銀山砵酒桶蠔

吳松街金金既銀山砵酒局桶蠔。用張錫紙包住黎局，打開之後似唔似「銀山」？幾好味。

招牌雲英雞

吳松街金金既招牌雲英雞，呢個例牌好袖珍。右邊有幾舊海蜇伴碟。

粉彩白底瓜蝶日用瓷之：瓷碟

粉彩白底瓜蝶日用瓷之：瓷碟

直徑十吋半。

黎個中央近鏡

煲底豬皮

好食過晒D雞手鴨腳，皆因入晒味！

雞手鴨腳煲(豬皮底)

整呢個煲都幾大工程，要分三部分進行架。

料：雞全翼4隻11元。鴨腳10隻13元。豬皮一塊15元。潮州鹵水汁三分一樽。陳皮、八角、薑片、蒜頭適量。

準備：

1 雞全翼解凍後，落糖、豉油、酒(可落多D)、薑蓉醃起碼一小時。

2 鴨腳洗淨出水，剪除指甲備用。

3 豬皮啤水啤乾淨，再出水，剪成長方塊備用。

做法：

1 燒大滾水，放入雞全翼滾8分鐘，然後熄火浸8分鐘(水要全部蓋過雞翼)，過冷河沖淨潺渣上碟。

2 用瓦煲煲滾大半煲水，倒入鹵水汁，加兩粒八角、一片陳皮、兩片薑片，放入鴨腳轉文火炆起碼四小時至腍上碟。

3 豬皮楂乾水，起油鑊，落薑、蒜頭、鹽爆香，再落豬皮爆炒上碟。

下圖：雞翼已浸至九成熟。鴨腳已炆四小時以上至腍身。豬皮已爆炒。

4 用乾淨瓦煲底薄掃一層油，鋪上豬皮打底，然後整齊排入雞翼、鴨腳。加入兩碗清水，蓋蓋用文火炆到水滾。

5 準備蠔油獻：蠔油三湯匙、糖兩茶匙、生粉兩湯匙(生粉不能太少)、老抽適量，用兩湯匙水開勻。

6 瓦煲水滾，開蓋倒入蠔油獻，輕輕搞勻，再蓋蓋文火炆至收汁即成。

按：(1) 雞翼同鴨腳用唔同方法整熟，可以增加色水對比，如果同用鹵水汁煮，色水一樣，個煲既賣相就會單調。 (2) 鴨腳一定要炆到腍，唔係唔好食，但係雞翼最忌炆得太耐，皮爆肉鞋。所以最好浸至八九成熟最後先入煲炆。

豉油王乾煎大蝦碌

簡單無技，只要蝦靚就得。用活海蝦當然更好。除左靚豉油，完全唔駛落任何調味料。

料：冰鮮大海蝦四隻。頭抽。薑片。

做法：

1 大蝦洗淨。修剪一下。去腸。抹乾水。

2 燒熱油鑊，落薑片捽勻d油。

3 落蝦。要不時調整火力。將蝦乾煎至攣身。贊油落頭抽。

4 煎至蝦殼微焦香脆，即可上碟。

草菇筍片雙瓜湯

清甜鮮美的湯水：草菇筍片雙瓜湯

料：冬瓜一片3元。絲瓜一條5元。草菇四兩4元。清水竹筍半罐。清雞湯一盒(可用清水代替)。薑片適量。

準備：

1 冬瓜去皮切細粒備用。

2 絲瓜削皮切度浸鹽水備用。

3 竹筍切片備用。

4 草菇開邊備用。

做法：

1 燒大滾水放入薑片、冬瓜粒、草菇、筍片煲20分鐘至出味。

2 再放入絲瓜大火滾2-3分鐘熄火上湯盅(絲瓜會在盅內熟)。

3 加鹽調味，即可享用此清鮮湯水。

 

蝦膏鹹蛋魷頭筍絲蒸肉餅

呢個係三高(高鹽、高脂、高膽固醇)肉餅，要小心食用呀。我在製作過程中已經一滴油同一粒鹽都冇落架喇。
料：半肥瘦豬肉20元絞碎。鹹蛋1隻(5元3隻)。乾魷魚頭適量。罐頭清水竹筍9.9元一罐。大澳蝦膏三片。指天椒兩隻。薑三片。

準備：
1 豬肉用糖、豉油、胡椒粉、酒撈勻醃一陣。
2 魷頭浸軟去除眼、咀硬物，剪粒，落豉油、酒、胡椒粉、糖、豉油醃一陣。
3 筍切絲。

4 將上面三樣野放入大碗內，加埋三片蝦膏，落生粉，用手搓勻，靜置一小時。

做法：
1 將已靜置一小時既料放入不銹鋼碟鋪勻，中央放鹹蛋黃大火蒸10分鐘。
2 蒸10分鐘後，開蓋，再倒入鹹蛋白再大火蒸5分鐘。

3 加少少紅椒絲即可享用。

按：呢個肉餅非常惹味，不過樣樣料都唔多健康，記住少食多滋味，一年整一次好喇。

白瓷通花三件式蓋碗

簡單就是美，無須多言。

薑汁燉鮮奶

義X凍薑汁燉鮮奶。整得好靚，好滋味呀！

蒜蓉通菜

其貌不揚既蒜蓉通菜，師傅炒都不免瘀瘀地色，不過味道唔錯。總算係名店出品啦。

例牌燒鵝

蓉蓉既例牌燒鵝。今晚呢碟韌左少少，不過都好好味，唔肥膩。

皮蛋酸薑

鏞X經典皮蛋酸薑，是平凡中的不平凡。好好味！

枸杞豬膶咸蛋肉絲湯

料：枸杞一斤16元。豬膶10元。梅頭瘦肉10元。咸蛋1隻。杞子適量。

準備：

1 枸杞摘葉留莖洗淨備用。

2 豬膶切半CM厚片，落豉油、糖、酒、油、胡椒粉、薑蓉、鹽、生粉撈勻備用。

3 梅頭瘦肉切絲，落豉油、糖、油、生粉撈勻備用。

4 杞子洗淨浸軟備用。

5 咸蛋一隻備用。

做法：

1 煲滾水2公升，放入薑片、枸杞莖滾10分鐘至出味，撈走莖，放入一半枸杞葉，咸蛋黃再滾10分鐘。

2 豬膶肉絲先拖滾水1分鐘，沖水清洗血污同潺，連同另一半枸杞葉、杞子放入煲內續滾10分鐘。

3 攪入咸蛋白即可上湯盅享用。

冬菇雲耳滑雞蒸飯 Mushroom, Fungus and Chicken Stream Rice

料：冬菇八隻(用香菇仲香，不過屋企冇)。雲耳適量。去核紅棗六粒。巴西雞髀扒一塊11.9(改用黃油鮮雞半隻正好多，不過我貪雪雞髀扒啖啖肉又易處理又平)。米一杯半(米起決定作用，要用你熟悉果隻米，知道米水要落幾多)。薑、葱、指天椒、煲仔飯豉油適量。

準備：

1 冬菇浸水洗淨，再用清水浸至軟身(冬菇水留用)。

2 雲耳、紅棗洗淨浸軟。

3 雞扒解凍後剪成大塊，落薑蓉、豉油、酒、胡椒粉、糖調味，加生粉、油醃一小時。

4 冬菇、雲耳浸軟後榨乾水，剪絲、剪半隨意。落豉油、糖、酒、油撈勻。紅棗剪粒備用。

做：

1 用大瓦砵一個，落米、水(用冬菇水代清水)。先放入冬菇、雲耳、薑絲大火蒸。15分鐘後就變成咁樣。

2 再加入雞件、剪碎既紅棗，再蒸12分鐘後就變成咁樣。

3 熄火局5分鐘。蒸好後落葱粒、椒絲。再淋上豉油熟油即可享用。

方魚肉碎魷頭粥(泡飯)

琴日用剩半份肉碎，今日天口咁熱，一於整番個方魚肉碎魷頭粥當飯，貪佢香口又有湯。

料：大地魚(方魚)乾一條5元。乾魷魚頭約1兩(56元斤)。半肥瘦豬肉絞碎10元。中國芹菜1元(買左斤菜心搭幾條中芹，加收左我1元，如果剩係買1元中芹，一定俾人丙)。沖菜一包1元。芫茜適量(可不用)。清雞湯一盒8.9元(可用清水代替)。

準備：

1 大地魚乾洗淨抹乾身，清除頭頭尾尾大骨，撕去邊皮，然後剪成細片備用。

2 乾魷魚頭浸軟，除去眼同咀硬物，剪段。落糖、豉油醃一陣。

2 沖菜洗淨去沙去雜質，沖水幾次備用。

3 肉碎加糖、豉油、酒醃一小時備用。

做：

1 起熱油鑊，將大地魚細片炸香，放涼，然後中成碎片。

2 倒起炸油，留少少炒肉碎，再放入魷頭、沖菜，爆炒至香氣四溢，再放入中芹快炒盛起(呢碟本身已是一個送)。

3 半煲清水加入一盒上湯，煲滾，放入熱飯三碗同炒好既肉碎、魷頭，再大火煲番滾。

4 成煲倒入湯盅，加入方魚碎搞勻，蓋蓋局一陣即大功告成。