乾淨除去雜質，用滾浸淡，瀝乾水分，加入熟油同糖撈勻。

先用薑片起鑊爆炒節瓜，贊水煮至三成熟。再加入適量水煮熱，落沙白加蓋煮至沙白爆口。

再煮一陣至沙白全熟，此時加入適量冬菜，略煮一陣即可裝大碗，灑少少葱粒，上枱趁熱開飯。

加入適量冬菜，更惹味。個人認為沙白不及沙蜆鮮美，口感也略遜。各位如試做此菜，可以沙蜆取代沙白。

***Please leave your feedback, thanks!***

粉絲津菜煲 Green Bean Thread And Vegetable In Clay Pot

天氣轉冷，今日整左個熱辣辣煲仔菜。材料非常簡單，買左斤「袖珍黃芽白」同一包粉絲，用金華火腿炆煮。

菜洗淨，粉絲浸軟。金華火腿切幼條，略為浸洗，連同薑絲爆香，爆至金華火腿出油。

先放入津菜仔煮至入味兜起。再放入粉絲加水炆煮。

粉絲煮至略腍身，此時可以校色調味，令粉絲索足味。

將調左味既粉絲放入陶煲內，再在四邊放入津菜。開個獻淋在上面，成煲置於大火上加蓋燒至姐姐聲至收汁，開蓋將粉絲同汁液撈勻即可上枱開飯。 

***Please leave your feedback, thanks!***

鮮茄醬拌唐生菜 Mixed Fresh Tomato Paste And Chinese Lettuce

油鹽水灼唐生菜非常簡單普通，拌入新鮮茄醬就變出新意思。紅紅綠綠，有益兼特別醒胃！

生菜洗淨每片一開二，大番茄切碎，番茄仔切細粒。先用油鹽水灼唐生菜，瀝乾水份備用。再將番茄煮成濃汁，加入適量糖調味。

將瀝乾水唐生菜回鑊，淋上鮮茄醬，將兩樣材料撈勻。全程都唔駛開火。

 撈到好似醃泡菜咁就搞掂，可以上碟。

再在上面灑上碎茄粒就可以趁熱開飯！清爽既生菜俾濃濃既鮮茄醬包裹住，鮮紅嫩綠，口感新異又惹味，正！

 ***Please leave your feedback, thanks!***

雙茄炒雞肉腸 Stir-Fried Okra And Sliced Chicken Franks



你地仲會唔會食香腸呢？屋企雪櫃仲有一包美國廚師牌雞肉腸，今日就清左佢。 



世衛話香腸頭號致癌，食多無益。要食就一於用D有益既野中和下。毛茄番茄有益喇掛，所以就炒左呢碟雙茄雞肉腸。

毛茄先用鋼絲刷輕輕擦去表皮小硬毛，洗淨用油鹽水灼一灼，再過冷河切斜度。

香腸用水烚一烚再切斜度。番茄仔一個切細粒。

用蒜粒薑粒起鑊，先炒香香腸片，再落毛茄快炒，調味，再落番茄粒炒勻即可上碟。

咁食法心理上好似健康好多。雞肉腸雖然多食無益，但係食物始終係食物，冇理由掉左佢咁浪費。

***Please leave your feedback, thanks!***

蒸鹽水雞翼 Steamed Salty Water Chicken Wings

雪櫃仲有半包雞中翼共八隻，琴日開始用鹽水浸定，今日用電飯煲清蒸。鹽水裏面有八角、糖、紹酒、薑片。

雞翼浸在鹽水，在雪櫃過夜。蒸前放入砵內，置於電飯煲蒸板上。煲內放一量杯水，按掣蒸至跳掣再保溫十分鐘。

蒸好取出，倒去水份，用冷水清洗並浸透雞翼。

加入炒香既黑白芝麻、熟油、試味調味或加些豉油魚露，撈勻即可享用。雞翼滑到冇朋友，層皮真係滑不溜口，不過唔好食咁多皮喎。 

***Please leave your feedback, thanks!***