西芹魚塊

唔忿氣卒之買到龍利柳，上晝已經食左一條冇影到相。而家仲剩番一條，一於用黎整個西芹魚塊。

龍利柳同鯰魚柳真係唔同架，唔好信凍肉公司D阿姐呀。龍利柳滑過鯰魚柳架。

呢個送真係無技可言，我想食清淡D，少油少鹽，條魚柳本身已有魚味。

 

貴到飛起車厘子

行過街市生果檔口痕想食車厘子，買左半磅得20粒，貴到飛起。你地估下幾錢磅？

 

煎釀苦瓜

買左兩個長身淺青苦瓜，要黎釀魚肉。我冇學人切苦瓜環，我將個苦瓜開邊黎釀。

苦瓜兩個4.5元。鯪魚膠10元。

苦瓜切開邊，挖乾淨，切成一塊塊。先用油、糖水滾一分鐘(水滾計)，撈起過冷河再瀝乾水備用。

在苦瓜內搽少少粟粉，將魚肉釀入。10元魚肉釀14塊苦瓜仲有剩，可以再煎一塊魚餅。

用易潔平底鑊煎之。易潔鑊可以用較少油，健康D架。

可以煎完魚肉面，再棟高塊苦瓜煎兩頭，煎到金黃色，先上碟。

再在鑊內爆個蒜頭、豆豉、蠔油獻，要濃一D。再將苦瓜回鑊，贊少少紹油，索勻獻汁即可上碟。

好味道呀~~

 

香芹薑米魚柳粒炒飯

用剩餘物資炒左個飯，都OK好味。

香芹粒。鯰魚柳粒。薑米。冷飯一碗。

鹽。雞粉。蠔油。各小量。

 

金針黑木耳番茄湯

金針適量、白背黑木耳一朵、番茄三個。

洗好、浸好、切好，全部放晒落煲，煲滾略調味就飲得。好易滾既湯，唔駛講做法啦。

呢個齋湯好有益架。

 

香芹甘筍煎鯰魚柳

本來想整龍利柳架，不過買唔到，去大昌買左包鯰魚柳，我問阿姐有冇龍利柳，佢話鯰魚柳即係龍利柳。算啦，我知唔係，龍利滑D，鯰魚鞋D，不過都買左。

我落香芹同紅蘿蔔做伴菜，兩樣野都好有架。

做法：

1 魚柳自然解凍，抹乾水，落少少幼鹽搽一搽魚身。

2 香芹切度，連葉都要埋，葉仲有益架。

3 紅蘿蔔切滾度。

4 煎魚柳：用易潔鑊，落少少油，將魚煎至兩邊微黃全熟鏟起。

5 爆紅蘿蔔；然後逐少逐少落清水，加蓋先將紅蘿蔔煮至七成熟。

6 落香芹略炒，紅蘿蔔回鑊埋個透明薄獻淋上魚面即成。

 

半煎炸鱭魚

細個時阿媽成日整煎炸鱭魚，每次有得食都好開心，因為覺得鱭魚好香口好好食。可以成條連骨都食埋。今日行街市，見魚檔一碟碟湯好左既鱭魚，十元份，於是買左一份。

就咁鱭魚煎鱭魚，配菜咩都冇。

鱭魚九條，清洗乾淨，搣清內臟刮走肚內黑膜，用廚房紙索乾水，落淮鹽拍勻全身內外，再落一湯匙紹酒，封好保鮮紙放入雪櫃雪一個鐘。

用平底鑊，落較多油，燒熱用薑起鑊，再逐一將鱭魚排放落鑊半煎炸至兩面焦黃香脆，即可上碟。

鱭魚煎炸到香脆，都算鹹香可口啦。

 

冬菇肉絲蒸撻沙魚

撻沙魚肉滑骨少，配冬菇肉絲蒸，係一絕！

撻沙兩條42元。冬茹、肉絲、冬菜適量。

做法：

1 撻沙清洗乾淨，用廚紙完全索乾水，洒少少幼鹽放入雪櫃醃一個鐘。

2 冬茹浸軟切絲。豬肉小量切絲。冬菜沖洗乾淨。

3 大魚碟一隻，搽少少生油，在碟底放幾片薑片，撻沙放在薑片上。

4 排上冬菇絲、肉絲、冬菜。

5 大火蒸10分鐘。倒去魚水，洒上蔥粒，加蒸魚豉油，贊適量滾油即成。

 

 

秀珍菇翠玉瓜炒雙蔬

今日整番個炒雜菜清清腸胃。

秀珍菇、翠玉瓜、油麥菜、大芥蘭各適量。

平底易潔鑊一隻。

先將所有材料洗淨切好。

先落油爆薑片，落秀珍菇爆炒一陣，再落大芥蘭，稍煮一陣，上碟。

再炒油麥菜翠玉瓜，將秀珍茹大芥蘭回鑊，加蠔油，贊紹酒即可上碟。

簡單，好味。秀珍茹同油麥菜好夾味架。

 

佛手瓜黑木耳排骨湯

煲個佛手瓜湯應下節先。

佛手瓜四個13元。白背黑木耳兩朵。豬脊排20元。不見天20元。

做法：

1 豬脊骨、不見天洗淨出水兩沖洗乾淨。

2 木耳浸軟，剪到硬頭再裁成細塊。

3 佛手瓜洗淨，連皮切大件。

4 煲滾大半煲水，將以上1，2，3全部放入，先用中大火煲一小時。

5 一小時後取出不見天有後用。再轉中慢火煲二小時。

6 調味後即可享用。

佛手瓜煲三小時後，皮同肉都完全腍軟，可以連皮食架，個湯仲好清潤有益添！

 

 

佛誕買左佛手瓜

今日佛誕，行街市買左佛手瓜(合掌瓜)煲湯，睇真D佛手瓜真係好靚架。

六元斤，買左四個，13元。

 

36元買大師傅288個食譜

陳湘記最近又補番呢套書喎，真係超晒值啦。

陳榮師傅既《家庭食譜》，分合訂本上集同下集兩冊，八折價只係36元，裏面總共有288個食譜。以前D師傅出書淨係用文字教整送，憑字傳意，一張相都唔駛，讀者運用想像力可也。而家D食譜，七彩精印，用大大張靚相吸引讀者，內容其實相對單薄，本本要賣成八九十蚊，真係唔買得咁多。好似阿朱姐D書，五花八門，越出越多，我次次拎起手睇到入神，圖文並茂，寫同做都精細，正係正，但係都忍手冇買，如果本本買真係買到破產。如果佢出套平民版就好喇。所以都係反璞歸真，平平地買陳大師傅既舊書，真係學到唔少野，仲有梅姐既書，都係同類，以前既年代真係簡樸實惠好多。

如果覺得陳師傅部《入廚三十年》部頭太大又較貴(四冊，定價二百元，八折要一百六十元)，就不如買呢套《家庭食譜》先啦，其實《入廚三十年》同《家庭食譜》裏面好多內容都係重複架！

燉豬腦細個時都見D長輩整過，而家我諗冇人敢食咯。睇下食譜都可以睇到社會生活既變遷，好有趣架。

柴魚花生鹹豬骨粥

今日唔食飯，屋企煲粥「摷」米。

今次輪到試下大澳D柴魚，整番個柴魚花生鹹豬骨粥。

做法：

1 預備白粥底一煲。

2 柴魚半條，浸軟渣幾次水，洗乾淨再渣乾水備用。

3 花生洗淨備用。沖菜浸水一陣，再切絲切粒備用。

4 一字排24元，用多量鹽醃一小時以上備用。

5 落花生入粥煲之，再手撕柴魚落粥，煲至花生腍。

6 落豬骨，煲一小時以上至粥綿。

7 食前加少少沖菜粒，可增加風味。再配一碟摷米，正呀！