你地有冇用菜心黎煲湯或者滾湯呀？菜心清湯其實幾好飲架。
有時買斤菜心，淨係要食菜薳，摘左D菜「莢」出黎，你地會點處理呢？掉左佢？唔好浪費呀，可以用黎煲湯或者滾湯。
左面係菜薳，右面係菜莢。
今次就係買一斤菜心摘左差唔多半斤菜莢出黎，再加多三樣：白菜乾、冬菇、白背黑木耳，一於煲番個肥哉版「四蔬湯」。呢個湯色澤悅目又有益架！
冬菇、菜乾、黑木耳浸洗乾淨，冬菇切片，菜乾剪段，黑木耳切幼條。
菜莢洗淨。
先煲滾一煲水，放入薑片、冬菇、菜乾、黑木耳煲佢兩個鐘。
然後放入菜莢再煲一個鐘。全程用中慢火。
煲完三個鐘，就變左菜味濃郁既四蔬湯喇，落鹽調味就得。如果想好味D可以加少少雞粉，或者落一罐雞湯混和清水做湯底。
飲湯記得食埋D渣呀，又腍又好食架。
響屋邨平民茶餐廳叫一碟菜遠牛河，買相唔錯，味道都可以，你睇下幾多牛肉！
落D潮州辣油仲和味。
你地估下幾錢碟？
冰鮮蝦一斤35元。清水竹筍(冬筍)罐頭一罐。冬菇五隻。中芹兩棵。
呢個菜睇黎簡單，其實都幾多功夫。
蝦先處理好，放入雪櫃雪凍備用。
竹筍適量切片，用水落幾滴白米醋泡浸一陣。再榨乾水備用。
冬菇浸軟，剪成角粒備用。
中芹摘去葉，切短度備用。
薑片、乾指天椒適量。
做法：
1) 燒熱鑊，落油，用薑片起鑊，放入竹筍，贊酒爆香，烘炒至收乾水兜起。
2) 爆香冬菇，落水、老抽、糖、雞粉、麻油調味，炆至腍身兜起。
3) 燒熱鑊，落油，爆炒蝦仁，炒至八成熟時，將竹筍、冬菇回鑊，落中芹大火快炒，灑上乾指天椒粒，埋獻即可上碟。
蝦仁味鮮，冬菇味濃，冬筍清爽，中芹香脆，快D趁熱開飯啦！
材料：
1) 全蛋乾麵餅(幼麵，張榮記)三個。
2) 菜薳適量。
調味：
1) 靚頭遍老抽
2) 鹽
3) 麻油
4) 蠔油
5) 雞粉
做法：
1) 乾麵餅三個用凍水浸開，摷散，放筲箕上瀝乾水。
2) 麵仍放筲箕內，落調味料，用手摷勻。由得多餘的汁液由筲箕滴走。最後落適量油，將麵再摷勻。
3) 燒熱易潔鑊，落少少油，再放入已滴乾味汁的麵，半煎炒至麵身乾爽完全索乾汁液。
4) 上碟，拌以清炒菜薳同食。
呢個炒麵話明係「豉油皇」，豉油大晒，咩配料都專登唔落，可以食到靚豉油既味道。
做法簡單、容易、方便、易炒，麵身乾夾有咬口，又入味，效果都唔錯架。
學嚴浩先生浸左一枝洋蔥紅酒，浸過紅酒既洋葱食唔晒，今日用黎炒蛋。
洋蔥係白洋蔥黎，浸左紅酒八日，變左紫洋蔥。
將洋蔥切幼，用少少油爆香。放入蛋液中，再落少少蔥，鹽、麻油，撈勻。
炒至微焦黃即可上碟。
生食紅酒洋蔥唔係咁易入口，用黎炒蛋容易接受D。
開左罐午餐肉，一餐食唔晒，一於整番碟茶餐廳經典飯先。
喂，伙記，唔該一碟餐蛋飯丫！
好呀，兩塊午餐肉煎香，中間切一刀變左四塊半圓形餐肉。
再煎兩隻荷包蛋。
裝碟熱飯，放上餐蛋，再校個甜豉油(老抽、生抽、糖)淋上面，餐蛋飯黎喇！
篤穿隻荷包蛋，濃香蛋汁流出，混合豉油，真係一絕。
飯、餐、蛋三位一體，食得好滿足！
午餐肉罐頭真係多蘿蘿，響超市隨便都可以見到十幾個牌子。
我自細就食既係梅林牌，而家梅林午餐肉起碼有三種：一種係上海梅林，一種係北京梅林，仲有一種係歐洲梅林。
今次呢罐係上海梅林牌午餐肉。
打開係咁樣。
橫切左七塊，煎香，味道同色澤都唔錯，不過唔係我細個記憶中既味道，似乎偏鹹左少少。
點解得五塊架？係咪偷食左呀？我拎左兩塊去整餐蛋飯呀。
今次要試雙喜果隻蝦子麵喇，用佢黎整個北菇辦(拌)麵先。
冬菇八隻，炆熟。
菜薳十條，灼熟瀝乾水。
雙喜麵廠既蝦子麵餅兩個，用乾炆法炆好。
做好以上三樣，就差唔多完成喇。
將菜薳圍碟，中間放入炆到腍軟既蝦子麵，再鋪上冬菇，然後用炆冬菇既汁埋個較濃既獻，淋在上面即成。
呢碟北菇辦麵夠四個人食，食時將麵剪個十字，分四份，每人一份。每人兩隻北菇，兩條菜薳，同麵拌(辦)埋一齊食。剩番兩條菜薳係俾廚師既獎勵，即係我食埋。
雙喜麵好食喎，口感好軟、腍、滑，同用生麵整既彈牙口感唔同，係另一種食法。
呢幾隻越南鹹蛋似乎唔係好靚喎。
我買時冇揀，亦唔識揀。賣蛋俾我既哥仔都冇幫我揀，佢好快手就隨手包五隻俾我。
我想滾個冬瓜鹹蛋湯，打一隻鹹蛋，個黃好紅好靚，但係蛋白唔係透明，而係橙色既水。再打，一樣。本來想落鹹蛋黃同埋鹹蛋白，而家只好落黃，果D橙色既鹹蛋白冇要到。
個蛋黃就好好味，夠鹹香。
另外又蒸左兩隻，切開睇，蛋白今次係白色，都可以啦，不過個黃冇漏油。
一次過唔可以食咁多，仲剩番一隻，遲D先食。
好耐冇見過「刮殼」擺賣既鹹蛋喇，而家多數見到都係用膠袋仔包住既黑猛猛鹹蛋。
呢種「刮殼」鹹蛋差唔多變成集體回憶，今日見到，標名係越南特級鹹蛋，11元5隻，忍唔住就買左5隻。
上網查下文章，聽講越南鹹蛋係唔錯喎。
你地話點食好呢？
