粉葛赤小豆豬肉鯪魚球湯

粉葛二斤：12元。

赤小豆扁豆一包：4元。

不見天豬肉搭豬骨：22元。

鯪魚肉四條：22元。

陳皮、蜜棗、薑適量。

佛山鐵線大瓦煲一個。

做法：

1 粉葛切片洗淨。

2 赤小豆、扁豆、陳皮、蜜棗洗淨。

3 豬肉豬骨出水。

4 鯪魚肉剢碎加鹽撻至起膠。

5 大瓦煲煲滾一大煲水，放入1，2，3，慢火煲三個鐘。

6 兩個鐘後撈起豬肉切件，三個鐘後落鯪魚球，再慢火煲30分鐘。

7 煲左三個半鐘，根本唔駛調味，已經好好味，即可享用。

味菜炒花螺

買左斤半花螺仔，48元，本來想白灼花螺。

白灼左食左幾粒，發覺D螺肉雖然鮮甜，但係黐住D黑衣，都幾污糟下。於是把心一橫，走去買左兩棵帶葉酸菜7元，整左碟味菜炒花螺肉。

做法：

1 花螺先洗刷乾淨，浸三十分鐘。

2 煲大煲油鹽水，落薑、葱，白灼花螺8分鐘，熄火浸多2分鐘。

3 挑出花螺肉，洗乾淨，清刷污物(例如附於螺肉上的黑膜)。

4 帶菜酸菜用鹽水浸10分鐘，切粗絲，用白鑊烘乾。

5 用蒜、薑片起油鑊，爆炒花螺肉，贊油加水煮一陣。

6 將烘乾既酸菜絲回鑊，兜勻，埋獻(糖、生粉、生抽、雞粉)收汁即可上碟。

花螺肉彈牙爽口，配上開胃酸菜，再加兩隻指天椒粒，都幾好味丫。

 

花鳥題字蓋杯

景德鎮白瓷蓋杯，花鳥題字。

杯蓋：味永清香

杯身：花開紅似錦，鳥弄舌如簧。

 

瑤柱地魚乾燒伊麵

大伊麵3個，每個5元，共15元。

鮮草菇4兩5元。韭黃一札2元。

瑤柱適量，地魚乾適量。

做法：

1 草菇、瑤柱洗淨。草菇切幼，瑤柱浸腍煮一陣搣絲。

2 韭黃切短度。

3 伊麵沖水洗一洗，伊麵唔駛先煮(因此唔駛過冷河，伊麵好快熟，切忌過熟過濕。

4 地魚炸香樁碎。

5 薑粒起鑊，爆香草菇，再落煮好搣好既瑤柱(連水)，煮一陣。

6 加埋地魚碎，加適量水(不要多)，落蠔油、糖、生抽、老抽煮滾。

7 放上已洗水瀝乾既伊麵。(鑊內汁水不宜多，最忌搞到伊麵腍腍濕濕。)

8 控制火路，按情況如要加水，逐少加，邊燒伊麵邊用筷子搞動摷勻。

9 燒至伊麵乾身，試岩味即可熄火。

10 落韭黃，摷勻即可上碟。

三個大伊麵可以整到一巨碟(14吋長)，今日全家都唔駛食飯咯。

韭菜炒蜆仔肉

響街市魚檔買左兩包蜆仔肉，10元包。再同菜婆買左兩札韭菜3元。

呢個送好似好簡單，但係功夫都幾多。原因係包蜆仔肉有好多雜質，一定要啤水啤到乾乾淨淨。

啤左成半粒鐘，再揀晒D怪物呀，殼呀出黎，再用清水浸住，落兩湯匙白米醋浸15分鐘以上。

再瀝乾水，再落適量幼鹽同兩瓶蓋紹酒醃佢15分鐘，先可以備用。睇下幾白滑！

韭菜就好簡單，洗淨切長粒備用。

做法：

1 用白鑊，落兩片薑烘炒蜆仔肉至收水微焦香兜起。

2 炒韭菜粒，炒至七成熟就要兜起。

3 落薑粒、乾蔥粒、指天椒粒爆香油鑊，落蜆仔肉爆炒之，再埋個生粉獻(糖、生抽、雞粉)，炒至微乾身，熄火。

4 拌入已瀝乾水既韭菜粒，兜勻即可上碟。

 

蝦膏通菜炒豬頸肉

清埋雪櫃最後一舊大澳蝦膏。

通菜一札6.5元。豬頸肉一塊14元。

通菜清洗乾淨，剪短備用。

豬頸肉切寬條，落鹽、糖、生抽、紹酒、油撈勻醃半小時以上。

蝦膏、薑爆香鑊，落豬頸肉爆炒，贊水煮到熟，兜起。

蒜頭起鑊，落通菜大火炒，至開始熟，豬頸肉回鑊，埋個薄獻略收汁即可上碟。

開飯喇！

 

炸魚皮

街市開左檔魚肉太太，個名都幾得意。個英文名仲趣怪，直頭係廣東話直譯：Yu Yuk Tai Tai。

6元包炸魚皮，買左一包試下，都幾脆，不過淡左少少。好多度都係呢種魚既魚皮，例如潮州粉麵鋪，唔知係咩魚既皮黎呢。

唔知D魚皮係邊度出既呢，個袋冇寫。

魚片粥

今日淥魚水用剩好多魚片，最簡單處理方法就係整魚片粥啦。

 

淥魚水

整番個經典淥魚水先。

鯇魚肉一條16元。只須用四分一條已夠。

皮蛋一隻。(5元3隻)

芫茜一扎2元。

茶瓜一包2元。茶瓜係淥魚水既靈魂，要買靚既。

做法：

1 鯇魚肉切薄片，用油撈勻備用。

2 皮蛋、茶瓜切條備用。

3 芫茜洗淨備用。

4 將魚片一片片平鋪響湯碗底。

5 煲滾一公升水，落薑片、油、鹽、雞粉、皮蛋煲一陣。

6 落茶瓜大火滾一分鐘。

7 落芫茜入湯碗魚片上，然後過濾沖入大滾既皮蛋茶瓜水，加蓋局幾分鐘。

8 開蓋，拌勻魚片、芫茜、皮蛋、茶瓜，即成風味獨特，鮮甜可口既淥魚水喇！

菜遠扒原木菇

原木菇適量。靚菜心半斤。

原木菇浸軟洗淨，落糖、鹽、生抽、老抽、紹酒、薑汁、油撈勻醃半小時。

菜心摘遠洗淨。

冬菇用煲炆至腍，再轉落鑊爆一爆，埋個厚獻(生粉、雞粉)。

菜遠用薑、鹽、蠔油炒熟伴碟。

將冬菇扒在菜遠上即成。