今日係2011年最後一日，預祝大家新年快樂，2012年事事順利！
整左碟菜遠肉片炒麵，簡簡單單已很好！
材料：
1) 全蛋乾麵餅三個(我用左張榮記全蛋麵)
2) 菜遠四棵
3) 脢頭肉片適量(約10元份量)
做法：
1) 將全蛋麵用凍水浸軟，整鬆，瀝乾水。落鹽、雞粉、調味，再落少少油撈勻。燒熱鑊，落油，落麵半炒半煎至兩面微焦，上碟備用。
2) 脢頭肉片調好味(糖、紹酒、豉油、泡打食粉、水)醃過夜。燒熱鑊，落油爆炒至熟。3) 菜遠四棵切半，放入炒好肉片上再炒勻，埋個蠔油獻(獻汁要夠濃夠多)。4) 將菜遠肉片同獻汁淋在麵上即成！
好好味呀！三個全蛋麵可以炒到一大碟，四五個人都夠食架。
下星期就係聖誕節，肥哉預祝各位聖誕快樂呀！
聖誕節會去玩，可能唔得閒整野食喇，所以今日精心炮製左呢款「聖誕雞翼」(南瓜槌果車厘茄炆雞中翼) 同大家分享。
材料：
1) 雪藏雞中翼兩磅$37.9共有23隻
2) 南瓜半邊$5
3) 番茄仔一磅$6 (只用適量)
4) 樽裝槌果$59 (只用適量)
工具：
Staub 24cm 圓煲$1299 (今日呢個菜仲係開煲菜！)
今日卒之到阿Joel出場喇！佢全身都係「聖誕紅」，唔整個聖誕菜式都唔得啦！
做法：
1) 雞翼徹底解凍，索乾水，用豉油、糖、紹酒、雞粉調味，放入雪櫃雪過夜備用。
2) 南瓜切細粒備用。
3) 番茄仔開邊備用。
4) 槌果略為壓開備用。
5) 燒熱煲，落少少欖油，先炒香南瓜粒。
6) 兜起南瓜粒，落雞翼(連醃料汁)，略為煎一煎。
7) 放入南瓜粒，加入一碗水，煮滾，落一粒冰糖，將南瓜雞翼撈勻，加蓋，用慢火炆十至十五分鐘。
8) 開蓋，加入槌果同番茄，撈勻，視煲內水量而定是否須加水，蓋上蓋，再慢火炆約十分鐘。9) 開蓋，此時把汁液收至濃稠，試味後即可原煲上枱。
呢款「聖誕雞翼」色香味俱全，材料經濟簡單(槌果可以在CitySuper買到，唔落可改用青檸)，好有節慶氣氛架。
雞中翼肥美香滑，南瓜、槌果、番茄色彩鮮明，味道甜酸混合而平衡，真係唔錯架！
連聖誕老人隻鹿仔都忍唔住想食番啖呀！
屋企食剩飯，最好用黎炒飯或者煲粥。
琴晚食淨兩碗飯，用電子瓦罉煲落一煲粥，今日換落粥鼎煲兩煲就好綿。
落埋蠔豉，花生，魚片就最正啦。街市檔口蠔豉288元一斤，買左呢幾粒，要17元。
關廟麵果然好野。睇資料知道此麵不易煮爛，果然可以煮到腍軟而仍有彈性既口感。
用黎整左個香香(香芹、香茜)肉碎撈麵。好好味！
工具：煮麵、撈麵用鑊 - 膳魔師中華鑊。
炒香芹肉碎 - 南海三星生鐵鑊。
先用半肥瘦豬肉絞碎，加香芹粒炒一個「香芹肉碎」備用。
關廟麵兩個用水煮至腍軟。一路煮一路落油、調味(鹽、地魚粉、蠔油)，煮左十五鐘至麵水變濃麵身腍軟時熄火。
隔去水分，將麵與肉碎、大量芫茜撈勻，即可趁熱享用。
睇得出佢幾有韌性，腍身但仍有咬感。真係唔錯！
商場最近開左間阿信屋，真係好！唔駛成日都係百佳惠康，千篇一律。
入去走左轉，最吸引我既唔係日本食品，而係呢包大大包又墜手既「關廟麵」。
其貌不揚，就係鍾意佢個包裝夠土氣，個名又特別。我估係關帝廟門前有檔賣麵既，整得好好食，賣到開晒巷，就成為經典地方麵食掛。網上查一查，好似唔係喎。「關廟麵是由台南縣關廟鄉這傳統的農業鄉村所生產製造的。歷史己有百餘年之久。」http://www.seawlth.com/noodle.htm 關廟麵簡介。
全素、用過濾純水、日光曬製，好特別喎。
行兩行又買多包「新竹米粉」，睇下個包裝袋幾土氣！就係鍾意咁既包裝。包裝袋後面仲詳細教埋點樣處理米粉添，不過我驚跟佢咁整會炒到碎晒喎。仲未得閒整黎食呀。有咩好提議，點整好呢？
關廟麵$25.9，新竹米粉$7.9乍。
今日終於可以試煲喇。先請阿Patrick仔出場(Staub 20cm basil green cocotte)。
買左兩包豬手，先徹底出水10分鐘，再清淨乾淨，用廚房剪幫手起肉去骨。如果唔去骨，會刮花阿Patrick仔架。
蓮藕適量切小片。另備八角兩粒，冰糖適量，紹酒適量，薑片適量。
簡單開煲後(暖水洗淨抹乾掃油燒熱，再用暖水沖洗抹乾)，燒熱煲，落油同薑片，爆一爆豬手。
加入兩碗水，落八角，加蓋煮至滾，改細火炆半小時。
加入冰糖、豉油、雞粉、紹酒、鹽，再加蓋炆半小時。加入蓮藕，再炆半小時至四十五分鐘。
全程都唔駛再加水，基本上唔駛睇火，呢個係同用瓦煲炆既一個好大分別。炆至豬手腍身兼上色，汁液濃稠適中，即成。
Mmmmmm，又入味又腍，Patrick仔果然駛得。
