豆竹蠔菇尖椒炆豬腩 Braised Pork Belly With Bean Milk Stick Oyster Mushroom And Red Pepper

響超市見到有鮮豆竹賣，買左包。又買左包韓國蠔菇King Oyster Mushroom 。



再買左幾隻紅尖椒，用黎炆豬腩肉。豆竹洗淨切短度。蠔菇切粒。尖椒切角。

豬腩肉醃一個鐘以上，再出水，爆香。



再落薑片，爆炒豆竹、蠔菇。

腩肉回鑊，加水蓋過面炆之。



炆至肉腍收水，調味，落埋紅尖椒角，埋獻。再轉入瓦煲，加蓋燒至姐姐聲即可上枱。

味道普通啦，豆竹唔夠普通腐竹好味。

英式肉腸三色螺絲粉 Le Eliche Tricolori And British Style Banger

買親通粉之類都有排食，好似包三色螺絲粉，食左一次，仲有好大包，於是又整左呢碟野。



呢包英式肉腸（主要成份係豬肉、牛肉、麵包碎、麵粉），用半煎半煮方法整好。一條已經好Heavy，伴三色螺絲粉，加少少茄醬，又一餐。



呢隻banger腸，味道普通，鹹，冇乜肉香。

中下價肉腸，係咁上下喇，呢款有8.3％係麵包碎，質地木左少少。



間唔中食一餐都可以啦。

紫洋紅椒炒青通 Stir-Fried Purple Onion, Red Pepper And Green Water Spinach

呢個菜顏色豐富，普普通通炒一碟通菜都可以炒得更有趣味、更健康。



材料：

1）紫洋葱一個  (10元三個）
2）紅尖椒兩隻  (5元三隻)
3)  青通菜一斤  (8元斤)

所有材料洗淨，洋憼同紅尖椒都切幼條，青通菜切去部分通頭，摘好。

燒熱鑊，落油，落薑片，先爆香洋葱同尖椒，兜起備用。

跟住落蒜片炒通菜，我今次用魚露炒，冇落鹽。



通菜炒至差唔多得時，將洋葱紅椒回鑊，大火快炒兜均即可上碟。



炒青通加入紫洋紅椒，色香味都更豐富！

 

 

火腿津白 Braised Tianjin Cabbage With Ham

火腿津白簡簡單單，但係非常美味。去酒家食，閒閒地都要六七十元碟，白已煮就平好多。



響超市買左個中型短身紹菜，6.5元。用幾片金華火腿就可以整出呢碟菜。

金華火腿切片洗淨。紹菜切幼條。

燒熱鑊，落泹落薑片，落紹菜炒一陣，贊水蓋過菜面，加埋幾片金華火腿，加蓋煮。



煮至菜完全腍身，取出火腿片切絲。



煮至水份略為收乾，埋個薄玻璃獻，即可上碟，菜面放回火腿絲就完成。



呢個火腿津白完全唔駛落鹽。如果改用雞湯煨煮就更和味。

鹹肉絲瓜豆腐魚尾湯 Salted Pork Dice Silk Melon Bean Curd Fish Tail Soup

呢個湯有鹹肉味，又有魚鮮味，又有絲瓜既清甜，好好味，大家有時間可以試下。



材料包括：
1）大魚尾一條14元
2）豆腐一塊3.5元
3）絲瓜半個
4）金華火腿三片
5）薑片適量

半肥瘦鹹肉半舊，切大丁。絲瓜半個批皮切條。大魚尾洗淨抹乾水，放落用薑片起鑊既熱油鑊，慢慢煎至兩面微焦香。



將煎魚尾既油全部「秘」出，放入金華火腿，倒入滾水淹過魚尾面，加蓋先滾約二十分鐘。



再加入豆腐同鹹肉丁，再加蓋滾約二十至三十分鐘。



最後加埋絲瓜條，加蓋滾五分鐘。調味即成。



湯渣都唔好嘥，魚尾仍然鮮美，點靚豉油好好食。

肥哉小炒 Fat Joy's Stir-Fried Dish

買左舊半肥瘦豬肉，20元，醃鹹烚熟，分左兩半，一半切條做左呢個小炒。另一半切大粒滾左個魚尾湯（見另一貼文）。



小炒其他用料包括：



1）韮菜花7元
2）中芹3元
3）韮黃2元
4）蝦乾17元兩，用左少少。

燒熱鑊，落油，爆香已浸洗瀝乾水既蝦乾同肉條，兜起。

留番炒完既油，再燒熱鑊，落薑片、中芹，贊水，先炒香。再落韮菜花，炒勻。



蝦乾肉條回鑊，再大火顛炒，贊酒，埋獻。最後落埋韮黃快炒收汁熄火上碟。



惹味，和味！

梅酒(四百二十五天) Plum Wine(425 Days)

老豆！父親節快樂呀！



開支梅酒乾番杯先！浸左一年零兩個月喇，四百二十五日喇。

酒味香，有梅子果味，又唔係太甜，都唔錯。

雖然全屋都唔係酒徒，今日都試少少啦！



晏畫仲炒左個肥哉小炒同滾左湯，唔得閒貼上黎住喇，要出街同老豆過節喇。


Happy Father's Day! 飲杯！

酸甜魚手指 Fish Fingers In Sweet And Sour Sauce

炸野好「晒」油，今日貪得意又忍唔住，於是整左呢碟酸甜魚手指。整完剩番成一大湯碗「魚油」，你話點算好呢？

材料：



1）急凍龍利柳一包14元。想個送正D梗係買靚魚好似石斑呀、銀雪魚呀咁啦，平民百姓買十零元包魚就可以喇。
2）乾葱頭兩粒。

汁料：



茄汁+喼汁+玄米醋+水+生粉+糖+雞粉。我冇譜架，隨意自己試岩味就得啦，不過一定要落醋先可以吊出可口既酸味。

做法：



1）龍利柳（其實唔知係咪龍利，佢個包裝係咁話，總之唔係腍魚)，解凍後徹底索乾水。用少少鹽、紹酒、胡椒粉醃佢一小時以上（最好放入雪㰓)。




2）將醃好既魚手指上勻生粉，逐D逐D放入已燒熱油鑊中炸。全部炸完一次後索乾油，再全部放入油鑊炸第二次，炸至表面金黃色撈起索油。
3）倒起鑊中油，剩番少少，爆香乾葱頭，倒入汁料煮至濃稠。



4）放入魚手指，兜勻令魚手指索滿酸甜汁再略為收乾，即可上碟。



嘩，正呀，一路偷食一路趁熱開飯喇喂！！

豆芽通頭煎蛋 Fried Eggs With Bean Sprout And Water Spinach Stem

呢碟煎蛋平平無奇，只係用左少少細豆芽同通菜頭(通菜莖)做餡。



兩樣野都好爽口，又有纖維素，通菜頭平時多數當垃圾掉，而家切粒煎蛋，又平又好食。



豆芽切碎，通頭切粒，放入已燒熱落油既鑊先炒一炒，落少少鹽，贊少少酒炒至差唔多熟兜起瀝乾水。



打好三隻蛋，放入豆芽通頭，攪勻。用乾淨鑊燒熱落油，放入蛋液，慢慢煎至兩面金黃裏面凝固，灑少少葱粒即可上碟。



平時炒豆芽炒通菜時，都可以留起少少做呢個煎蛋，咁又整多碟送。

番茄牛粒三色螺絲粉 Le Eliche Tricolori With Diced Beef In Tomato Paste

天氣熱唔開胃，唔想煮飯。



整番個番茄牛粒三色螺絲粉，簡單，開胃，美麗！





三色螺絲粉用滾水落少少油鹽煮軟，過冷河，再瀝乾水，落少少鷄粉，少少欖油撈勻備用。



番茄用兩塊香葉，落糖，落少少黑米醋煮爛再煮成茄醬備用。

澳洲牛粒半包切細，落急汁、豉油、糖撈勻醃一陣。再爆炒至岩岩熟兜起。



將三色粉放入碟，鋪上牛粒，再加茄醬，再灑少少Rosemary迷迭香葉。



將所有材料撈勻，食得！醒胃、飽肚又有益！！