屋企有包大地魚乾，食極食唔完，仲有半包淡菜乾，又有半盒瑤柱。
一於將佢地浸透洗乾淨剪碎，用黎煲個比較另類既粥：地魚淡菜瑤柱粥。
淡菜乾風味獨特，地魚乾煙煙韌韌有咬口，加埋瑤柱蔥粒，一個二個一碗一碗係咁食，好快就成煲食晒。
2012年10月28日 星期日
地魚淡菜瑤柱粥 Dried Sole, Mussel And Scallop Congee
屋企有包大地魚乾，食極食唔完，仲有半包淡菜乾，又有半盒瑤柱。
一於將佢地浸透洗乾淨剪碎，用黎煲個比較另類既粥：地魚淡菜瑤柱粥。
淡菜乾風味獨特，地魚乾煙煙韌韌有咬口，加埋瑤柱蔥粒，一個二個一碗一碗係咁食，好快就成煲食晒。
2012年10月25日 星期四
煮花生 Boiled Peanut
行街市買買下送見到一檔地下放左一籮連殼帶泥既花生，望左兩眼，檔口阿伯話，買啦！
我好少見到有咁「原始」既花生賣，就諗起搵人笨既「花生魷魚地豆粥」既「地豆」，真係好貼切既形容呀！
於是就買左一斤，你地估下要幾多錢？
阿伯一路秤一路話，煲耐D，煲稔D先好食，一路睇電視一路剝，好正架！
買左番屋企，洗到我飛起，好多泥沙，又難清洗，結果又卒又浸，先洗乾淨。
落幾粒八角同少少鹽，慢火煮左兩個鐘有多，煮到收水，殼都稔埋。
煮花生都幾得意啦，食味就冇乜特別，就係好平實既花生味囉。落多D鹽或者落五香粉落豉油可能會更好。
2012年10月24日 星期三
白花蒸白豬 Steamed White Flower (Dried Salt Fish) And White Pig (Canned Pork Ham)
呢碟白花鹹魚蒸白豬仔火腿豬肉，係超好味超夾味既限制級家長指引版。
緊記少食多滋味，多食血壓黎！
白花鹹魚響西環鹹魚欄買，白豬仔上倉買左六罐，呢罐係第二罐。
食呢碟野，每人要分配。
只限一塊肉三分一塊魚，撈少少蒸汁，已可以扒一大碗白飯。
2012年10月23日 星期二
貢梨排骨湯 Tribute Pear Pork Rib Soup
而家貢梨當造，大平，四大個都係$14。食左一個，超甜，剩番三個一於用黎煲排骨頭。
專登咩野都唔落，唔落紅蘿蔔，唔落粟米，唔落杏仁，就係要飲貢梨既本味。
排骨頭買左$30，出水摘去碎骨，先煲。再落三個貢梨肉，大火煲滾，再轉細火煲三個鐘。
煲埋大約六飯碗湯，甜到不得了，落鹽平衡味道，非常好飲。
貢梨肉估唔到咁軟滑，完全冇酸味，只有香甜，超正！你地一定要試下！
2012年10月21日 星期日
豆腐魚尾冬瓜湯 Bean Curd Fish Tail Winter Melon Soup
魚尾冬瓜湯好飲，魚尾豆腐湯更好飲。魚尾冬瓜豆腐湯應該好好飲。不過個名唔係好岩聽，其實百無禁忌，照煲可也！
調下位，叫做豆腐魚尾冬瓜湯咪得囉。
鯇魚尾煎香，先加入冬瓜粒煲個魚尾冬瓜湯。
煲到冬瓜稔，再落豆腐再煲至湯色變白，煲到天黑，調味就飲得。
豆腐、魚尾、冬瓜，味道好夾！
煎蒸紅衫魚 Fried And Steamed Red Mullet
街市紅衫魚$3.5一兩，買左兩條，要$42。 (三年前整過番茄煮紅衫魚，兩條只需$15。)
其中一條個口仲留住個鈎。
清洗乾淨，用鹽、紹酒醃勻，放入雪櫃兩個鐘以上。
取出抹乾水，用隻Lodge 12" Skillet慢慢煎香，再轉入鑊隔水大火蒸十分鐘。
落葱粒，贊熱油，再落少少美極鮮露。
食落有煎魚又有蒸魚既口感，好味！
2012年10月18日 星期四
炆豬筍皮 Braised Pork And Bamboo Shoot Skins
屋企有一大包乾筍衣(我今次叫佢筍皮)，有排都未食得晒。今次又浸左一大湯碗，分兩次炆。
濕豬皮響豆腐鋪買，貴好多，又重秤。
今次兩種「皮」一齊炆，係早前「炆豬柚皮」既另一版本。炆豬筍皮！
筍皮同豬皮都要浸水過水渣水好多次，浸過夜。筍皮仲要煲一煲再過水。
先用南乳爆炒香筍皮，加水、加味，先炆到佢稔。
然後先加切細既豬皮，撈勻再炆至豬皮稔滑，稍稍埋獻留多D汁，撈飯特別開胃！
2012年10月14日 星期日
可愛鋼絲刷 Cute Steel Brush
行政總廚話好肉酸，打出pet pet，但係我覺得好Cute喎。
鋼絲刷都整到咁Cute，真係抵讚！
小朋友，你搵邊個呀，做咩唔睬我呀？
鋼絲刷原本平平無奇，加少少創意，就連洗煲洗鑊都開心D。
浸梅酒(一百八十天) Plum Wine (180 Days)
眨下眼呢樽梅酒已經浸左半年，色水越來越深。
今日再加一百克冰糖，加完已經滿到上頂，一共落左三百克冰糖，唔會再加冰糖了。
再浸佢一年先飲都未遲。
白酒煮花蛤 Boiled Clams With White Wine
行過街市買左斤半花蛤，要50蚊。
今次要整西式，買左一樽仔白酒，出動我個Lodge鑄鐵煲仔，加埋Rosemary調味。
花蛤洗擦乾淨，浸左幾個鐘，睇到佢地伸出黎透氣。
燒熱鑄鐵煲，落欖油、牛油、蒜蓉，放入花蛤爆炒一陣。
落白酒、Rosemary、香葉一片，加蓋煮到滾，煮到花蛤開晒全熟就食得。
花蛤冇沙，啖啖肉，白酒花蛤汁都好好味。食完我都唔知花蛤係咪即係花蜆？
訂閱：
文章 (Atom)