整番個老少平安(肥哉版)！
材料：
1 布包豆腐二件，共5元。
2 鯪魚膠10元。
3 蝦乾十幾條。
4 冬菇三隻。
5 芫茜、蔥、薑絲、乾紅辣椒絲(怕辣可唔落)適量。
做法：
1 蝦乾、冬菇浸洗乾淨。冬菇剪粒，蝦乾一半剪粒，一半剪開兩段。
2 將豆腐搓爛，混入魚膠，再落冬菇粒、蝦乾粒，落鹽、糖、雞粉、胡椒粉、紹酒再搓勻。
3 將搓勻既材料鋪在碟上，蒸十五分鐘(水滾計)。
4 芫茜、蔥切粒備用。
5 另燒熱鑊，落油爆香薑絲，落剪開兩段既蝦乾同紅辣椒絲爆香備用。
6 老少平安十五分鐘蒸好後，倒去水份，灑上芫茜、蔥，即贊入爆香的蝦乾連熱油，再落少少頭抽，即可上檯。
嘩，真係好好味喎，快D黎喇喂，手快有手慢冇喇。。。
唔駛十五分鐘清碟！
冇「桿麵棍」呀，又係第一次整，整左十四個大小不一既「牛油(肥)捲」。一路食一路影，整完已經食左四個喇，咁搞法想唔肥都幾難。
換左快樂介紹既酵母粉，發得好過以前。以前隻粉原來不適用於麵包機。
參考象印麵包機食譜p.22頁「牛油捲」照做架。
將材料照抄出黎：
牛奶半杯(係象印附送個隻杯計)
大雞蛋一隻
高筋麵粉二又三分一杯
砂糖二湯匙
鹽半茶匙
牛油四分一杯 (其實都好多，整過先知驚！)
乾酵母一茶匙
蛋糊(搽麵糰面用)：
大雞蛋一隻
水四茶匙
做法：
將材料放入機，製成麵糰 (要一小時四十五分鐘)。
將麵糰取出，分成14個麵糰仔，用保鮮紙蓋住靜放二十分鐘。
將麵糰仔搓成十四個「牛油捲」，我搓得好差呀，算啦！放在已抹油的烤盤上，噴一些水，放在暖的地方三十至四十分鐘，讓其繼續發酵變大。
掃上蛋糊，放入預熱局爐，用160度局10分鐘(我既局爐Tefal計)。
形狀大小控制唔好，唔係好識搓粉，我諗要練多幾次先得。食就可以啦，都算鬆軟，不過仲可以更鬆軟。
趁熱食最正，外皮香脆，裏面香軟！
今日去百記買左喇。
個烘焙材料貨架俾人摷到七國咁亂，好多粉都缺貨，我呢包高筋粉係最後一包，酵母粉就仲有七八盒。
呢兩包野就買左五十幾元。買完返到屋企，要煮飯先，食完飯先整包。
上星期買左三個薯仔唔記得食，唔知用黎做乜好，見到雪櫃仲有一舊臘肉，又有冬菇蝦米之類。今日落大雨唔想出街，你話整咩好呢？自然就會想到煎薯餅！上網扒下文，一於整碟生煎薯仔餅啦。
睇下，落足料架。
薯仔刨粗絲，先渣乾水，再落多少少鹽醃佢半小時以上，醃到薯絲出水，再渣乾備用。
臘肉放飯面蒸熟取出切粒，冬菇浸軟切粒，蝦米洗乾淨。
用欖油起鑊，爆香薑絲、乾蔥粒、洋蔥粒，再放入臘肉、冬菇、蝦米，炒一陣。
將以上材料兜起，放入薯絲上，再落薯粉(如冇薯粉落其他粉啦)，雞粉，少少玉桂粉，加少少蔥粒，再加一隻蛋，全部攪勻成薯漿狀。
燒熱鑊，將薯漿捏成球形放入壓成餅狀，煎至兩面黃，即可上碟。
再灑少少蔥粒襯下色，唔錯喎，比想像中好食！
琴日響街坊粥鋪買左兩隻鹹肉粽，係五角式，十二元隻。
又黎拆解一下。去相啦！
十一安士重。
先用兩塊竹葉包料，兩邊各補一塊竹葉。
包料的兩塊竹葉點整個「金字塔頂」兜呢？
偷到師嗎？
都係用四塊葉。
糯米層似乎厚左D喎，我鍾意綠豆多D。
五香粉同鹹蛋黃都要多D！
味道都唔錯啦，上次隻四角粽好味D。
呢隻唔係鹹肉粽，我落左冬菇、蝦米、瑤柱、花生四樣做餡，就叫四寶粽啦。
我唔落五花腩，又唔落油。
第一隻係用番檔口隻粽四塊葉同條百幾吋既水草葉黎包扎。
學番佢咁包。
唔包開其實唔容易控制，只可以整成咁。
另外包多四隻，用左一扎粽葉，剩番兩塊。
同個鋼煲烚佢三個半鐘。
三個半鐘之後，攤凍秤一秤，輕過檔口隻粽一安士。
首先梗係開番第一隻檔口葉包個隻啦：
都算可以掛？
隻粽好「綿」，「綿」過檔口個隻。冬菇、蝦米、瑤柱、花生又香又腍。如果有舊肥美五香五花腩，其實仲好，加埋漏油鹹蛋黃，更好。不過為左健康，都係唔落喇。
補番個材料同做法：
1糯米隔晚浸，瀝乾水，落少少鹽同雞粉撈勻。
2綠豆仁洗淨浸二小時，瀝乾水。
3冬菇(要冬菇，唔要花菇)浸軟，剪開一半，渣乾水，落少少紹酒、糖、生抽醃一醃。
4蝦米洗淨浸軟。
5瑶柱浸軟摘去硬塊撕開。
6花生洗淨。
用竹葉四塊包一隻四角粽，先用大火烚再改中火烚三個鐘以上。
街市檔口四角鹹肉粽、紅豆粽十元隻，見佢包得咁靚，想學下野，買左兩隻，黎個解構鹹肉粽連環圖。
一隻鹹肉粽，一隻紅豆粽，外貌一樣，靠條紅繩仔識認(冇入鏡)。
扎到隻粽咁睇怕就係咁樣，師傅扎得好實呀。
隻粽有十安士重架。幾墜手架。
你估下扎粽條水草有幾長？解除束縛！！
慢慢逐塊葉解開，左邊最外面。
右邊一塊。
露出粽肉。
隻粽都幾靚架，不過繼續睇塊葉先。
兩塊竹葉褪少少位並疊，整成個兜。
成隻四角粽用左四塊中小形竹葉。
睇下隻粽幾多料！味道都好好。
在室溫之下先可以睇真舊肥膏，下面又一大舊鹹蛋黃。
賣十元雞一隻，又要包又要扎又要煲，又咁真材實料，真係要讚下佢。
不過睇到呢度，好驚血管閉塞呀！問你敢唔敢食？
(話你知：扎粽條水草有108吋長！)
