焗香草雞扒 Baked Chicken Steak

買左cheap cheap雞髀扒一大包有四塊，今日用左兩塊黎焗，落左三色椒同洋葱做配料。

醃料落左：胡椒粉、鹽、糖、喼汁、雞粉、梳打粉、茴香粉、乾露絲瑪莉葉。放入雪櫃醃過夜。先用白鑊(易潔鑊)慢火煎兩邊至微金黃色。

再將切好既三色椒同洋葱用橄欖油細火微炒一炒，放入焗盤用黎墊底，再放上雞扒。

放入焗爐用200度焗8分鐘，再返轉雞扒再焗8分鐘。

然後取出在雞扒面塗上蜜糖水，再放入焗爐焗約5分鐘，再取出塗另一面，又焗約5分鐘。

     

 

出爐就係咁樣。雞扒夠入味，雖然係cheap野，都可以接受啦。
 

 

 

焗香蕉蕃薯餅 Baked Banana Sweet Potato Cake

 

雅虎blog今日正式執笠，真係好唔捨得，佢個設計好好用，好過呢度無拿拿搞出三四個頁面，轉來轉去，轉到頭暈。雅虎真係簡單直接好多，版面功能又好，谷哥唔該學下啦。

 

今日行街市見到雞蛋黃蕃薯大平，十元三磅，買左五個。返到屋企見到有隻冇人吼既梅花點香蕉，就諗住整呢個香蕉蕃薯餅食下。

 

蕃薯先蒸熟，再同香蕉一齊猜成蓉，用黎做餅餡。我仲響裏面落左少少丁香粉同荳蔻粉。

 

跟住本應要做個曲奇餅皮，不過我唔想食牛油同太多糖，於是用左一半香蕉蕃薯蓉加蜜糖同橄欖油，再拌入低筋麵粉，猜成餅皮。放入雪櫃雪一陣。

 



 

之後用餅皮包餡，搓成橢圓形放入餅模打出，做左十二個餅仔。

 



 

 

在面上抹少少蛋黃汁，放入焗爐用180度火焗20分鐘。

 



 

攤凍後可以上碟做小食，得閒玩下整餅仔都幾得意啦！

 

 

個餅皮微脆但帶韌，因為我唔想食牛油，完全冇落。如果唔怕脂肪太高，可以做曲奇皮，會好食香口好多。個餡料就唔錯，有香蕉、蕃薯同香料味，都幾特別架！

 

 

 

 

 

 

煎老少平安豆腐 Fried Tofu Cake

 

街市豆腐又加左價喇，而家要四元塊。買左兩塊，再買十元鯪魚膠。加埋蝦米、少少陳皮同葱，又整老少平安。見材料好多，於是分成兩半，一半用黎蒸，一半就做左呢碟煎老少平安豆腐。唯一唔同就係煎呢碟落左粟粉。

 

 

陳皮蝦米浸好剪碎，加少少薑粒、胡椒粉，同埋魚膠搓入豆腐中，調味，放入雪櫃雪一個鐘。

 

 

燒熱鑊，放少少油，將豆腐一份份放入壓成餅狀，用中火煎至兩面金黃色即可。

最後埋個喼汁獻，稍煮一煮至收汁，上碟！

 

 

煎老少平安豆腐餅，外面香而有咬勁，裏面軟滑。有益、美味又便宜，久唔久轉下口味同做法，都唔錯架！

 

 

 

 

 

蒸牛肉球 Steamed Minced Beef Balls

呢碟蒸牛肉球個樣都唔錯掛？雖然食落仍然唔夠茶樓出品咁彈牙咁滑，但係都可以接受啦，而且冇落肥豬肉，健康D。

響平民超市買左包澳洲免治牛肉，落左：陳皮絲、葱頭絲、葱粒、薑汁、水、紹酒、鹽、糖、豉油、鬆肉粉、胡椒粉，仲有最特別既係馬蹄粉（唔買馬蹄費事整，屋企有馬蹄粉就落黎試下。

將所有材料攪勻，再撻呀撻，撻至起膠，再將佢放入雪櫃雪一個鐘以上。然後整成球狀，放入蒸片上，用大火蒸七分鐘。

蒸好之後就係咁樣，上碟後可以點喼汁食。味道都幾似茶樓既牛肉球架，口感就差少少！自家製都可以啦！

個樣似唔似茶樓牛肉球？加埋鮮竹或者西洋菜墊底就更好！

一舊已經可以送一碗飯！ 呢款澳洲免治牛肉用既肉都幾肥，食兩舊已經覺得膩，搓牛肉時都搓到成手牛油！

芥膽腰豆炆排骨 Braised Pork Rib With Mustard Green And Kidney Bean

自從雅虎收檔後，肥哉廚房煮煮下俾佢窒住度氣，搞亂陣腳。新網站又唔就手，寫篇網誌都費時失事，於是整下整下搞到冇乜心機。其實我都唔想就咁就停，我都希望自己可以堅持落去。

 

呢味芥膽腰豆炆排骨，都幾正架，大家都可以試下！

 

 

芥膽以前大平，而家買一個要十一個半。紅腰豆係屋企用剩，今日可以用晒。再買左三十元排骨。炆埋一大煲，可以分兩大碟食兩餐。



排骨出水洗淨去碎骨，先用薑片起鑊爆香，再落水炆至腍身。另芥膽裁好，用蒜頭葱頭起鑊先炒一炒，再加入炆排骨連汁液再炆至菜腍。

再加埋已預先浸水煮腍既腰豆，炆至略收汁再埋個薄獻即可上碟。

芥膽味道獨特又夠腍，紅腰豆綿軟仍帶少少咬勁，肉排又腍又滑。芥膽腰豆好快就掃清，淨番肉排，反而成為配角！

 

 

 

 

 

西洋菜炒牛肉 Stir-Fried Watercress With Sliced Beef

 

今日街市本地西洋菜幾靚，十六元斤買左一斤，再買左舊牛肉，就炒左呢碟西洋牛肉。

 

牛肉用少少鬆肉粉加水醃一醃，再切好薑絲，煎好乾紅椒，洗淨西洋菜，就可以炒。

先爆炒牛肉，再炒西洋菜至差唔多鶁，牛肉回鑊，落紅椒粒，埋個薄獻即可上碟。

簡簡單單都幾好食，西菜好靚條條都冇渣！