番茄薯仔花蜆湯

番茄5個，薯仔2個，11元。花蜆一斤24元。

番茄切碎，薯仔切薄片。瓦煲煲滾水，放入番茄薯仔薑片，係咁煲。

另一煲將花蜆煲熟，留湯，拆肉。

待番茄煲至溶爛，加入花蜆湯，再煲至薯仔化開，落花蜆肉。

再煲至變濃湯，試味、調味即成。呢個湯越煲越濃越好味架。

 

節瓜蝦米魷頭粉絲 Braised Hairy Melon and Dried Shrimp in Bean Thread

無技家常送經典之：節瓜蝦米粉絲

今次加左少少魷頭，增加風味。又係易造到痺，只要俾D心機就掂。

節瓜兩個4元。龍口粉絲5元3包，用兩包。蝦米魷頭屋企買落。呢兩樣野好重要，尤其是蝦米，係味道既關鍵，一定要買靚D，乾淨無怪味既。

將節瓜切條備用。蝦米洗淨，唔駛浸水(我唔浸水，因為一陣炆煮時根本就係用水浸煮)。魷頭洗淨剪碎備用。粉絲沖洗一陣，只須略為浸軟，千祈唔好浸腍(冇必要，因為一陣會煮到夠腍)。

呢個送全用瓦煲製作：

用薑片蒜蓉起煲，落少少鹽，爆節瓜，贊少少水同酒煮到略為透明，鏟起備用。

再爆炒蝦米魷頭，由佢微「炸」一陣，令蝦米收乾身。此時贊入兩碗水，煮滾。

放入粉絲，加蓋煮一陣。

煲內粉絲略為收水時，放入節瓜再煮。埋獻(老抽、生抽、糖、鹽、胡椒粉、生粉)，加蓋、睇火，一直炆至收汁。熄火，成煲野局一陣，即可上大碗享用。

嘩，真係好夾味，D粉絲唔會太腍，帶微韌咬勁，好好食架！

鍾意食辣落埋指天椒，仲正！

 

 

豬膶肉丸粥

食剩兩碗飯，又用黎煲粥(加陳皮、薑絲)。今次整豬膶肉丸粥，加生菜底啦。

豬潤10元。半肥瘦絞碎20元。生菜適量。豬膶切片洗淨血水，用酒、生抽、鹽、糖、胡椒粉、生粉撈勻放入雪櫃備用。半肥瘦用鹽、糖、生抽、生粉搞一陣，撈勻放入雪櫃。

豬肉入味後，整成肉丸，入鑊蒸12分鐘。

待粥煲好後，先放入肉丸煮一陣。豬膶沖洗乾淨，放入粥內煲滾至熟。

大碗底放入生菜絲，倒入滾粥，趁熱撈勻，即可享用！

雙榨菜薑蔥蒸牛肉

榨菜蒸牛肉係普通家常送，今次整少少變化，效果真係幾好喎。

雙榨菜：中國四川榨菜(左) + 台灣榨菜(右)，兩舊5.5元。

牛肉：我問牛肉檔哥仔，要買蒸既牛肉，要有d肥既，佢切左條肉眼邊，都幾多油花。我話唔要咁多肥牛，要搭d瘦既，佢又切左少少瘦牛。加埋23元。

呢碟野咁駛落油，我想食辣，於是準備少少潮州辣油，撈埋薑絲備用。

榨菜洗淨切片，用鹽水泡浸。牛肉用薑蓉、老抽、鹽、糖、胡椒粉、生粉醃好備用。

醃夠時間後，榨菜渣乾水，撈埋牛肉，放入蒸鑊，水滾計蒸8分鐘。

蒸至6分鐘，放入潮州辣油同薑絲，再蒸2分鐘。

放埋蔥粒，即可上檯。

中國榨菜較咸，爽中帶韌；台灣榨菜較淡口，爽中帶硬。加埋兩種牛肉，配搭豐富。

鴛鴦苦瓜枝竹炆排骨

中國苦瓜+泰國苦瓜各一個，7元。枝竹一包7元(枝竹以前5元包，一包多過而家，而家加左價，又少左)。腩排兩條26元。

蒜頭、豆豉、薑適量。

苦瓜切件，浸鹽水。枝竹浸軟剪度。排骨用糖、生抽、老抽、生粉、酒醃勻。

起鑊爆炒排骨至微焦香鏟起備用。

蒜頭豆豉薑片再起鑊，爆炒苦瓜，鏟起備用。

轉用瓦煲，燒熱個煲，放入排骨(連汁)、枝竹先炆煮一陣。

再加入苦瓜，加適量水，加蓋炆一陣。

開蓋，加獻汁(老抽、糖、生粉、水)，撈勻，加蓋，轉大火炆至收汁。

上碟，開飯喇！

鴛鴦苦瓜搞搞新意思，枝竹索晒D汁，好入味。我鍾意收汁，鍾意苦瓜有D咬頭。如果鍾意多汁可以落多少少水，鍾意腍D口感，可以炆耐D。

 

小紅腸洋蔥煎蛋

大陸小紅腸好味架，試下用黎煎蛋。加埋洋蔥。

小紅腸三條切粒，洋蔥半個切粒，蛋三隻，蔥適量。

小紅腸爆香，洋蔥爆香分別鏟起，打勻雞蛋，放入小紅腸同洋蔥，撈勻，落鑊煎至焦香，即成。

鹹魚蒸肉片

馬友鹹魚一片。半肥瘦豬肉20元。薑絲大量。

半肥瘦豬肉切片，用米酒、豉油、糖、胡椒粉、生粉醃勻備用。

鹹魚洗淨備用。薑切絲備用。

將鹹魚放在豬肉片上，鋪上薑絲。

水滾計蒸十五分鐘即成。

 

韭菜花炒蝦球

韭菜花一扎6元。冰鮮中蝦一斤40元。指天椒適量。

冰鮮蝦剝乾淨，去腸，用鹽同生粉醃一陣，然後啤水N次，直至清爽通透為止。索乾水，將較大隻既起雙飛，放入雪櫃備用。

韭菜花切度，洗淨備用。

起嫩油鑊，放入撲左薄薄一層生粉既蝦泡嫩油至九成熟撈起。

薑片爆鑊，放入韭菜花贊水炒至快熟，贊油，再將蝦回鑊快炒。

埋獻(鹽、糖、生粉、豉油)收汁，用紅椒絲裝飾即可上碟。

再黎張特寫，韭菜花清甜無渣，蝦球鮮爽啖啖肉，好正架！