節瓜蝦米魷頭粉絲 Braised Hairy Melon and Dried Shrimp in Bean Thread

無技家常送經典之：節瓜蝦米粉絲

今次加左少少魷頭，增加風味。又係易造到痺，只要俾D心機就掂。

節瓜兩個4元。龍口粉絲5元3包，用兩包。蝦米魷頭屋企買落。呢兩樣野好重要，尤其是蝦米，係味道既關鍵，一定要買靚D，乾淨無怪味既。

將節瓜切條備用。蝦米洗淨，唔駛浸水(我唔浸水，因為一陣炆煮時根本就係用水浸煮)。魷頭洗淨剪碎備用。粉絲沖洗一陣，只須略為浸軟，千祈唔好浸腍(冇必要，因為一陣會煮到夠腍)。

呢個送全用瓦煲製作：

用薑片蒜蓉起煲，落少少鹽，爆節瓜，贊少少水同酒煮到略為透明，鏟起備用。

再爆炒蝦米魷頭，由佢微「炸」一陣，令蝦米收乾身。此時贊入兩碗水，煮滾。

放入粉絲，加蓋煮一陣。

煲內粉絲略為收水時，放入節瓜再煮。埋獻(老抽、生抽、糖、鹽、胡椒粉、生粉)，加蓋、睇火，一直炆至收汁。熄火，成煲野局一陣，即可上大碗享用。

嘩，真係好夾味，D粉絲唔會太腍，帶微韌咬勁，好好食架！

鍾意食辣落埋指天椒，仲正！