肥哉簡易版牛雜粥 Beef Offal Congee (Fat Joy's Simplify Version)

 

一般住家很難自製牛雜粥，但係想食牛雜粥都唔使專登過澳門嘅。我肥哉今日就試整個簡易版牛雜粥滿足一下好奇心同食欲。

材料好簡單，去港式或潮式粉麵店買一碗牛雜麵，吃掉牛雜湯麵，將牛雜留起用來煮粥。我幫襯嘅一間平民麵店一碗牛雜麵30元，牛雜都唔少，共有四款：牛肚、牛腸、牛肺、牛膀，足夠煮一大碗牛雜粥。

牛雜已有，現在只需煲一個粥底就可以「熟滾牛雜粥」！我用陳皮同一小塊當歸煲粥，取其香味同中藥香氣。

將陳皮當歸粥底煲到綿，就可以放入已剪成小塊嘅牛雜再「熟滾」約五分鐘。

滾至牛雜出味，再按個人喜好調味，加少少胡椒粉或薑絲，就可以上碗，灑上葱粒，香氣四溢肥哉簡易版牛雜粥就煮好喇！

上圖係一隻細湯碗，唔係飯碗。一碗牛雜麵嘅牛雜分量足以煲一細湯碗約兩飯碗牛雜粥，睇下幾多料：

好味，和味！好滿足！大家有興趣可以一試！

蜆汁炒大豆芽 Stir-Fried Bean Sprouts With Clams and Clam Juice

今日整呢碟餸唔使用水，用蜆汁代替水。買一斤大豆芽，三十元蜆(四十八元一斤)就可以做出一大碟。

大豆芽用白鑊烘乾水備用。蜆浸水吐沙後蒸熟留汁。

燒熱油鑊，落薑片爆香，再落大豆芽爆炒，加入蒸蜆的汁液半炆炒至收汁，加入葱段。蒸熟的蜆肉用紅辣椒薑絲爆炒，贊酒兜起。

青葱大豆芽炒至蜆汁收乾八九成，埋獻收汁上碟，在上面鋪上已炒香的蜆肉便大功告成！

開飯喇喂！呢個餸大豆芽吸收晒蜆汁的鮮味，非常和味！大家不防一試！

滑蛋蝦球 Stir Fried Smooth Eggs Topped With Shrimp Balls

寫網誌真係需要耐心同堅持，稍一鬆懈，煮嘢費事影相，懶，一停就又個幾月。今日要出返個post，整碟簡單好味嘅滑蛋蝦球。

我用蛋三隻，海蝦買咗30蚊，加埋少少芫茜、葱、韭黃，材料就係咁簡單。

呢碟唔係蝦仁炒蛋或蝦仁煎蛋，我係「分體式」處理，炒個滑蛋底，在上面放蝦球，咁樣蝦唔會被蛋漿包住，賣相靚好多。

做法超簡單，將蝦洗淨啤水再起雙飛索乾水放入雪櫃備用。三隻蛋加少少生粉水再落埋韭黃、芫茜、葱撈勻，燒熱油落鑊。

快炒成滑蛋，上碟。再爆炒蝦球，贊少少酒，炒至剛熟起鑊。

將蝦球排在滑蛋上面，即可趁熱開飯啦！睇下個賣相，係咪比滑蛋炒蝦仁靚好多呀？送飯更開胃！

果占魚手指 Fruit Jam Fish Fingers

屋企樽果占食極食唔晒，你有冇試過用來煮餸呢？今日我就整咗呢味「果占魚手指」，果占汁風味多變，絕唔輸俾傳統嘅甜酸汁架！

呢碟餸嘅成色最後取決於果占嘅顏色，我今日呢樽果占係深紫紅色。取適量果占，落白米醋、少少鹽，如有蜜糖可加少少，加栗粉同水開一個獻汁備用。唔好問我落幾多果占幾多醋，人人口味唔同，你可以一路開汁一路自己試味。

我用咗越南急凍石斑柳三塊，解凍索乾水，切成長條手指狀，再落魚露、鹽、糖、胡椒粉調味。

放入雪櫃醃一個鐘，取出再索乾水準備上粉。我唔鐘意太多太厚粉，只係用生粉加一隻蛋，開成濃稠粉漿將魚手指放入攪勻，再逐條取出沾上乾粉。

之後，放入油鍋中炸之，先炸一次，撈起瀝油，稍稍放涼。

再炸第二次，炸至香脆硬身撈起用廚紙索乾油。

跟住煮果占獻汁，煮到開始收汁時，放入魚手指拌勻。

一路收汁一路放入已烘香之黑白芝麻，直至收汁上碟。

嘩，果占汁甜酸香脆石斑魚手指整好喇！你一條我一條，未裝飯已清咗半碟矣！肥哉今日嘅介紹，各位真係要試下。

X記燒賣 X Kee Siu Mai

平民點心店X記嘅燒賣，用杞子做裝飾。主餡料應係豬肉，味道口感都不錯。

有冇混合其他肉料，配方不得而知。

甜食紅綠豆鹹肉糭一口包 Sweet Taste Sticky Rice Red And Green Beans Dumpling Mini Bun

端午節糭多到食唔晒，雪櫃仲有大半包「黃皮」，本來想整糯米包，但係嫌麻煩，於是諗到用糭做餡，用埋啲黃皮整個一口「糭包」。早前買啲黃皮好多都已經黐埋晒一搣就爛，只能用較完好嘅來包，其餘都要掉。

我用咗兩隻鹹肉糭，一隻紅豆一隻黃豆，用小鋼鏟將佢切開壓碎拌勻。今次要做甜食，於是落紅糖，再加入煮熟嘅花生同白芝麻，增加口感。

之後用一塊黃皮包一個「一口包」，包咗八個，只用咗好少材料。（用剩嘅材料唔好浪費，可以放入掃咗油嘅大碗，壓實蒸熱再反扣上碟，即成美味蒸甜糭。)

將一口包放在蒸籠內已掃油蒸片上，由於糭餡已經長時間烚熟，呢個一口包只需用中火蒸5分鐘左右即成。

肥哉版「一口糭包」香甜軟糯，又有花生芝麻增加口感，一啖一個，好好味。

外賣牛筋腩飯 Take Away Beef Tendon And Brisket With Rice

今日唔得閒煮飯，去街市麵檔買外賣。44元一盒牛筋牛腩飯。

呢檔嘅牛筋麵、牛腩麵做得唔錯。通常呢類麵檔都會賣埋飯，例如牛腩飯、牛什飯、豬手飯或雙拼飯等等。

分量都好多，一盒飯其實有成三碗。女士食一碗已夠晒有餘，中年男士如果食得晒成盒，九成係個大肚腩肥佬。牛腩其實好肥膩，食完個喉嚨成日都覺得有油黐住！

麵檔牛腩飯如果只係以鹵水腩湯代替正式炆牛腩的濃滑獻汁，效果不會好。例如我買呢盒，腩汁(即腩湯)浸到成盒飯濕晒，稍為加熱兜兩兜，飯已爛，不好吃。

彩椒蝦球撈烏冬 Color Peppers Shrimp Balls With Udon

呢碟三色椒絲蝦球撈蝦汁烏冬超美味，值得向各位介紹下。整一至兩人份一碟，只須以下材料：

 三色椒各一片，蝦三隻，豆豉、黑芝麻小量。

烏冬一至兩包，蝦頭蝦殼煎汁一碗。我嘅做法係，買咗30元中海蝦(64元一斤)，將剝出來的頭殼用白鑊乾煎至微焦香。

之後落三碗水煮蝦頭殼，三碗煎埋一碗，過濾。再用過濾的蝦汁炆煮烏冬，煮至收汁。此時烏冬已軟腍並吸收蝦汁精華，上碟。

另燒熱鑊，落油贊酒將蝦爆炒成蝦球狀，兜起，再落豆豉起鑊爆炒彩椒，埋獻。

將彩椒、獻汁淋在烏冬面，排上蝦球，最後灑少少已用白鑊炒香嘅黑芝麻就大功告成。

食時將材料與烏冬撈勻，就係我今日整嘅「彩椒蝦球撈烏冬」喇。好味！惹味！

***敬請留言 Comments welcome***

乾蒸牛肉燒賣 Dry-steamed Beef Siu Mai

買咗成大疊燒賣皮，包完豬肉燒賣，點少得包埋牛肉燒賣吖，今日包咗八隻，仲有一大疊燒賣皮用唔完！

牛肉燒賣唔係純正牛肉，要加入肥豬肉先好食，我仲加入少少鯪魚膠，落埋陳皮，芫茜，葱。

免治牛肉先調味，我落咗：蒸魚豉油、鹽、糖、粟粉、梳打粉、雞粉。混入陳皮、芫茜、葱粒。加油、酒、清水，將所有材料攪勻，再撻佢三十下，放入雪櫃雪十幾分鐘。

今次唔整咁多，包八隻算數，啲料用唔晒留返蒸牛肉餅。大火計蒸五六分鐘就搞掂。

加咗梳打粉同撻過嘅牛肉，就係酒樓風味，比較滑、彈。一出籠唔使三分鐘就冇晒啦！

***敬請留言 Comments welcome***

四式燒賣 Four Style Siu Mai

四式燒賣：上圖左前蝦加魚，右前蝦加豬，左後魚加豬，右後蝦加魚加豬。

買到燒賣皮，試做肥哉版四式燒賣。上網見人整街邊檔魚蓉燒賣要用攪拌機打魚漿，再溝粉，我嫌麻煩，又冇攪拌機，於是改變主意，整個肥哉「四式燒賣」。我今次用咗三種植材料做燒賣餡：

鯪魚膠10元，蝦膠20元，半肥瘦豬肉攪碎30元。鯪魚膠同蝦膠，魚檔已經攪好，用佢地嘅配方溝好味同粉，豬肉自已醃好。於是乎……我混合出四種餡料，混合材料時唔好撈得太勻，太勻冇食趣。四種餡料即：1魚膠+蝦膠，2魚膠+豬肉，3蝦膠+豬肉，4魚膠+蝦膠+豬肉。咁就包都包得好玩啲開之啲啦（睇怕谷歌翻譯唔到我呢啲廣東㗎嘞)！「四式燒賣」登場！

你地分唔分到邊種餡打邊種餡呀？應該分到掛。左前係魚加蝦，左後係魚加蝦加豬，右前係魚加豬，右後係蝦加豬。如果你鍾意整嘢食，第一次包燒賣，都應該同我一樣咁開心興奮。包燒賣點包架，咪就咁包囉，冇乜技巧，唔使講到咁複雜，你有少少common sense就得，肥哉就係咁包↓，第一次肉手出鏡：

總之包到咁上下樣就得，呢啲平民大眾粗食，唔使追求咁完美（同買萬幾蚊個電飯煲煲飯一樣，都係過分多餘）。

包呀包呀，包咗四籠16隻，餡料用唔晒。已放滿個大蒸籠↓，睇下分唔分到邊種打邊種？？

跟住攞去蒸，水滾計大約蒸十分八分鐘，干蒸四式燒賣就可以出籠。嘩，蒸完出嚟變咗「混合四式」，我自己都幾乎分唔出邊式打邊式！

有啲真係要食落肚先知。下圖上半係魚加豬，下半係蝦加豬。

再嚟一張「四式燒賣拼盤」，睇真啲：由左至右：1蝦魚、2蝦豬、3魚豬、4蝦魚豬。

喂，埋嚟試下肥哉首版四式燒賣喇喂！你一粒我一粒，食下食下食清光！