冰糖薑水燉蛋

飯後黎番個甜品先，整番款冰糖薑水燉蛋。

以下係一人份一滿飯碗既比例。(其實有多：一隻蛋只燉到大半碗，兩隻蛋就略多，上圖完成品既「水位」其實仲有蛋液可以再高D)。實際係點，要視乎蛋同碗既大小而定，難以講得實。

中號雞蛋兩隻，冰糖適量，薑片適量，開水一杯。

做法：

一、雞蛋兩隻徹底打散，要打到非常勻巡，蛋白要化晒。兩隻蛋既份量剛好半杯。

二、用一杯多少少水，加薑片煮滾，再煮溶冰糖，過濾落量杯，份量要一杯。

三、攤凍糖水，再與蛋液混和，再過濾一次落量杯，此時份量係一杯半。

四、鑊內煲滾水，放入字格，飯碗，將溶液注入碗內。

五、用匙羹畢走晒水面既泡，再注入溶液至滿碗。

六、用隻鋼碟反蓋在飯碗上，再加上鑊蓋，用慢火蒸約12分鐘(蒸既時間人人不同，視乎爐火、盛器而定)。

七、中途可開蓋觀察效果，蛋液表面光滑，全體已凝固(仍能彈下彈下)即熄火。

取出趁熱享用，也可攤凍置雪櫃內雪凍食！

嘩，好滑滑好好味呀。。。。。。

 

紅燒豆腐

布包豆腐2塊。菜遠、冬菇、草菇、雪耳、紅蘿蔔適量。

一、布包豆腐一塊開四，索乾水，灑少少幼鹽，落多少少油煎至兩面金黃備用。最好炸至表面平均金黃，內裏幼滑，不過好晒油，住家冇咁做。

二、菜遠炒熟拌碟。

三、冬菇浸軟剪半，草菇洗淨切片，雪耳軟軟剪細朵，紅蘿蔔切片。

四、薑片起油鑊，爆炒第三項材料，落水，可落蠔油炆一陣。

五、豆腐回鑊，與上面材料四一齊紅燒，燒至略收水，調味埋個厚獻即可上碟。

鍾意食肉可以加入肉片，唔加，用豉油代蠔油，就係一道齋菜。

西蘭花炒肉片

呢碟家常菜簡單，易做，好味，有益。

材料：

西蘭花一個六元。脢頭豬肉十八元。薑片適量。

做法：

西蘭花切好，沖洗乾淨。用大滾水，落油、糖，薑片，放入西蘭花，灼至水再滾撈起，過冷河直至熱度完全消失，再瀝乾水備用。

脢頭豬肉切片，落鹽、糖、油、紹酒、生抽醃勻至入味。用薑片起油鑊，爆炒肉片，贊水炒至熟。再放入西蘭花，大火快炒，調味、埋獻，即可上碟。

呢碟西蘭花爽脆多汁，好好食架。

景德古窰青花蓋碗

雖係粗糙不值錢之物，但其造型獨特，風格樸拙，已足堪玩味。

菜乾蠔豉鹹排骨粥

呢個粥我係「分體式」煲架。用分體式煲，冇咁易黐底，唔駛成日睇火。

一、先煲個杰D既白粥底。

二、菜乾蠔豉按個人喜好決定份量，浸軟洗淨剪短，獨立煲湯咁煲，煲到夠淋出味。

三、排骨(自行決定用邊種排骨，今次我用一字排，貪佢肥肥地夠香。)用多量鹽醃過夜至完全入味。然後先行蒸熟。

以上一、二、三搞掂後，將菜乾蠔豉湯同蒸排骨既汁全部傾入粥底再煲，煲至濃稠度適中，落排骨同湯渣，滾十零分鐘即可熄火。咁樣先可以保持「鹹排骨」既鹹鮮味。如果一開始就落排骨，排骨就煲到冇晒鹹味，亦都冇趙口架喇。

最後將全煲野轉落乾淨瓦煲慢慢享用，可用最細火pat pat下，要食就自已黎畢啦！

苦瓜魚片湯

苦瓜兩個12元。鯇魚肉一條10元。蜜棗兩個。杞子適量。

做法：

苦瓜一個切片，另一個用攪拌機加水攪碎，過濾後得苦瓜汁兩杯。

魚肉切片，落少少油、鹽醃勻。然後放落滾水內拖一拖撈起瀝乾水備用。

先滾個湯底：可以落雞湯，或者清水四杯(加鹽、雞粉調味)，蜜棗兩個，薑片適量，魚片一半，滾15分鐘。

再滾苦瓜湯：此時倒入兩杯苦瓜汁，加入苦瓜片，再滾15分鐘。

最後落杞子(已浸軟洗淨)，滾一分鐘，調味。

湯碗內置魚片，傾入滾湯趁熱飲。

此湯苦中帶微甜，味道幾特別架。

 

清炒番薯葉

從未食過番薯葉，今日見街市有得賣，一於試下。

五元三扎，用蒜蓉清炒。

番薯葉洗淨，準備滾水(落油、糖)，番薯葉拖一拖滾水撈起，瀝乾水。

燒熱鑊，落多點油，爆香蒜蓉，番薯葉回鑊快炒，調味，落少少紅椒粒上碟。

食味有D似旱蕹菜，幾好食喎。

 

白瓜炒牛肉

今日全個街市得一檔有白瓜賣，五元斤，好新鮮好靚，買左兩個黎炒牛肉。

兩個白瓜4.8元。牛肉10元切埋。

白瓜刨一半皮，切片。牛肉落糖、鹽、生粉、少少梳打粉、蠔油、水、油醃勻。

先爆薑炒白瓜，邊炒邊贊水，炒至差唔多熟上碟。

落油爆炒牛肉，白瓜回鑊，贊酒、埋獻、校味收汁即成。

白瓜爽甜多汁，同牛肉好夾。淨係呢碟都已經可以送兩碗飯啦。

 

三色蒸水蛋[鱆魚蓮藕豬肉湯底]

用豬肉湯代替水蒸呢個蛋，效果都唔錯架。

材料：

1 鱆魚蓮藕豬肉湯(琴晚飲剩，環保呀！)約300ml。

2 雞蛋三隻。咸蛋一隻。皮蛋一隻。

做法：

1 雞蛋打勻，加入湯底攪勻(先行過濾)。

2 咸蛋、皮蛋先行蒸熟，切片備用。皮蛋可以唔蒸，就咁切開生食都得，不過我今次蒸埋。

3 蒸水蛋。中慢火水滾計蒸5分鐘。

4 水蛋蒸至岩岩好(搖佢會彈下彈下，碟心冇蛋液)，熄火，鋪上已蒸熟既咸蛋、皮蛋片，灑上蔥粒，贊上滾油。唔好落豉油住，試下味先。

食得喇。好味道呀！不過唔好食咁多喎。

 

免治牛肉炆全蛋麵

乾麵餅整得好既，而家數得出幾間老店。紅磡有間張榮記，係其中一間，仍然保持很不錯的水準。

今次用左三個全蛋幼麵餅，落少少免治牛肉同芥蘭整左碟炆麵。

做法十分簡單，一鑊過搞掂。

1 免治牛肉調好味，先落鑊爆炒備用。

2 四碗水或雞湯煮滾，落一湯匙油，放入三個麵餅用中慢火炆至差唔多收乾水。

3 此時放入牛肉撩勻，再放入芥蘭又撩勻。

4 調味，炆至收汁，麵身軟腍即可上碟。

呢個炆麵既腍度可以隨意調校，鍾意食爽身就落兩碗水，鍾意食爛麵就落五六碗。我覺得落四碗水腍度就岩岩好。

 

雙菇清炒白菜仔

靈芝菇、金菇、學斗白菜仔三樣，清清爽爽，炒埋一碟。

白菜仔好新鮮，望之如翠玉，如白玉，幾乎唔捨得食呀。