英國茄汁豆係兒時回憶經典之一，今次買左一罐黎燴牛肉。牛肉檔哥仔介紹我燴「牛柳邊」，買左30元。
除左以上主角，仲要一條青瓜，一個番茄，一個洋蔥。
做法：
牛柳邊醃好，青瓜、番茄、洋蔥切粒。
先爆炒洋蔥，再落番茄，加水炆煮到溶。落茄汁豆，推勻，煮約十分鐘，撈起。
用薑起鑊，爆炒牛柳邊，加入茄汁豆一齊燴，至汁液濃稠，試味，熄火，落青瓜粒兜勻，即可上碟。
呢碟野用黎撈飯，可以餵飽一家人，今餐唔使買第樣送啦。
2010年10月24日 星期日
2010年10月17日 星期日
瑤柱雪耳節瓜豬肉湯 Dried Scallop, White Fungus, Hairy Melon and Meat Soup
肥嘟嘟節瓜四個。瑤柱六粒。雪耳一朵。不見天豬肉一舊。豬骨一舊。
呢個湯我係「分體式」煲。因為我唔鍾意食太腍既節瓜。更唔鍾意食太腍既雪耳。
所以煲既步驟係咁：
1 豬肉豬骨出透水，洗淨。
2 瑤柱浸洗。
3 先煲豬肉、豬骨、瑤柱、落兩粒蜜棗。煲最少個半鐘。
4 節瓜大量，切好。此時將豬肉撈出。放入節瓜。煲一個鐘。
5 此時撈出節瓜。放入已浸洗好，摘好既雪耳。煲半個鐘。
6 最後，將豬肉切片。節瓜、豬肉放回煲內，煲番滾，調味，大功告成！
勝瓜炒鮮魷 Stir Fried Silk Melon and Squid
鍾意炒勝瓜，好滑好清甜。今日用黎炒鮮魷。
專登唔搣鮮魷D衣。
先醃好鮮魷，用油爆炒，上碟。再炒勝瓜。鮮魷回鑊，埋獻即成。
冇乜技術可言。因為我唔識切鮮魷花，哈哈！
2010年10月10日 星期日
秀珍菇瑤柱炒蝦球 Stir Fried Dried Scallop and Mushroom with Shrimp Ball
有日去某大酒家食過碟桂花炒瑤柱，覺得不外如是，番黎想試下炒，就整左呢碟野。
瑤柱要浸軟，煮腍，再撕絲，燒熱鑊炒至收乾水金黃色。
秀珍菇浸洗乾淨，用薑片起鑊，落鑊炒熟，瀝乾水。呢的秀珍本身散散地，炒時出左好多水，我留起左用黎整多個瑤柱菇汁粟米羹。
蝦仁啤透水，起雙飛，放入雪櫃抽乾水。
大火燒熱油，放入蝦炒至起球，放入秀珍菇大火快炒，再落瑤柱絲，贊油埋獻收汁，灑上蔥粒上碟。
好鮮味架。附送一個瑤柱菇汁粟米羹：
2010年10月3日 星期日
蘿蔔炆肉片菜薳底 Turnip and Meat Stew with Fired Vegetable
響應多菜少肉，呢碟送以蔬菜為主，幾片豬肉係煲燕麥粥留起的。
白蘿蔔一個切幼條。
菜心一斤摘薳。
豬肉少量醃勻。
做法：
先大火炒菜薳，落少少蠔油吊味，菜薳放大碟內圍邊。
大火爆肉片，落蘿蔔，加水、酒、鹽、糖炆煮至蘿蔔轉透明。
埋個略厚獻汁，用剩少少蝦籽，落埋。獻汁要略多，以便淋在菜面。
調好味收好汁，將蘿蔔肉片放在碟中央，淋上適量獻汁即成。
菜薳吸收左炆蘿蔔既甜味，特別好食！
皮蛋鹹瘦肉燕麥片粥 Preserved Egg and Salty Lean Meat in Rolled Oatmeal
燕麥片粥真係唔錯，今次呢煲，可能少食，覺得好食過皮蛋瘦肉粥。
材料：
燕麥片2碗，配清水12碗。
脢頭瘦肉20元。皮蛋1隻。沖菜1元。薑絲適量。
煲：
康寧大玻璃煲一個。
做法：
脢頭瘦肉用鹽、酒醃過夜。蒸熟攤凍搣絲。皮蛋切粒。沖菜浸洗切絲。薑切絲。
煲滾10碗水，轉中火慢慢將兩碗麥片放入，邊攪邊煲。期間熄火加蓋焗一陣，又開火再煲。咁做係要俾時間麥片吸收水分並溶入水中。
加入瘦肉、皮蛋、部份沖菜，邊攪邊煲，熄火焗，做法同上。
再開火，此時肉同皮蛋味道已融入麥片粥內，煲粥應比較杰身，按情況可慢慢加入兩碗水，邊攪邊煲至滾，直至濃度適中。
調味，以薑絲沖菜絲伴食。
好味！又滑又香！心理上覺得食燕麥有益健康，;咁就食得更開心D啦！
2010年10月2日 星期六
矮瓜層層疊 Eggplant Tower
乾炸矮瓜好食架。買左四條手指矮瓜，就咁炸。
切長條，浸一浸鹽水，再撈少少幼盬。
炒香蝦子備用。
燒熱油鑊，放入矮瓜條，炸至腍身撈起，瀝乾油。
砌成層層疊，每砌一層灑少少蝦子。
凍食仲滋味！
呢次D瓜皮保持唔到紫色，可能係油溫唔夠同炸得過熟，下次有機會再試第二版先。
清蒸冰鮮雙斑 Steam Garoupa
我都知清蒸梗係要游水石斑靚，不過見D冰鮮斑都好鮮明，想試下蒸出黎味道差幾遠。我都知蒸已經瓜左既雪石斑最好落肉絲、冬菇絲吊下味。我屋企都有冬菇，不過我今次專登唔落，就係要試下清蒸冰鮮斑係咩味。
呢兩條要63元，4.5元一兩。
蒸完個樣都OK，食落都可以接受，不過同游水斑梗係冇得比啦。
味道比較「木」，唔夠「鮮」；肉質唔夠「彈牙」唔夠「滑」。
冰鮮野唔要求得咁高啦。
2010年10月1日 星期五
費事煎釀雙尖椒 Fried Minced Fish Paste with Green and Red Chili Peppers
今日又買左青紅尖椒，貪佢地香口過燈籠椒，又買埋魚膠，諗住又整釀雙椒，不過買左番黎又唔想釀，於是就煎魚餅切片，一於整碟「費事煎釀雙尖椒」。食左落肚都係一樣姐。
上次整過「真係煎釀雙尖椒」，響呢度：http://hk.myblog.yahoo.com/fatjoykitchen/article?mid=893
三樣炒埋一碟，好味！
清炒藕片蝦仁 Stir-Fried Sliced Lotus Root and Shrimp
藕片爽脆，蝦仁爽滑，天椒帶辣，青蔥引香。
做法：
1 嫩藕一節刨皮切薄片，沖洗乾淨，放清水中浸泡，落兩滴白米醋。
2 冰鮮蝦一斤剝淨啤水索乾放入雪櫃。
3 天椒去籽同青蔥切粒。
4 燒熱鑊落多少少油，爆薑片，收細火放入已索乾水既蝦仁泡一泡嫩油，撈起。
5 留適量油在鑊，較大火，落已瀝乾水既藕片爆炒，落少少鹽、贊油。
6 蝦仁回鑊，落天椒粒，大火快炒。
7 埋白獻，收汁上碟。
8 灑上蔥粒。
訂閱：
文章 (Atom)