罐頭篇10：煙熏午餐肉 Canned Food: Smoke Pork Luncheon Meat

響惠康見到長城牌出左一系列平價午餐肉，仍以白豬仔做招牌，12.9一罐，花款好多。



有煙熏，有蒜香，有香辣，有火腿。好奇之下，買左一罐煙熏午餐肉。



開罐倒出係咁樣。



煎兩片試下。

整碗餐肉一丁做早餐，呢碗野成本大約六元，出面茶餐廳要十幾二十元。



塊午餐肉食味都可以啦，煙熏味唔係好濃，只係有少少感覺。十幾元一大罐都算係咁啦。

白豬仔火腿豬肉六罐裝 White Piggy Chopped Pork And Ham Six-Can Package

嘩，上倉呀？買咁多，如果係車輪鮑就正啦。食完因住要通波仔喎。

冇法啦，一時手痕就買左，呢款「夾硬監你一買就」六罐裝火腿豬肉(佢唔叫午餐肉，用料靚少少架)，白豬仔，好味D架。

仲送條方巾，我諗姐係「碗布」掛，買番黎即晚已經煎左一罐加送。

又真係幾好味，整餐蛋飯、餐蛋麵都掂。我都係覺得呢類罐頭點都係要祖國出品先岩口味，外國果D唔係果回事。

條方巾原來都好正，吸水力強，又有彈性，用黎抹碗好快乾。
呢款「夾硬監你一買就」六罐裝，賣$65.9，平均每罐唔駛11元。算抵啦。

罐頭篇8：紅燒豬肉 Canned Food: Stewed Pork Sliced

哎也，真係嚇死人，肥到咁，油淋淋三十度室溫都擎晒油，食完真係即刻要去通波仔。



呢種中國罐頭真係好有懷舊Feel，選料仲係停響六十年代。那時，有得食豬肉已經不得了。平民所謂食豬肉，就等於食肥肉食豬膏。

見到呢罐野，感覺就係時光倒流五十年。呢罐共有四大舊肥豬腩肉，係好豐富既一餐了。



有冇人敢食丫，我地將佢蒸熱，淨係切左D瘦肉食，得丁多瘦肉。其他就變晒廚餘。

味道就好好，好惹味。

罐頭篇7: 梅菜鯪魚 Canned Food: Fried Dace With Preserved Vegetable

豆豉鯪魚食得多，專登買罐其他配料既鯪魚試下，買左珠江橋牌梅菜鯪魚。

個罐用拉環式，要大力拉到手指痛先拉得開一大半個蓋掩，我諗柔弱少少既女士可能唔夠力拉。拉蓋掩要好小心，因為要出死力，一唔小心會界親。

開罐裏面就係咁樣：



倒晒出黎係咁樣，好乾身下，同豆豉鯪魚最明顯分別係佢冇浸滿油。



蒸左十分鐘之後就係咁樣，可以睇到真係冇乜油，D「汁」其實係蒸既水。



幾好味喎，梅菜係甜梅菜，唔會太鹹，不過始終都係罐頭，梅菜較腍唔夠爽口。

幾送得飯架，間中試下都可以啦。

罐頭篇6：回鍋肉 Canned Food: Sliced Pork In SzeChuan Style

 

梅林牌版本有三，有上海版、有北京版，又有海外版(午餐肉)。

此款回鍋肉則有北京、上海二版，相中乃上海版，包裝紙條圖案設計顏色與舊時不同。

至此方知從前慣吃之回鍋肉，實乃今之北京版也。

此上海版回鍋肉，味道與慣吃者亦稍有不同，實為稍遜也。

筍片大而粗硬，肉塊則略嫌乾瘦細碎，辣油色澤也過於橙紅。



家中另購有北京版一罐，他日開食，當再作比較。

罐頭篇5：清真鹹牛肉包 Canned Food: Halal Corned Beef Bread

 

呢罐清真鹹牛肉都算經典，真係由細食到大。

12安士梯罐裝，更加係經典中既經典，13.9元。



用左三分一罐，整左四個葡汁鹹牛肉包。

餡料：



鹹牛肉三份一罐，洋葱半個，葡汁兩湯匙。

葡汁係上次用剩要清貨既，其實用咖哩仲岩。

罐頭篇4：勁肥梅菜扣肉 Canned Food: Super Fat Pork With Preserved Vegetable

大陸既梅菜扣肉罐頭，牌子好多，今次開左呢罐長城牌，18.9一罐。

睇下幾肥，浸響油裏面，問你驚未。

就咁食一定爆血管，淥左D菜遠伴碟。

罐野成罐拎去蒸熱(加隻碟蓋住罐面)。蒸好，秘左油，係咁樣。

成罐倒扣入碟，點知淨係見到罐底梅菜。

於是唯有夾番D扣肉出黎排碟。

成罐只得四塊扣肉，梅菜多多。

肥到不得了，瘦肉只得丁多。

梅菜腍得滯冇咬口。



冇人敢食，只係咬左D瘦肉就唔食喇。伴碟既菜就食晒。

如果你地冇quota就唔好諗住買黎加送呀。

 

罐頭篇3：午餐肉罐頭 Canned Pork Luncheon Meat

午餐肉罐頭真係多蘿蘿，響超市隨便都可以見到十幾個牌子。

我自細就食既係梅林牌，而家梅林午餐肉起碼有三種：一種係上海梅林，一種係北京梅林，仲有一種係歐洲梅林。

今次呢罐係上海梅林牌午餐肉。

打開係咁樣。

橫切左七塊，煎香，味道同色澤都唔錯，不過唔係我細個記憶中既味道，似乎偏鹹左少少。

點解得五塊架？係咪偷食左呀？我拎左兩塊去整餐蛋飯呀。

 

罐頭篇2：紅燒排骨 Canned Food: Stewed Pork Ribs

一向冇乜留意罐頭，屋企買左有時唔夠餸就會開。最近想寫下罐頭，開始留意市面賣既罐頭。

梅林一向係「名牌」，而家我先發現有兩家「梅林」。一家係中糧梅林(北京)，一家係上海梅林。兩家差唔多都出相同既罐頭，例如午餐肉、回鍋肉、竹筍等等，可說形影不離。都唔知以前細個食既梅林，係邊家，還是兩家都唔係。商場營運分分合合，我唔知咁多啦。某日響深水步某非名牌超市見到呢罐紅燒排骨，係中糧梅林生產，22元(我唔會格價，見到就買)，買黎試下。

由底開罐，係咁樣。

再反扣出黎，係咁樣。

蒸番熱，佢個汁係稀汁，足足有成半碗，唔係獻狀。味道偏甜，都唔錯。排骨係一字排，有大有細，一共有六舊。有瘦肉、肥肉、筋鍵、軟骨，味道同口感都唔錯。

呢味紅燒排骨全部係肉，而且比較肥，用黎加餸，配個灼青菜墊底應該更好。

梅林紅燒排骨每百克含65毫克膽固醇，多過榨菜肉絲一倍有多架。幾年前仲驗出有問題(可以上網睇)，都係要記住「少食多滋味」原則啦！

 

罐頭篇1：榨菜肉絲 Canned Food: Shredded Pork And Preserved Vegetable

罐頭食品不起眼，其實同我地既生活息息相關。屋企都常備一D罐頭看門口。由今篇開始，我會不定期寫下罐頭。

第一篇想寫既係呢隻梅林牌既榨菜肉絲。佢最有特色既地方係「二合一」式既上下罐連體設計。

上面係榨菜，下面係肉絲。

食時分別由頂同由底開罐，再將榨菜同肉絲撈勻。咁樣就唔會令到D肉絲因為長時間同榨菜放埋一齊而變得太鹹。呢種設計真係抵讚。

味道都好唔錯架，榨菜夠爽口，夠鹹而不太鹹。肉絲帶少少肥，雖然不免有D鞋，但有肉香，同榨菜好夾味。

百記賣12.5一罐，佳記賣11.9一罐。十零蚊可以慳返自己買材料整既時間，都算係超值啦。

撈勻蒸一蒸趁熱食，好味。

用黎配上海湯麵，偷懶唔煮飯，間中食下都好正架。

罐頭的「營養資料」列明每100克含膽固醇31毫克。成罐淨重240克，即係共有膽固醇74.4毫克架，唔好話佢唔事先聲明呀。