彩椒蝦球撈烏冬 Color Peppers Shrimp Balls With Udon

呢碟三色椒絲蝦球撈蝦汁烏冬超美味，值得向各位介紹下。整一至兩人份一碟，只須以下材料：

 三色椒各一片，蝦三隻，豆豉、黑芝麻小量。

烏冬一至兩包，蝦頭蝦殼煎汁一碗。我嘅做法係，買咗30元中海蝦(64元一斤)，將剝出來的頭殼用白鑊乾煎至微焦香。

之後落三碗水煮蝦頭殼，三碗煎埋一碗，過濾。再用過濾的蝦汁炆煮烏冬，煮至收汁。此時烏冬已軟腍並吸收蝦汁精華，上碟。

另燒熱鑊，落油贊酒將蝦爆炒成蝦球狀，兜起，再落豆豉起鑊爆炒彩椒，埋獻。

將彩椒、獻汁淋在烏冬面，排上蝦球，最後灑少少已用白鑊炒香嘅黑芝麻就大功告成。

食時將材料與烏冬撈勻，就係我今日整嘅「彩椒蝦球撈烏冬」喇。好味！惹味！

***敬請留言 Comments welcome***

乾蒸牛肉燒賣 Dry-steamed Beef Siu Mai

買咗成大疊燒賣皮，包完豬肉燒賣，點少得包埋牛肉燒賣吖，今日包咗八隻，仲有一大疊燒賣皮用唔完！

牛肉燒賣唔係純正牛肉，要加入肥豬肉先好食，我仲加入少少鯪魚膠，落埋陳皮，芫茜，葱。

免治牛肉先調味，我落咗：蒸魚豉油、鹽、糖、粟粉、梳打粉、雞粉。混入陳皮、芫茜、葱粒。加油、酒、清水，將所有材料攪勻，再撻佢三十下，放入雪櫃雪十幾分鐘。

今次唔整咁多，包八隻算數，啲料用唔晒留返蒸牛肉餅。大火計蒸五六分鐘就搞掂。

加咗梳打粉同撻過嘅牛肉，就係酒樓風味，比較滑、彈。一出籠唔使三分鐘就冇晒啦！

***敬請留言 Comments welcome***

四式燒賣 Four Style Siu Mai

四式燒賣：上圖左前蝦加魚，右前蝦加豬，左後魚加豬，右後蝦加魚加豬。

買到燒賣皮，試做肥哉版四式燒賣。上網見人整街邊檔魚蓉燒賣要用攪拌機打魚漿，再溝粉，我嫌麻煩，又冇攪拌機，於是改變主意，整個肥哉「四式燒賣」。我今次用咗三種植材料做燒賣餡：

鯪魚膠10元，蝦膠20元，半肥瘦豬肉攪碎30元。鯪魚膠同蝦膠，魚檔已經攪好，用佢地嘅配方溝好味同粉，豬肉自已醃好。於是乎……我混合出四種餡料，混合材料時唔好撈得太勻，太勻冇食趣。四種餡料即：1魚膠+蝦膠，2魚膠+豬肉，3蝦膠+豬肉，4魚膠+蝦膠+豬肉。咁就包都包得好玩啲開之啲啦（睇怕谷歌翻譯唔到我呢啲廣東㗎嘞)！「四式燒賣」登場！

你地分唔分到邊種餡打邊種餡呀？應該分到掛。左前係魚加蝦，左後係魚加蝦加豬，右前係魚加豬，右後係蝦加豬。如果你鍾意整嘢食，第一次包燒賣，都應該同我一樣咁開心興奮。包燒賣點包架，咪就咁包囉，冇乜技巧，唔使講到咁複雜，你有少少common sense就得，肥哉就係咁包↓，第一次肉手出鏡：

總之包到咁上下樣就得，呢啲平民大眾粗食，唔使追求咁完美（同買萬幾蚊個電飯煲煲飯一樣，都係過分多餘）。

包呀包呀，包咗四籠16隻，餡料用唔晒。已放滿個大蒸籠↓，睇下分唔分到邊種打邊種？？

跟住攞去蒸，水滾計大約蒸十分八分鐘，干蒸四式燒賣就可以出籠。嘩，蒸完出嚟變咗「混合四式」，我自己都幾乎分唔出邊式打邊式！

有啲真係要食落肚先知。下圖上半係魚加豬，下半係蝦加豬。

再嚟一張「四式燒賣拼盤」，睇真啲：由左至右：1蝦魚、2蝦豬、3魚豬、4蝦魚豬。

喂，埋嚟試下肥哉首版四式燒賣喇喂！你一粒我一粒，食下食下食清光！

買燒賣皮 Buying Siu Mai Wrapper

 

普通街市檔不易買到燒賣皮，於是專登走去深水埗搜購。傍晚五點幾六點，深水埗街市一帶超多人買餸，呢間粉麵廠門市幾位阿姐做到冇停手，顧客多到要排隊先有交易。

燒賣皮十二蚊一包，要雪藏保存。包裝上寫的是「麵皮」，這鮮黃色的麵皮含有人造色素「美國5號黃」。燒賣唔係日日食，睇怕食少少人造食用色素都冇乜問題掛。

一包成疊有成3.5CM厚，直徑約8.5CM。燒賣皮好薄，咁大疊應該有幾百張！

買到燒賣皮，一於燒賣就燒賣，整燒賣！

小紅腸鯪魚膠煎釀脆豆卜 Pan Fried Stuffed Beancurd Puffs With Small Red Sausage And Minced Dace Paste

今日買了鯪魚膠，本來想整肥哉版魚蓉燒賣，點知買唔到燒賣皮，結果買了豆卜。鯪魚膠釀豆卜整過好多次，今次一於搞搞新意思，加埋兒時回憶小紅腸，實行雙料釀脆豆卜。

十元豆卜有十六粒，一開二共有三十二件。十元鯪魚膠足夠釀有多，今次加埋小紅腸，鯪魚膠用量更少，可以留起一部分整另一個餸。

我用兩條小紅腸，剪成三十二個小圓片，先同青豆落鑊贊少少酒爆炒一陣，去除青豆草青味，上碟備用。另外，鯪魚膠加一隻蛋，少少胡椒粉，落適量粟粉攪勻，攪至再度起膠為止，放入雪櫃備用。加蛋可將魚膠濃度稀釋，令魚膠更軟更香滑。

之後在開邊豆卜釀入一片小紅腸，再封上魚膠。一共做咗三十二件。

今次試用海鮮醬做汁，加入少少蠔油。

將豆卜先魚膠朝下煎至微焦黃，慢慢贊水將魚膠煎熟，收水。再反轉將豆卜皮慢慢煎香煎脆。我今次唔用炆法，目的係要整個豆卜外脆內軟。煎至脆度焦度啱心水後，上碟。

用海鮮醬同蠔油加入青豆紅椒粒埋個甜中帶咸香又微辣嘅濃獻，可用碗裝起另上，也可淋在碟邊。

豆卜脆皮香口，釀餡有鯪魚有小紅腸，點微辣海鮮醬汁來吃，口感同味道都豐富有層次。好味！有新鮮感！真係食到唔停口呀！我肥哉推介，大家一定要試下。

蛋蛋魚片粥 Double Eggs Sliced Fish Fillet Congee

蛋蛋者，鹹蛋+皮蛋之謂也。今日唔食飯，用一隻鹹蛋一隻皮蛋煲魚片粥，加生菜底。

我嘅做法係：先煲好個粥底，有好多選擇，例如陳皮白果粥底，瑤柱粥底，雞湯粥底等等。然後將烚熟鹹蛋一隻，皮蛋一隻剪碎，放入粥底中再煲至兩種蛋粒都開始融化。

跟住就係生滾魚片粥，將滾粥倒入已鋪了生菜絲嘅碗內，趁熱拌勻，即成呢碗「蛋蛋魚片粥」喇！

十元六隻皮蛋鹹蛋 Six Preserved Eggs (Salted Eggs and Thousand Year Eggs) For Only Ten Dollars

十元可以買到六隻皮蛋或鹹蛋或兩溝，總之十元六隻，可算大平。

烚熟鹹蛋，切開皮蛋，兩隻都幾靚。

用嚟煮咩餸好呀？

十一年前嘅五仁金腿月餅 Eleven Years Old Ham and Nuts Mooncakes

 

多年前（2009年) 買了三個牌子的五仁金腿月餅，做比較，結果食唔晒，放咗入廚房食物櫃，束之高閣沒再理會，點知唔經唔覺就一放頭尾十一年！

最近拾執廚房就執番佢地出嚟，三個牌子月餅都係獨立包裝，有防潮劑，在月餅盒內保存完好，放咗十一年都冇生蟲冇腐爛，只係顏色變深，香味消失但冇發臭，只係有一種微焦的氣味。

三個月餅都變硬了，要用大力先可以切開。

裏面嘅果仁同金華火腿大部分都已融為一體，睇睇下好似考古發掘古墓發現嘅古代食物，你敢唔敢食！？梗係唔食啦，月餅都掉晒，僅立此存照。

豉椒蒸肉排矮瓜底 Steamed Pork Rib With Preserved Black Bean And Red Chili Pepper On Peeled Eggplant

豉椒蒸肉排常吃，有沒有試過用去皮矮瓜墊底？這樣蒸出來的矮瓜，非常軟滑，入口即化。家中有長者最啱食。材料非常簡單：

肉排一條二十元，矮瓜一條，蒜頭、豆豉、紅辣椒、葱適量。先用豆豉、糖、粟粉、少少紅辣椒粒、少少鬆肉粉醃肉排。之後將矮瓜完全去皮再切幼條，排在碟底。在上面鋪上已醃透入味的肉排。

燒滾水，大火蒸十二分鐘，取出，此時已可上枱開餐。我今次將蒸出來的汁液再加適量生粉水，以蒜頭、紅辣椒粒、糖、蠔油推一個獻汁，灑上葱粒，淋在肉排和矮瓜之上，令碟蒸餸有少少炆嘅效果，又冇炆咁肥膩。

呢味餸可以送飯，如用來炆米粉，即變成豉椒肉排茄子炆米，我今日就用咗半份來炆米粉，惹味過送飯！